അഹമ്മദാബാദ്: ഗുജറാത്തിലെ അഹമ്മദാബാദിൽ എയർ ഇന്ത്യ വിമാനം തകർന്നുവീണ് ഉണ്ടായ ദുരന്തത്തിന്റെ ഞെട്ടിക്കുന്ന വിവരങ്ങൾ പുറത്തുവരുന്നു. ലണ്ടനിലേക്ക് പോകുകയായിരുന്ന എയർ ഇന്ത്യയുടെ AI171 വിമാനം സർദാർ വല്ലഭായ് പട്ടേൽ അന്താരാഷ്ട്ര വിമാനത്താവളത്തിൽ നിന്ന് പറന്നുയർന്ന് മിനിറ്റുകൾക്കകം മേഘാനിനഗർ പ്രദേശത്ത് തകർന്നുവീഴുകയായിരുന്നു. വിമാനം ജീവന് ഭീഷണിയായ അടിയന്തര മുന്നറിയിപ്പായ 'മെയ്ഡേ' സന്ദേശം നൽകിയിരുന്നതായി ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) സ്ഥിരീകരിച്ചു.

ഇന്ന് ഉച്ചയ്ക്ക് 1.39ന് (08:09 GMT) റൺവേ 23ൽ നിന്ന് പറന്നുയർന്ന വിമാനം, 'മെയ്ഡേ' സന്ദേശം നൽകിയെങ്കിലും തുടർന്ന് എയർ ട്രാഫിക് കൺട്രോളുമായി ബന്ധപ്പെടാൻ കഴിഞ്ഞില്ല. ഫ്ലൈറ്റ്റാഡാർ 24ന്റെ റിപ്പോർട്ട് പ്രകാരം, പറന്നുയർന്ന് നിമിഷങ്ങൾക്കകം വിമാനത്തിൽ നിന്നുള്ള അവസാന സിഗ്നൽ ലഭിച്ചു. അപകട സിഗ്നലിന് ശേഷം വിമാനവുമായുള്ള ആശയവിനിമയം പൂർണമായും നിലച്ചു.

വിമാനം ജനവാസ മേഖലയിലേക്ക് തകർന്നുവീഴുന്നതിന്റെ ദൃശ്യങ്ങൾ ഭീതി പടർത്തുന്നതാണ്. വിമാനത്താവളത്തിന് സമീപം ആകാശത്തേക്ക് കറുത്ത പുക ഉയരുന്നതും, വിമാനത്തിന്റെ ഭാഗങ്ങൾ ഒരു കെട്ടിടത്തിന് മുകളിൽ കുടുങ്ങിക്കിടക്കുന്നതുമായ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നു. മരണസംഖ്യ സംബന്ധിച്ച് ഔദ്യോഗിക സ്ഥിരീകരണം ഇതുവരെ ലഭിച്ചിട്ടില്ല.

പൈലറ്റുമാർ ആരാണ്?

വിമാനം പറത്തിയിരുന്നത് 8,200 മണിക്കൂർ പറക്കൽ പരിചയമുള്ള ക്യാപ്റ്റൻ സുമീത് സബർവാളും 1,100 മണിക്കൂർ പറക്കൽ പരിചയമുള്ള ഫസ്റ്റ് ഓഫീസർ ക്ലൈവ് കുന്ദറുമാണ്.

യാത്രക്കാരുടെ വിവരങ്ങൾ

വിമാനത്തിൽ 169 ഇന്ത്യൻ പൗരന്മാർ, 53 ബ്രിട്ടീഷ് പൗരന്മാർ, ഒരു കനേഡിയൻ, ഏഴ് പോർച്ചുഗീസ് പൗരന്മാർ എന്നിവർ ഉണ്ടായിരുന്നതായി എയർ ഇന്ത്യ വ്യക്തമാക്കി.

രക്ഷാപ്രവർത്തനം

സംഭവസ്ഥലത്തേക്ക് രണ്ട് ഡസൻ ആംബുലൻസുകൾ ഉൾപ്പെടെയുള്ള അടിയന്തര സേവന സംഘങ്ങൾ എത്തി. ലോക്കൽ പൊലീസ് പ്രദേശം വളഞ്ഞ് ഗതാഗതം വഴിതിരിച്ചുവിട്ടു. പരുക്കേറ്റവരെ അടുത്തുള്ള ആശുപത്രികളിലേക്ക് മാറ്റുകയാണ്.

സിവിൽ വ്യോമയാന മന്ത്രി രാം മോഹൻ നായിഡു സ്ഥിതിഗതികൾ നേരിട്ട് നിരീക്ഷിക്കുന്നുണ്ട്. വ്യോമയാന, അടിയന്തര പ്രതികരണ ഏജൻസികൾക്ക് വേഗത്തിലും ഏകോപിതമായും പ്രവർത്തിക്കാൻ നിർദേശം നൽകിയിട്ടുണ്ട്.

എയർ ഇന്ത്യയുടെ പ്രതികരണം

പരുക്കേറ്റവരെ ആശുപത്രികളിലേക്ക് മാറ്റിയിട്ടുണ്ട്. കൂടുതൽ വിവരങ്ങൾക്കായി 1800 5691 444 എന്ന ഹോട്ട്‌ലൈൻ നമ്പർ സജ്ജീകരിച്ചിട്ടുണ്ട്. അന്വേഷണത്തിൽ അധികാരികൾക്ക് പൂർണ സഹകരണം നൽകും," എയർ ഇന്ത്യ പ്രസ്താവനയിൽ അറിയിച്ചു. ദുരന്തത്തിന്റെ കാരണം വ്യക്തമല്ല. അന്വേഷണം ആരംഭിച്ചതായി ഡിജിസിഎ അറിയിച്ചു.