ദോഹ/തൃശൂര്‍:  ഖത്തറില്‍ നിന്നും വിനോദ യാത്രക്കു പോയ സംഘത്തിന്റെ ബസ് മറിഞ്ഞ് മരിച്ച മൂവാറ്റുപുഴ സ്വദേശിനി ജസ്‌നയുടെയും മകള്‍ ഒന്നര വയസ്സുകാരി റൂഹി മെഹ്‌റിന്റെയും മൃതദേഹങ്ങള്‍ ഇന്ന് വൈകീട്ട് വീട്ടില്‍ എത്തിക്കും.

അപകടത്തില്‍ പരുക്കേറ്റ ജസ്‌നയുടെ ഭര്‍ത്താവ് മുഹമ്മദ് ഹനീഫും ഒപ്പമുണ്ടാകും. അസിസ്റ്റന്റ് ഹൈക്കമ്മീഷണര്‍ ഉള്‍പ്പെടെയുള്ള ഉയര്‍ന്ന ഉദ്യോഗസ്ഥര്‍ എത്തിയാണ് നടപടികള്‍ പൂര്‍ത്തിയാക്കിയതെന്ന് ഇടുക്കി എംപി ഡീന്‍ കൂര്യാക്കോസ് അറിയിച്ചു.

കെനിയയിലെ ന്യാന്‍ഡറുവ പ്രവിശ്യയിലാണ് അപകടം നടന്നത്. പ്രദേശികസമയം തിങ്കളാഴ്ച വൈകുന്നേരം ആണ് സംഭവം. അപകടസമയത്ത് 28 വിനോദസഞ്ചാരികളും മൂന്ന് പ്രാദേശിക ഗൈഡുകളും ഒരു ഡ്രൈവറും ആണ് ബസിലുണ്ടായിരുന്നത്.

ALSO READ: കെനിയയിലെ വാഹനാപകടം; മരിച്ചവരില്‍ 5 പേര്‍ മലയാളികള്‍, അപകടത്തില്‍പ്പെട്ടത് ഖത്തറില്‍ നിന്ന് വിനോദ യാത്രക്കുപോയ ഇന്ത്യക്കാരുടെ സംഘം

ന്യാന്‍ഡാരുവ കൗണ്ടിയിലെ ഓള്‍ ജോറോറോക്ക്‌നകുരു റോഡില്‍ ഗിച്ചാക്കയില്‍ വെച്ച് ബസ് കുഴിയിലേക്ക് മറിയുകയായിരുന്നുവെന്നു പൊലിസ് വക്താവ് മൈക്കല്‍ മുചിരി പറഞ്ഞു. ന്യാഹുരുരുവിലെ പനാരി റിസോര്‍ട്ടിലേക്ക് പോകുകയായിരുന്നു സംഘം. മലകളും കുന്നുകളുമുള്ള ഈ ഭാഗത്ത് കുത്തനെയുള്ള റോഡില്‍ വളവ് തിരിയുന്നതിനിടെ ഡ്രൈവര്‍ക്ക് നിയന്ത്രണം നഷ്ടപ്പെട്ടതിനെ തുടര്‍ന്നാണ് അപകടം ഉണ്ടായത്.

മാവോലിക്കര സ്വദേശി ഗീത ഷോജിയുടെ സംസ്‌കാരം നാട്ടില്‍ നടത്തുമെന്ന് മകന്‍ ജോയല്‍ അറിയിച്ചു. പ്രത്യേക പരിചരണം ആവശ്യമുള്ള കുട്ടികള്‍ക്കായി പ്രവര്‍ത്തിക്കുന്ന ഹോപ് ഖത്തര്‍ എന്ന സ്ഥാപനത്തിലെ ടീച്ചറായിരുന്നു ഗീത ഷോജി.

അപകടത്തില്‍ മരിച്ച പാലക്കാട് മണ്ണൂര്‍ സ്വദേശി റിയയുടെയും മകള്‍ ഡൈറയുടെയും മൃതദേഹങ്ങള്‍ നാട്ടിലെത്തിക്കാന്‍ റിയയുടെ സഹോദരന്‍ ഋഷി കെനിയയില്‍ എത്തി. റിയയുടെ ഭര്‍ത്താവും മകനും ചികിത്സയിലാണ്.