ഫുജൈറ: ഫുജൈറയില്‍ ഉണ്ടായ അപകട പരമ്പരയില്‍ 9 പേര്‍ക്ക് പരുക്ക്. ബുധനാഴ്ച വൈകുന്നേരമാണ് അപകടമുണ്ടായത്. 16 കാറുകളും നാല് ട്രക്കുകളും കൂട്ടിയിടിച്ചുണ്ടായ അപകടത്തില്‍ ദിബ്ബ അല്‍ഫുജൈറയിലേക്കുള്ള ഗതാഗതം തടസ്സപ്പെട്ടു. വഈബ് അല്‍ഹിന്നയ്ക്കും ദിബ്ബയ്ക്കും ഇടയിലാണ് അപകടമുണ്ടായത്. ഇതിനെ തുടര്‍ന്ന് റോഡ് പൂര്‍ണ്ണമായും അടച്ചിട്ടിരുന്നു.

ALSO READ: പ്രവാസികളുടെ പ്രത്യേക ശ്രദ്ധയ്ക്ക്, വിദേശത്ത് പോകുന്നത് നാട്ടുകാരെ അറിയിക്കാൻ ബോർഡിംഗ് പാസ് ഫോട്ടോ എടുത്ത് സോഷ്യൽ മീഡിയയിൽ ഇടേണ്ട; മുന്നറിയിപ്പ് നൽകി വിദഗ്ധർ

അടിയന്തര കോള്‍ ലഭിച്ചയുടനെ, ദിബ്ബ അല്‍ഫുജൈറയില്‍ നിന്നുള്ള പൊലിസ് പട്രോളിംഗ് സംഘവും ട്രാഫിക് ഓഫീസര്‍മാരും മസാഫി പൊലിസ് സ്റ്റേഷനില്‍ നിന്നുള്ള സംഘവും നാഷണല്‍ ആംബുലന്‍സ് ജീവനക്കാരും സ്ഥലത്തെത്തി. പൊലിസ് സംഘം പരുക്കേറ്റവരെ സഹായിക്കുകയും ഗതാഗതം ക്രമീകരിക്കുകയും ചെയ്തു. 

അപകടത്തില്‍ ഒമ്പത് പേര്‍ക്ക് പരുക്കേറ്റു. എട്ട് പേര്‍ക്ക് നിസ്സാര പരുക്കുകളേറ്റതായാണ് വിവരം. എല്ലാവരെയും ചികിത്സയ്ക്കായി വിവധ ആശുപത്രികളില്‍ പ്രവേശിപ്പിച്ചു. 

പ്രാഥമിക അന്വേഷണത്തില്‍ ഒരു കാറിന് തീപിടിച്ചതിനെ തുടര്‍ന്ന് മറ്റ് വാഹനങ്ങള്‍ വേഗത കുറച്ചതാണ് അപകടത്തിന് കാരണമായതെന്ന് കണ്ടെത്തി. തുടര്‍ന്ന് വേഗതയില്‍ വന്ന ഒരു ട്രക്ക് വേഗത കുറച്ച വാഹനങ്ങളില്‍ ഇടിക്കുകയായിരുന്നു.

അപകടത്തിന്റെ കാരണമെന്താണെന്ന് കണ്ടെത്താന്‍ പൊലിസ് വിശദമായ അന്വേഷണം ആരംഭിച്ചിട്ടുണ്ട്. ഡ്രൈവര്‍മാര്‍ വാഹനങ്ങള്‍ക്കിടയില്‍ മതിയായ സുരക്ഷിത അകലം പാലിച്ചിരില്ലെന്ന് സൂചനയുണ്ട്.

ALSO READ: UAE Job Alert: ദുബൈയിൽ ആറു ലക്ഷം രൂപയ്ക്ക് മുകളിൽ ശമ്പളമുള്ള പ്രവാസികൾക്ക് അപേക്ഷിക്കാവുന്ന 10 സർക്കാർ ജോലികൾ; അപേക്ഷിക്കേണ്ട വിധം ഇങ്ങനെ

എല്ലാ ഡ്രൈവര്‍മാരും ജാഗ്രത പാലിക്കാനും വേഗത പരിധികള്‍ പാലിക്കാനും മുന്നിലുള്ള വാഹനത്തില്‍ നിന്ന് എപ്പോഴും സുരക്ഷിതമായ അകലം പാലിക്കാനും ഫുജൈറ പൊലിസ് ജനറല്‍ കമാന്‍ഡ് ഓര്‍മ്മിപ്പിച്ചു. 

A massive traffic accident in Fujairah involving 20 vehicles has left 9 people injured. Authorities are investigating the cause as emergency services respond to the scene.