ആളുകള്‍ക്ക് പലതരം ഹോബിയാണ്. ചിലര്‍ക്ക് പൂന്തോട്ട പരിപാലനത്തിലാവാം താല്‍പര്യമുണ്ടാവുക. എന്നാല്‍ അവര്‍ സസ്യങ്ങളുടെ പരിചരണത്തില്‍ അത്ര ശ്രദ്ധ കൊടുക്കാറില്ല. അതിന്റെ ഫലമായി ചെടി ക്രമേണ നശിക്കാന്‍ തുടങ്ങുന്നു. ചെടിയുടെ ഇലകള്‍ നോക്കിയാല്‍ തന്നെ ചെടിക്ക് എന്താണ് വേണ്ടതെന്ന് നിങ്ങള്‍ക്കു മനസിലാക്കാം. 

ചെടികളില്‍ ഉണങ്ങിയ ഇലകളുണ്ടാവാം. വാടിയ ഇലകളുമുണ്ടാവാം. നിങ്ങളുടെ ചെടിയിലെ ഇല പൂര്‍ണമായും ഉണങ്ങി പപ്പടം പോലെ ആയിട്ടുണ്ടെങ്കില്‍ വെള്ളത്തിന്റെ കുറവു കൊണ്ടാണ് ഇങ്ങനെ സംഭവിച്ചിരിക്കുന്നത് എന്നു മനസിലാക്കുക. അതുകൊണ്ട് തന്നെ ചെടിക്ക് ദിനേന നനയ്‌ക്കേണ്ടതുണ്ട്. 

ഇലകളുടെ നിറം മങ്ങുകയും അവയുടെ നിറം ഇളം മഞ്ഞയായി കാണപ്പെടുകയും ചെയ്യുന്നുണ്ടെങ്കില്‍ നിങ്ങള്‍ ചെടികള്‍ക്ക് ആവശ്യമുള്ളതിനേക്കാള്‍ കൂടുതല്‍ വെള്ളമാണ് നല്‍കുന്നത് എന്നു മനസിലാക്കുക. ചെടികളില്‍ അമിതമായി നനവുണ്ടാവാന്‍ പാടില്ല. അതിനു വേണ്ടി വെള്ളം കോരി ഒഴിക്കാതെ മണ്ണ് ഉണങ്ങുമ്പോള്‍ മാത്രമേ വെള്ളം ഒഴിക്കാവു. 

ചിലി ചെടിയുടെ ഇലകള്‍ വശങ്ങളില്‍ നിന്ന് മഞ്ഞനിറമായി വരുന്നത് കണ്ടിട്ടില്ലേ. ഇത് സൂര്യപ്രകാശം കൂടുതല്‍ ലഭിക്കുന്നത് കൊണ്ടാണ്. ഇങ്ങനെ വരുമ്പോള്‍ അത്രയും സൂര്യപ്രകാശമില്ലാത്ത സ്ഥലത്തേക്ക് ചെടി വയ്ക്കാന്‍ ശ്രമിക്കുക. വെളിച്ചത്തിനു കുറവുണ്ടാവുകയും ചെയ്യരുത്. 

വളം കുറഞ്ഞാല്‍ ചെടിയുടെ ഇലകള്‍ക്ക് പഴയതു പോലെ തിളക്കമുണ്ടാവില്ല. ഇതിനുവേണ്ടി നിങ്ങള്‍ക്ക് ചാണകവളം ഉപയോഗിക്കാവുന്നതാണ്. 

ഇലകളില്‍ ചുളിവുകള്‍ വീണിട്ടുണ്ടെങ്കില്‍ അത് സൂര്യപ്രകാശത്തിന്റെ കുറവു മൂലമാവാം. ചെടിയുടെ സ്ഥാനം മാറ്റി സൂര്യപ്രകാശം ലഭിക്കുന്ന സ്ഥലത്തേക്ക് ചെടി മാറ്റി വയ്ക്കുകയാണ് ഇതിനുള്ള പരിഹാരം.