ന്യൂഡൽഹി: ദേശീയപാത 66-ലെ നിർമാണ പാളിച്ചകൾക്ക് ഉത്തരവാദികളായ കരാറുകാർക്കെതിരെ കർശന നടപടിയുമായി കേന്ദ്ര ഉപരിതല ഗതാഗത മന്ത്രി നിതിൻ ഗഡ്കരി. കരാറുകാരായ കെഎൻആർ കൺസ്ട്രക്ഷൻസിനെയും കൺസൾട്ടന്റായ ഹൈവേ എൻജിനീയറിങ് കൺസൾട്ടന്റിനെയും (എച്ച്ഇസി) രണ്ടുവർഷത്തേക്ക് ഡീബാർ ചെയ്തതായി മന്ത്രി അറിയിച്ചു. റോഡ് പുതുക്കിപ്പണിയുന്നതിനുള്ള മുഴുവൻ ചിലവും കരാറുകാരിൽ നിന്ന് ഈടാക്കുമെന്നും 85 കോടി രൂപയുടെ അധിക നിർമാണം കമ്പനി നടത്തണമെന്നും ഗഡ്കരി വ്യക്തമാക്കി.

മേയ് 19-ന് എൻഎച്ച് 66-ന്റെ കൂരിയാട് മേഖലയിൽ റോഡിന്റെ ചില ഭാഗങ്ങൾ ഇടിഞ്ഞ് സർവീസ് റോഡിലേക്ക് വീഴുകയും സർവീസ് റോഡ് തകരുകയും ചെയ്തിരുന്നു. ഇതേത്തുടർന്ന് ദേശീയപാത അതോറിറ്റിയുടെ രണ്ടംഗ സംഘം നടത്തിയ പരിശോധനയിൽ കരാർ കമ്പനിയുടെ വീഴ്ച വ്യക്തമായിരുന്നു. തുടർന്നാണ് കമ്പനിയെ ഡീബാർ ചെയ്യാനുള്ള തീരുമാനം. വിഷയത്തിൽ യാതൊരു വിട്ടുവീഴ്ചയും ഉണ്ടാകില്ലെന്നും കർശന നടപടി തുടരുമെന്നും മന്ത്രി പറഞ്ഞു.

സംഭവവുമായി ബന്ധപ്പെട്ട് കൊച്ചിയിലെ പ്രോജക്ട് ഡയറക്ടറെ സസ്‌പെൻഡ് ചെയ്യുകയും സൈറ്റ് എൻജിനിയറെ പിരിച്ചുവിടുകയും ചെയ്തു. സംസ്ഥാനത്തിന്റെ വിവിധ ഭാഗങ്ങളിൽ ദേശീയപാത നിർമാണത്തിൽ സമാനമായ പ്രശ്നങ്ങൾ ഉയർന്നുവന്നിരുന്നു. ഇക്കാര്യം മുഖ്യമന്ത്രി പിണറായി വിജയൻ നേരിട്ട് നിതിൻ ഗഡ്കരിയെ അറിയിക്കുകയും കർശന നടപടിക്ക് ഉറപ്പ് ലഭിക്കുകയും ചെയ്തതായി മുഖ്യമന്ത്രി മാധ്യമങ്ങളോട് വ്യക്തമാക്കി.