തിരൂർ: പ്രവാസികൾക്കായി സർക്കാർ രൂപീകരിച്ച പ്രവാസി ക്ഷേമനിധി ബോർഡിൽ പെൻഷൻ അപേക്ഷകൾ കെട്ടിക്കിടക്കുന്നു. പ്രവാസി ക്ഷേമനിധിയിലേക്ക് പെൻഷന് അപേക്ഷിച്ച 60 വയസ്സ് കഴിഞ്ഞവർ ആറുമാസവും അതിലധികവുമായി  കാത്തിരിക്കുകയാണ്. പ്രവാസി ക്ഷേമനിധിയിലേക്ക് മാസംതോറും അംശാദായം അടച്ച്, അഞ്ചു വർഷങ്ങൾക്ക് ശേഷം 60 വയസ്സ് കഴിഞ്ഞവർ പെൻഷന് അപേക്ഷിക്കുമ്പോഴാണ് ഈ കാലതാമസം നേരിടുന്നത്. കോഴിക്കോട് മാത്രം 2000ൽപരം അപേക്ഷകളാണ് കെട്ടിക്കിടക്കുന്നത്. പ്രവാസികൾ  350 രൂപയും കേരളത്തിലേക്ക് തിരിച്ചെത്തിയവർ 200 രൂപയുമാണ് ക്ഷേമനിധിയിലേക്ക് അടയ്ക്കുന്നത്.  അംശാദായം അടയ്ക്കലും പെൻഷൻ അപേക്ഷയുമെല്ലാം സർക്കാർ ഓൺലൈൻ ആക്കിയിട്ടുണ്ടെങ്കിലും തിരിച്ച് സർക്കാരിൽ നിന്നും കിട്ടേണ്ട ആനുകൂല്യങ്ങൾ ആ തരത്തിൽ ലഭിക്കുന്നില്ലെന്ന് വ്യാപകമായ പരാതിയുണ്ട്. ജീവനക്കാരുടെ കുറവും അപേക്ഷകളുടെ ആധിക്യവുമാണ് ഇതിന് കാരണമെന്നാണ് മറുപടി. കഴിഞ്ഞ അഞ്ചുവർഷമായി കേരള പ്രവാസി ക്ഷേമനിധിയിലെ അംഗസംഖ്യ 8 ലക്ഷത്തിലധികമായി വർധിച്ചിട്ടുണ്ട്. ഇതിൽ 60000ൽ പരം ആളുകളാണ് പെൻഷന് അർഹത നേടിയിട്ടുള്ളത്.

വിദേശ ഇന്ത്യക്കാർക്ക്  3500 രൂപയും മടങ്ങി എത്തിയവർക്കും കേരളത്തിന് പുറത്ത് രാജ്യത്ത് തന്നെ ഉള്ളവർക്കും 3000 രൂപയുമാണ് നിലവിൽ പെൻഷനായി നൽകിവരുന്നത്.

അഞ്ചു വർഷങ്ങൾക്കു മുമ്പ് വളരെ കുറച്ചാളുകൾ ഉണ്ടായിരുന്ന സമയത്തുള്ള ഓഫിസ് സംവിധാനവും ഉദ്യോഗസ്ഥ സംവിധാനവുമാണ് നിലവിലുള്ളത് എന്നാണ് ഉദ്യോഗസ്ഥന്മാർ പറയുന്നത്. മാത്രമല്ല, പെൻഷൻകാർ വർധിച്ചതോടെ ഫണ്ട് കണ്ടെത്താനും വകുപ്പ് പ്രയാസപ്പെട്ടു കൊണ്ടിരിക്കുകയാണ്. ഫണ്ടിന്റെ അഭാവമാണ് അപേക്ഷകൾ പിടിച്ചുവയ്ക്കാൻ കാരണമെന്നും ചൂണ്ടിക്കാട്ടുന്നുണ്ട്.