ആലപ്പുഴ: കാലവർഷക്കെടുതിയിലായ സംസ്ഥാനത്തെ കർഷകർക്ക് തിരിച്ചടിയായി  നെൽവിത്ത് ക്ഷാമം. ശക്തമായ മഴ സൃഷ്ടിച്ച പ്രതിസന്ധിയിക്കിടയിലും രണ്ടാംകൃഷിക്കുള്ള തയാറെടുപ്പിലാണ് കർഷകർ. കൃഷി ഒരുക്കങ്ങൾ അന്തിമഘട്ടത്തിലായിട്ടും വിത്ത് എത്തിയിട്ടില്ലെന്നാണ് പരാതി. ഇതോടെ കിലോയ്ക്ക് 44 രൂപയ്ക്കു ലഭിച്ചിരുന്ന വിത്തിന് 50 രൂപക്ക് മുകളിൽ  ഉയർന്നു.
  രണ്ടാംകൃഷി ചെയ്യുന്ന പാടങ്ങളിലെ കർഷകർക്കായി സീഡ് അതോറിറ്റി വഴിയാണ് വിത്ത് ലഭ്യമാക്കേണ്ടത്. കർഷകരിൽനിന്നു സംഭരിച്ച് സംസ്‌കരിച്ച വിത്തുകൾ സീഡ് അതോറിറ്റിയുടെ കൈവശമുണ്ടെങ്കിലും ഇതു വരെ വിതരണം തുടങ്ങിയിട്ടില്ല.

കരാറുകാരുമായുള്ള  പഴയ കുടിശ്ശികത്തുകയുടെ  തർക്കത്തിന്റെ പേരിലാണ് വിത്ത് തടഞ്ഞു വച്ചിരിക്കുന്നത്. 
വിത്തുവിതരണം കരാറെടുത്തിരുന്ന ട്രാൻസ്‌പോർട്ടിങ് ഏജൻസി കോടതിയെ സമീപിച്ച് വിത്തുവിതരണത്തിന് സ്റ്റേ വാങ്ങി.വിത്ത് ദൗർലഭ്യം രൂക്ഷമായതോടെ കുട്ടനാട്ടിൽ ഉൾപ്പടെ വിത്തിന്   സ്വാകാര്യ ഏജൻസികൾ വിലയും കൂട്ടി.

  ഈ മാസം ആദ്യവാരമാണ് രണ്ടാംകൃഷിയുടെ വിത സാധാരണ  തുടങ്ങുന്നത്. എന്നാൽ അപ്രതീക്ഷിതമായ കാലവർഷവും കിഴക്കൻവെള്ളത്തിന്റെ വരവും കാരണം ബണ്ടുകൾ തകരുകയും  പാടങ്ങൾ വെള്ളത്തിൽ മുങ്ങുകയും ചെയ്തു. ഇതോടെ കൃഷി  ഒരുക്കങ്ങൾ  മഴയിൽ മുങ്ങുകയായിരുന്നു. ഒരു ഹെക്ടറിന് 100 കിലോയെന്ന ക്രമത്തിൽ 10 ലക്ഷം കിലോ നെൽവിത്താണ് കുട്ടനാട്ടിലേക്ക്  മാത്രം വേണ്ടത്. മഴക്കെടുതിക്കൊപ്പം വിത്ത് ക്ഷാമം കൂടിയായതോടെ പല കർഷകരും കൃഷി ഉപേക്ഷിക്കുമെന്നാണ് പറയുന്നത്.