തിരുവനന്തപുരം: സെക്രട്ടറിയേറ്റിലെ പട്ടികജാതി വിഭാഗത്തിൽപ്പെട്ട ഉദ്യോഗസ്ഥ സ്ഥലംമാറിയപ്പോൾ ശുദ്ധികലശം നടത്തിയതായി പരാതി. ഭരണപരിഷ്‌കാര അഡ്‌മിനിസ്‌ട്രേറ്റീവ് വിജിലൻസ് സെല്ലിൽ ഓഫീസ് അറ്റൻഡറായിരുന്ന ജീവനക്കാരിയെ അധിക്ഷേപിച്ചെന്നാണ് പരാതി. സംഭവത്തിൽ ജാതീയമായി അധിക്ഷേപിച്ചെന്ന് കാട്ടി കോന്നി സ്വദേശിനി സെക്രട്ടറിയേറ്റ് അസിസ്റ്റന്റ്  ആയ ഉദ്യോഗസ്ഥനെതിരെ പരാതി നൽകി. 

എസ്.സി. എസ്.ടി കമ്മീഷനിലാണ് ഉദ്യോഗസ്ഥ പരാതി നൽകിയത്. ജീവനക്കാരി ഉപയോഗിച്ച സാധനങ്ങൾ ആരോപണ വിധേയൻ മാറ്റിയെന്നും പരാതിയിലുണ്ട്. ഇയാൾ സെക്രട്ടറിയേറ്റ് അസോസിയേഷൻ നേതാവാണ്. സംഭവത്തിൽ 20 ദിവസത്തിനകം റിപ്പോർട്ട് നൽകണമെന്ന് എസ്.സി. എസ്.ടി കമ്മീഷൻ പൊതുഭരണവകുപ്പിന് നിർദേശം നൽകി. കന്റോൺമെന്റ് പൊലിസിനും പരാതി നൽകിയിട്ടുണ്ട്.

ഏപ്രിൽ ഒന്നിനാണ് യുവതിയ്ക്ക് സ്ഥലം മാറ്റം ലഭിച്ചത്. താൻ സ്ഥലം മാറി പോകുന്നതിന് മുൻപുവരെ എതിർകകക്ഷി തന്നോട് ദേഷ്യത്തിലാണ് പെരുമാറിയിരുന്നതെന്നും തസ്‌തിക വ്യത്യാസമാണ് ഇതിന് കാരണമെന്നാണ് കരുതിയിരുന്നതെന്നും പരാതിയിൽ പറയുന്നു. എന്നാൽ, മറന്നുവച്ച ബാഗ് എടുക്കാൻ പഴയ ഓഫീസിലേയ്ക്ക് പോയ സമയത്താണ് എതിർകകക്ഷി ശുദ്ധികലശം നടത്തിയതായി പറഞ്ഞത് കേട്ടുവെന്നും പരാതിയിൽ വ്യക്തമാക്കുന്നു. താനുപയോഗിച്ച മേശയും കസേരയും നീക്കം ചെയ്ത് സെക്രട്ടറിയേറ്റ് അസിസ്റ്റന്റ് അവിടെ ശുദ്ധികലശം നടത്തി എന്നാണ് മെയ് 30 ന് നൽകിയ പരാതിയിൽ പറയുന്നത്.

അതേസമയം, പരാതിയിൽ പറയുന്നത് പോലൊരു സംഭവം സെക്രട്ടറിയേറ്റിൽ നടന്നിട്ടില്ലെന്ന് ആരോപണ വിധേയൻ വ്യക്തമാക്കി. മാനനഷ്ടത്തിന് കേസ് കൊടുക്കുമെന്നും താൻ ഒരിക്കലും ഒരാളെയും വ്യക്തിപരമായി അധിക്ഷേപിക്കുന്ന ആളല്ലെന്നും ഇയാൾ അറിയിച്ചു.