മലപ്പുറം:  പുതു തലമുറയെ വാർത്തെടുക്കാൻ സംവിധാനങ്ങളേറെയുണ്ടായിട്ടും മതിയായ സൗകര്യങ്ങളില്ലാതെ സംസ്ഥാനത്തെ അങ്കണവാടികൾ. ഇന്റഗ്രേറ്റഡ് ചൈൽഡ് ഡെവലപ്‌മെന്റ് സർവിസ് സ്‌കീം (ഐ.സി.ഡി.എസ്)ന് കീഴിൽ പ്രവർത്തിക്കുന്ന അങ്കണവാടികളാണ് ഇത്തരത്തിൽ ഒറ്റമുറി വാടകക്കെട്ടിടത്തിലും മറ്റുമായി പരിമിതികളാൽ വീർപ്പുമുട്ടുന്നത്. സംസ്ഥാനത്ത് ആകെയുള്ള 33,120 അങ്കണവാടികളിൽ 8,650 എണ്ണത്തിനും സ്വന്തമായി കെട്ടിടമില്ല. 7,072 അങ്കണവാടികൾ ഇപ്പോഴും പ്രവർത്തിക്കുന്നത് വാടകക്കെട്ടിടത്തിലാണ്. 1,578 എണ്ണം വാടക രഹിത കെട്ടിടത്തിലും പ്രവർത്തിക്കുന്നു.

സ്വന്തമായി കെട്ടിടമില്ലാത്ത അങ്കണവാടികൾ ഏറ്റവും കൂടുതലുള്ളത് തിരുവനന്തപുരത്താണ്. വാടക്കെട്ടിടത്തിലുള്ള 1,057 എണ്ണമുൾപ്പെടെ കെട്ടിടമില്ലാത്ത 1,157 അങ്കണവാടികൾ ഇവിടെയുണ്ട്. ആലപ്പുഴ(942), കൊല്ലം(820), മലപ്പുറം(697), എറണാംകുളം(677) തുടങ്ങിയ ജില്ലകളിലെല്ലാം ഇത്തരത്തിലുള്ള അങ്കണവാടികൾ എണ്ണത്തിൽ കൂടുതലുണ്ട്. ഏറ്റവും കുറവുള്ളത് വയനാട്ടിലാണ്. ആകെയുള്ള 876ൽ 70 എണ്ണം മാത്രമേ ഇവിടെ വാടകക്കെട്ടിടത്തിൽ പ്രവർത്തിക്കുന്നുള്ളൂ. കെട്ടിടം നിർമിക്കാൻ സ്ഥലം വാങ്ങാൻ ഫണ്ട് ലഭ്യമാവില്ലെന്നതാണ് വാടകകെട്ടിടത്തിലുള്ള അങ്കണവാടികൾ നേരിടുന്ന വെല്ലുവിളി. മൂന്ന് സെന്റ് സ്ഥലം വിട്ടു നൽകിയാൽ അതിൽ കെട്ടിടം നിർമിക്കാൻ സർക്കാരിന്റെയും, തദ്ദേശ സ്ഥാപനങ്ങളുടെയുമെല്ലാം ഫണ്ടുകൾ ലഭിക്കും. സ്ഥലം വാങ്ങാൻ ഫണ്ട് അനുവദിക്കാൻ വകുപ്പില്ലെങ്കിലും അപൂർവമായി വാല്യുവേഷനും മറ്റും നടത്തി കുറഞ്ഞ തുക അനുവദിക്കാറുണ്ട്. പക്ഷേ നാമ മാത്രമായ ഈ തുക പലപ്പോഴും ഒരു സെന്റ് സ്ഥലം വാങ്ങിക്കാൻ പോലും തികയാറില്ല.

നാട്ടുകാരുടെയും സുമനസുകളുടെയും കാരുണ്യം കൊണ്ടാണ് മിക്ക അങ്കണവാടികളും സ്വന്തം കെട്ടിടത്തിലേക്ക് ചേക്കേറിയത്. 
ചെറുപ്രായത്തിൽ വിദ്യാർഥികളുടെ വ്യക്തിത്വ വികാസത്തിനും പോഷകാഹാരം ലഭ്യമാക്കിയുള്ള ആരോഗ്യ സംരക്ഷണത്തിനും പലപ്പോഴും വാടകയിൽ പ്രവർത്തിക്കുന്ന ഒറ്റമുറി കെട്ടിടങ്ങൾ വിലങ്ങു തടിയാവാറുണ്ട്. കുട്ടികൾക്ക് കളിക്കാൻ ആവശ്യമായ സ്ഥലമില്ലെന്നതും ആഹാര സാധനങ്ങൾ സൂക്ഷിക്കാൻ സൗകര്യമില്ലെന്നതും ഇവർ നേരിടുന്ന വെല്ലുവിളികളാണ്. കെട്ടിടത്തിനായി സ്ഥലം കണ്ടെത്താൻ ഫണ്ട് അനുവദിക്കാനാവില്ലെന്ന സാങ്കേതിക തടസം നീക്കിയാൽ മാത്രമേ ഇവർക്ക് സ്വന്തം കെട്ടിടമെന്ന സ്വപ്നം പൂവണിയൂ.