ദുബൈ: കുവൈത്തിലെ ജഹ്റ ഗവർണറേറ്റിലെ ഖസർ പ്രദേശത്തുള്ള പെട്രോൾ പമ്പിൽ ഒരു വാഹനത്തിൽ ഉണ്ടായ തീപിടിത്തം ഗുരുതരമായ അപകടമാകുന്നത് പെട്രോൾ പമ്പ് ജീവനക്കാരുടെ വേഗത്തിലുള്ള ഇടപെടലും സമചിത്തതയും കാരണം ഒഴിവായി.

ഇന്ധനം നിറയ്ക്കുന്നതിനിടെ പമ്പിനടുത്ത് നിർത്തിയിട്ടിരുന്ന ഒരു കാറിൽ തീ ആളിപ്പടരുകയായിരുന്നു. വാഹനത്തിന്റെ എൻജിന് സമീപം തീ പിടിച്ചപ്പോൾ, ഫ്യൂവൽ നോസൽ കാറിന്റെ ടാങ്കിൽ പിടിച്ചിരുന്ന ഡ്രൈവർ ആകെ പരിഭ്രാന്തനായി. അയാൾ നോസൽ വലിച്ചെടുത്തെങ്കിലും തീ ആളിക്കത്തി. എന്നാൽ, സംഭവം രൂക്ഷമാകുന്നതിന് മുമ്പേ ജീവനക്കാർ ഇടപെട്ടു.

🔻تمكن مجموعة من موظفي محطة وقود بالجهراء الكويتية بتصرف سليم بإبعاد سيارة نشب فيها حريق أثناء تزودها بالوقود و مباشرتهم بإخماد الحريق في زمن قياسي،حيث وصلت فرقة الإطفاء خلال دقائق من الحادثة. pic.twitter.com/pfsRLboDK3

— الفخامة (@FFK1100) June 11, 2025

ഒരു ജീവനക്കാരൻ ഫയർ എക്സ്ടിൻ​ഗ്യുഷർ ഉപയോഗിച്ച് എൻജിനിൽ നിന്ന് ഉയർന്ന തീ കെടുത്തി. അതിനിടെ, മറ്റൊരു ജീവനക്കാരൻ വാഹനത്തിന്റെ ഡ്രൈവർ സീറ്റിൽ കയറി, സഹപ്രവർത്തകരുടെ സഹായത്തോടെ കത്തുന്ന വാഹനത്തെ ഇന്ധനടാങ്കുകളിൽ നിന്ന് തള്ളിനീക്കി.

എന്നാൽ, വാഹനത്തിന് വീണ്ടും തീപിടിച്ചു. മിനിറ്റുകൾക്കകം സ്ഥലത്തെത്തിയ കുവൈത്ത് ഫയർ ഫോഴ്‌സ്  തീ പൂർണമായും അണച്ച് പ്രദേശം സുരക്ഷിതമാക്കി. ആർക്കും പരുക്കുകൾ റിപ്പോർട്ട് ചെയ്യപ്പെട്ടിട്ടില്ല. പെട്രോൾ പമ്പ് ജീവനക്കാരുടെയും, ഫയർഫോഴ്സിന്റെയും പ്രവർത്തനം വലിയ അപകടം ഒഴിവാക്കുകയും, കേടുപാടുകൾ വാഹനത്തിൽ മാത്രമായി ഒതുക്കുകയും ചെയ്തു.

Alert employees at a Kuwait gas station prevented a potential catastrophe when a vehicle suddenly caught fire during refueling in Jahra Governorate. Their swift action and composure helped contain the blaze before it could escalate, showcasing remarkable emergency preparedness. No injuries were reported in the incident.