ചെവിയില്‍ അഴുക്ക് അടിഞ്ഞുകൂടിയാല്‍ പ്രശ്‌നങ്ങള്‍ ഉണ്ടാകാന്‍ തുടങ്ങും. ഇതുകാരണം ചെവി വേദനയും കേള്‍വി പ്രശ്‌നങ്ങളും ഉണ്ടാകുന്നു. ചെവിയിലെ അഴുക്ക് അല്ലെങ്കില്‍ മെഴുക് ചെവിയെ അണുബാധയില്‍ നിന്ന് സംരക്ഷിക്കാന്‍ നമ്മുടെ ശരീരം ഉത്പാദിപ്പിക്കുന്ന ഒരു പ്രകൃതിദത്ത വസ്തു തന്നെയാണ്.

ഇത് പൊടി, മണ്ണ്, ബാക്ടീരിയ എന്നിവ ചെവിയില്‍ പ്രവേശിക്കുന്നത് തടയുന്നു. ചിലപ്പോള്‍ മെഴുക് അമിതമായി ഉത്പാദിപ്പിക്കപ്പെടുകയും ചെവിയില്‍ അടിഞ്ഞുകൂടുകയും ചെയ്യുമ്പോള്‍ പ്രശ്‌നങ്ങള്‍ ഉണ്ടാവുന്നു. ഇത് കേള്‍വി തകരാറുകള്‍, ചൊറിച്ചില്‍, വേദന എന്നിവയ്ക്കു കാരണമാകുന്നു. അതുകൊണ്ട് തന്നെ ഇടയ്ക്കിടെ ഇത് വൃത്തിയാക്കേണ്ടതും പ്രധാനമാണ്. 

ചെവി വൃത്തിയാക്കാനുള്ള എളുപ്പവഴികള്‍ എന്തൊക്കെയാണെന്നു നോക്കാം

ഇയര്‍വാക്‌സ് വൃത്തിയാക്കാന്‍ കടുക് എണ്ണ ഉപയോഗപ്രദമാണ്. ഇത് ചെറുതായി ചൂടാക്കി കുറച്ച് തുള്ളി ചെവിയില്‍ ഉറ്റിക്കാം. എണ്ണ മെഴുക് മൃദുവാക്കുന്നതിനാല്‍ മിനിറ്റുകള്‍ക്കുള്ളില്‍ തന്നെ അത് പുറത്തു വരുകയും ചെയ്യും. ഈ രീതി ചെവി വൃത്തിയാക്കുക മാത്രമല്ല, അണുബാധയില്‍ നിന്ന് ചെവിയെ സംരക്ഷിക്കുകയും ചെയ്യുന്നു.

ശ്രദ്ധിക്കുക, എണ്ണയ്ക്ക് നേരിയ ചൂടേ പാടുള്ളൂ. അല്ലാത്തപക്ഷം ചെവി പൊള്ളിപ്പോവും. ചെവിയില്‍ അടിഞ്ഞുകൂടിയിരിക്കുന്ന ഈ മെഴുക് അലിയിക്കാന്‍ വെളിച്ചെണ്ണയും മികച്ചതാണ്. ഇതിന് ആന്റി ബാക്ടീരിയല്‍ ഗുണങ്ങളുള്ളതു കൊണ്ട് തന്നെ ഇത് ചെവി വൃത്തിയാക്കുന്നതിനൊപ്പം അണുബാധയില്‍ നിന്ന് ചെവിയെ സംരക്ഷിക്കുകയും ചെയ്യുന്നു.

അര ടീസ്പൂണ്‍ ഇളം ചൂടുള്ള വെളിച്ചെണ്ണ ചെവിയിലേക്കൊഴിച്ച് തല ആ വശത്തേക്ക് ചരിച്ച് പിടിക്കുക. തുടര്‍ന്ന് ചെവി മൃദുവായി വൃത്തിയാക്കുക. ഇത് സുരക്ഷിതവും ഫലപ്രദവുമാണ്.

ചെവിയില്‍ അടിഞ്ഞുകൂടിയ അഴുക്ക് നീക്കം ചെയ്യാന്‍ മറ്റൊന്ന് ചെറുചൂടുള്ള വെള്ളവും വെളുത്ത വിനാഗിരിയും കലര്‍ന്ന മിശ്രിതമാണ്. ഒരു ടീസ്പൂണ്‍ വിനാഗിരിയും രണ്ട് ടീസ്പൂണ്‍ ഇളം ചൂടുള്ള വെള്ളവും മിക്‌സ് ചെയ്ത് വൃത്തിയുള്ള ഒരു ഡ്രോപ്പര്‍ ഉപയോഗിച്ച് ചെവിയില്‍ ഉറ്റിക്കുക.

ഇതിലെ വിനാഗിരി മെഴുക് അലിയിക്കാന്‍ സഹായിക്കും. ഇളം ചൂടുവെള്ളം ചെവിക്ക് ആശ്വാസം നല്‍കുന്നതാണ്. കുറച്ച് സമയത്തിന് ശേഷം തല ചരിച്ച് വെള്ളം പുറത്തു കളയാന്‍ അനുവദിക്കുക.

ചെവി വൃത്തിയാക്കാന്‍ നേരിയ ചൂടുവെള്ളം നിറച്ച ഒരു സ്‌പ്രേയും ഉപയോഗിക്കാം. ഇത് ചെവിക്കുള്ളിലെ അഴുക്ക് മൃദുവാക്കുകയും അത് പുറത്തുകൊണ്ടുവരുകയും ചെയ്യുന്നു.

നിങ്ങളുടെ ഡോക്ടറുമായി സംസാരിച്ച ശേഷം നിങ്ങള്‍ക്ക് ഈ രീതി ഉപയോഗിക്കാവുന്നതാണ്. എന്തെങ്കിലും സാധനം ചെവിക്കുള്ളിലിട്ട് വൃത്തിയാക്കുന്നത് അപകടമാണ്. അതിനാല്‍ സുരക്ഷിതമായ രീതിയില്‍ മാത്രമേ ചെയ്യാവൂ.

ചെവി വൃത്തിയാക്കുമ്പോള്‍ അതീവ ജാഗ്രത വേണം. മൂര്‍ച്ചയുള്ളതോ കട്ടിയുള്ളതോ ആയ ഒന്നും ചെവിയില്‍ ഇടുന്നത് മരണത്തിന് തന്നെ കാരണമായേക്കാം. ചെവിയില്‍ കടുത്ത വേദന, മരവിപ്പ് അല്ലെങ്കില്‍ കേള്‍വിക്കുറവ് എന്നിവ ഉണ്ടായാല്‍ ഉടന്‍ തന്നെ ഒരു ഡോക്ടറെ കാണുക.

ചെവിയില്‍ അണുബാധയോ പരിക്കോ ഇല്ലെങ്കില്‍ മാത്രമേ വീട്ടുവൈദ്യങ്ങള്‍ ഉപയോഗിക്കാവൂ. ശരിയായ രീതിയില്‍ ചെവി വൃത്തിയാക്കുന്നത് ചെവിയെ ആരോഗ്യകരമായി നിലനിര്‍ത്തുകയും കേള്‍വിശക്തി നിലനിര്‍ത്തുകയും ചെയ്യും. വീട്ടില്‍ ചെവികള്‍ വൃത്തിയാക്കുന്നതിനുപകരമായി നിങ്ങള്‍ക്ക് ഒരു ഡോക്ടറെക്കൊണ്ട് തന്നെ വൃത്തിയാക്കാനും കഴിയുന്നതാണ്. അത് വളരെ സുരക്ഷിതവും എളുപ്പവുമായ ഒരു രീതിയാണ്.