കുറച്ച് ദിവസമായി സ്വര്‍ണ വിലയില്‍ ആശ്വാസമായിരുന്നു. ചെറുതെങ്കിലും ഇടിവാണ് കഴിഞ്ഞ ദിവസങ്ങളില്‍ രേഖപ്പെടുത്തിയിരുന്നത്. എന്നാല്‍ ഇന്നിതാ സര്‍വ്വകാല റെക്കോര്‍ഡാണ് സ്വര്‍ണം വിലയില്‍ സൃഷ്ടിച്ചിരിക്കുന്നത്. 70,000ത്തില്‍ താഴെ എത്തിയേക്കാമെന്ന പ്രതീക്ഷയില്‍ 75,000ത്തിനടുത്തെത്തിയിരിക്കുകയാണ് ഒരു പവന്‍ സ്വര്‍ണത്തിന്റെ വില.  

1500 ലേറെ രൂപയാണ് കേരള വിപണിയില്‍ സ്വര്‍ണത്തിന് വര്‍ധിച്ചിട്ടുള്ളത്. 1560. ഇതോടെ 74360 എന്ന എക്കാലത്തേയും ഉയര്‍ന്ന നിരക്കിലേക്ക് എത്തി ഒരു പവന്‍ സ്വര്‍ണത്തിന്റെ വില. 22 കാരറ്റ് സ്വര്‍ണത്തിന്റെ വിലയാണിത്. ഏപ്രില്‍ 22 ന് രേഖപ്പെടുത്തിയ 74320 രൂപയായിരുന്നു ഇതുവരേയുള്ള ഏറ്റവും ഉയര്‍ന്ന നിരക്ക്. ഗ്രാമിന് 196 രൂപയുടെ വര്‍ധനവോടെ ഇന്നലത്തെ നിരക്കായ 9100 ല്‍ നിന്നും 9295 ലേക്കും എത്തി.

ഇന്നത്തെ വില വിവരം 
24 കാരറ്റ്
ഗ്രാമിന് 212 കൂടി 10,140
പവന് 1696 കൂടി 81,120

22 കാരറ്റ്
ഗ്രാമിന് 195 കൂടി 9,295
പവന് 1560 കൂടി 74,360

18 കാരറ്റ്
ഗ്രാമിന് 159 രൂപ കൂടി 7,605
പവന് 1,272 കൂടി 60,840

അന്താരാഷ്ട്ര വിപണിയിലെ കുതിപ്പാണ് കേരള വിപണിയിലും പ്രതിഫലിച്ചിരിക്കുന്നത്. ട്രോയ് ഔണ്‍സിന് ഒറ്റയടിക്ക് 106 ഡോളറില്‍ അധികം ഉയര്‍ന്ന് 3431 എന്ന നിരക്കിലാണ് ഇന്ന് അന്താരാഷ്ട്ര വിപണിയിലെ വില്‍പന. ഈ നിരക്കില്‍ നിന്നും മാറ്റമുണ്ടായാല്‍ കേരളത്തില്‍ ഇന്ന് വൈകീട്ടോടെ സ്വര്‍ണ വിലയിലും വീണ്ടും കുതിപ്പുണ്ടാകാന്‍ സാധ്യതയുണ്ട്.

ഇറാന്‍ തലസ്ഥാനമായ ടെഹ്‌റാന്‍ ലക്ഷ്യമാക്കി ഇസ്‌റാഈല്‍ നടത്തിയ ആക്രമണമാണ് ഇന്നത്തെ കുതിപ്പിന് കാരണമെന്നാണ് വിലയിരുത്തല്‍. ഇസ്‌റാഈല്‍ ആക്രമണം വീണ്ടും യുദ്ധഭീതി ഉയര്‍ത്തിയിരിക്കുകയാണ്. തങ്ങളുടെ ആണവ കേന്ദ്രങ്ങള്‍ അടക്കം ലക്ഷ്യമിട്ട് ഇസ്‌റാഈല്‍ നടത്തിയ ആക്രമണത്തിന് തിരിച്ചടി നല്‍കുമെന്ന് ഇറാന്‍ വ്യക്തമാക്കി കഴിഞ്ഞു. കൂടാതെ ഇസ്‌റാഈലിന് നേരെ ഡ്രോണുകള്‍ അയക്കുകയും ചെയ്തു.  ഇതോടെ ഈ പ്രതിസന്ധി തുടര്‍ന്നുള്ള നാളുകളിലും തുടരുമെന്നാണ് വിലയിരുത്തുന്നത്. ഈ സാഹചര്യത്തില്‍ സുരക്ഷിത നിക്ഷേപം എന്ന നിലക്ക് സ്വര്‍ണത്തെ ആലുകള്‍ കൂടുതല്‍ ആശ്രയിക്കും. ഇതാണ് ആവശ്യം വര്‍ധിപ്പിക്കുകയും വില ഉയരാന്‍ ഇടവരുത്തുകയും ചെയ്യുമെന്നും വിദഗ്ധര്‍ ചൂണ്ടിക്കാട്ടുന്നു.