അഹമ്മദാബാദ്: അഹമ്മദാബാദ് വിമാനദുരന്തത്തില്‍ അനുശോചനമറിയിച്ച് പ്രധാനമന്ത്രി നരേന്ദ്ര മോദി. അപകടത്തില്‍ നടുക്കം രേഖപ്പെടുത്തിയ മോദി, ദുരന്തം ഞങ്ങളെ ഞെട്ടിക്കുകയും, സങ്കടപ്പെടുത്തുകയും ചെയ്‌തെന്ന് എക്‌സില്‍ കുറിച്ചു. മന്ത്രിമാരുമായും, അധികൃതരുമായും നിരന്തരം ബന്ധപ്പെടുകയാണെന്നും സ്ഥിതിഗതികള്‍ വിലയിരുത്തുന്നതായും പ്രധാനമന്ത്രി കുറിച്ചു. 

വ്യോമയാനമന്ത്രി കെ റാം മോഹന്‍ നായിഡുവുമായി പ്രധാനമന്ത്രി സംസാരിച്ചു. സാഹചര്യങ്ങള്‍ വിലയിരുത്തുന്നതായും രക്ഷാപ്രവര്‍ത്തനം ഏകോപിപ്പിക്കുന്നതായും മന്ത്രാലയം അറിയിച്ചു.

ALSO READ: അഹമ്മദാബാദ് വിമാനപടകം; മുന്‍ ഗുജറാത്ത് മുഖ്യമന്ത്രി വിജയ് രൂപാണി കൊല്ലപ്പെട്ടു 

അതേസമയം ഇന്ന് ഉച്ചയോടെയാണ് അഹമ്മദാബാദ് സര്‍ദാര്‍ വല്ലഭായ് പട്ടേല്‍ വിമാനത്താവളത്തിന് സമീപം എയര്‍ഇന്ത്യ വിമാനം തകര്‍ന്ന് വീണത്. ടേക്ക് ഓഫിന് തൊട്ടുപിന്നാലെ വിമാനത്തിന് നിയന്ത്രണം നഷ്ടപ്പെടുകയും, സമീപത്തുണ്ടായിരുന്ന ബിജെ മെഡിക്കല്‍ കോളജ് ഹോസ്റ്റലിന് മുകളില്‍ തകര്‍ന്ന് വീഴുകയുമായിരുന്നു. കുട്ടികള്‍ ഭക്ഷണം കഴിച്ച് കൊണ്ടിരുന്നപ്പോഴാണ് അപകടമുണ്ടായത്. ആകെ 242 യാത്രക്കാരാണ് വിമാനത്തിലുണ്ടായിരുന്നത്.

മരിച്ചവരില്‍ മലയാളിയും 

അഹമ്മദാബാദിൽ വിമാന ദുരന്തത്തിൽ മരിച്ചവരിൽ മലയാളിയും. പത്തനംതിട്ട തിരുവല്ല പുല്ലാട്ട് സ്വദേശിയായ രഞ്ജിത ആർ നായർ ആണ് മരിച്ചത്.  പത്തനംതിട്ട തിരുവല്ല പുല്ലാട്ട് സ്വദേശിയായ യുവതിയുടെ മരണവിവരം ജില്ലാ കളക്ടർ അറിയിച്ചു. ലണ്ടനിൽ നഴ്സായ രജ്‍ഞിത, നാട്ടിൽ സർക്കാർ ജോലി ലഭിച്ചതിനെ തുടർന്ന് തിരുവല്ലയിലെത്തിയിരുന്നു. എന്നാൽ സർക്കാർ ജോലിയിൽ നിന്ന് അവധിയെടുത്ത ശേഷം  ലണ്ടനിലേക്ക് അവധി കഴിഞ്ഞ് മടങ്ങുന്നതിനിടെയാണ് ദാരുണമായ അപകടം സംഭവിച്ചത്.

തിരുവല്ലയിൽ നിന്ന് ഇന്നലെ രഞ്ജിത ട്രെയിനിൽ ചെന്നൈയിലേക്ക് പോയി. തുടർന്ന് അഹമ്മദാബാദ് വഴി ലണ്ടനിലേക്കുള്ള വിമാനത്തിൽ യാത്ര തിരിച്ചു. എന്നാൽ, അഹമ്മദാബാദിൽ നിന്ന് പുറപ്പെട്ട വിമാനം അപകടത്തിൽപ്പെടുകയായിരുന്നു. വിമാനത്തിന്റെ പാസഞ്ചർ ലിസ്റ്റിൽ രഞ്ജിതയുടെ പേര് ഉണ്ടായിരുന്നതായി വിമാന അധികൃതർ ബന്ധുക്കളെ അറിയിച്ചു.