നിലമ്പൂർ: ആർഎസ്എസുമായി സഹകരിച്ചിട്ടുണ്ടെന്ന സിപിഎം സംസ്ഥാന സെക്രട്ടറി എം.വി ഗോവിന്ദൻറെ വെളിപ്പെടുത്തലിൽ പ്രതികരിച്ച് നിലമ്പൂരിലെ യുഡിഎഫ് സ്ഥാനാർഥി ആര്യാടൻ ഷൗക്കത്ത്. സിപിഎമ്മിന് ഇപ്പോഴും ആർഎസ്എസുമായി യോജിക്കാവുന്ന അവസ്ഥയാണ് ഉള്ളതെന്ന് ആര്യാടൻ ഷൗക്കത്ത് പറഞ്ഞു. ഇടതുപക്ഷം ബിജെപിയുടെ ആദ്യരൂപമായ ജനസംഘവുമായി സഖ്യം ചേർന്നിട്ടുണ്ടെന്ന് സിപിഎമ്മിന്റെ ചരിത്ര രേഖയിലുണ്ട് എന്നും അദ്ദേഹം പറഞ്ഞു. 

ബിജെപി നേതാവ് എൽ.കെ അദ്വാനി പാലക്കാട് ടി. ശിവദാസമേനോനുവേണ്ടി പ്രചാരണത്തിനായി എത്തിയതും ആർഎസ്എസ് അടങ്ങുന്ന ജനസംഘവുമായി സഖ്യമുണ്ടായിട്ടുള്ള കാര്യവും പരസ്യമായി സമ്മതിച്ചിട്ടുള്ളതാണെന്നും ആര്യാടൻ ഷൗക്കത്ത് മാധ്യമങ്ങളോട് പറഞ്ഞു. നിലമ്പൂർ മണ്ഡലത്തിൽ വിജയിക്കുമെന്ന് പറഞ്ഞ അദ്ദേഹം ഏറെ ആത്മവിശ്വാസമുണ്ടെന്നും പ്രതികരിച്ചു. ഇടതുപക്ഷത്തിനെതിരായ ശക്തമായ എതിർപ്പ് മണ്ഡലത്തിലുടനീളം കാണാമെന്നും അദ്ദേഹം കൂട്ടിച്ചേർത്തു.

അടിയന്തരാവസ്ഥ കഴിഞ്ഞ ഘട്ടം വന്നപ്പോൾ ആർഎസ്എസുമായി ചേർന്നു. അടിയന്തരാവസ്ഥ അർധ ഫാഷിസത്തിന്റെ രീതിയായിരുന്നു. അപ്പോൾ മറ്റൊന്നും നോക്കേണ്ടതില്ല. യോജിക്കുന്നവരുമായിട്ടൊക്കെ യോജിച്ചു എന്നായിരുന്നു വാർത്താചാനലിന് നൽകിയ അഭിമുഖത്തിൽ എം.വി ഗോവിന്ദൻ പറഞ്ഞത്. നിലമ്പൂരിൽ യുഡിഎഫിനെ പിന്തുണക്കുന്ന ജമാഅത്തെ ഇസ്‌ലാമി മുമ്പ് എൽഡിഎഫിന് പിന്തുണച്ചത് സംബന്ധിച്ച ചോദ്യത്തിനായിരുന്നു അദ്ദേഹത്തിന്റെ പ്രതികരണം.

അതേസമയം, ജനതാപാർട്ടിയുമായാണ് ഇടതുപക്ഷം സഹകരിച്ചതെന്നും വർഗീയ നിലപാട് സ്വീകരിക്കുന്ന പാർട്ടി ആയിരുന്നില്ല ജനതാപാർട്ടിയെന്നും എൽഡിഎഫ് സ്ഥാനാർഥി എം.സ്വരാജ് പ്രതികരിച്ചു. വർഗീയവാദികളുടെ വോട്ടിനുവേണ്ടി അഴകുഴമ്പൻ നിലപാട് സ്വീകരിക്കുന്നവരല്ല ഇടതുപക്ഷമെന്നും അദ്ദേഹം വ്യക്തമാക്കി.

UDF candidate from Nilambur, Aryadan Shoukath, has responded sharply to CPM state secretary M.V. Govindan’s recent revelation about past cooperation with the RSS. According to Shoukath, CPM still maintains a stance that allows space for alignment with RSS. He also highlighted that the CPM’s own historical records indicate the party had once formed an alliance with the Bharatiya Jana Sangh, the predecessor of today’s BJP.