തിരുവനന്തപുരം: പ്ലസ് വണ്‍ പ്രവേശനവുമായി ബന്ധപ്പെട്ട് മുഖ്യഘട്ട അലോട്ട്‌മെന്റുകള്‍ ഇന്നലെ വൈകുന്നേരത്തോടെ പൂര്‍ത്തിയായി. ക്ലാസുകള്‍ ഇന്ന് ആരംഭിക്കും. മുഖ്യഘട്ട പ്രവേശനങ്ങള്‍ പൂര്‍ത്തീകരിച്ച ഏകദേശം 3.40 ലക്ഷം വിദ്യാര്‍ഥികള്‍ക്കാണ് ഇന്ന് രാവിലെ ഒമ്പത് മുതല്‍ ക്ലാസ്സുകള്‍ ആരംഭിക്കുന്നത്. പ്രവേശനോത്സവത്തിന്റെ സംസ്ഥാനതല ഉദ്ഘാടനം രാവിലെ ഒമ്പതിന് തിരുവനന്തപുരം തൈക്കാട്, ഗവണ്‍മെന്റ് മോഡല്‍ ബോയ്‌സ് ഹയര്‍ സെക്കണ്ടറി സ്‌കൂളില്‍ നടക്കും.

പ്ലസ് വണ്ണില്‍ ചില അപേക്ഷകളില്‍ കമ്മ്യൂണിറ്റി തെറ്റായി രേഖപ്പെടുത്തിയതിനാല്‍ ലഭിച്ച അലോട്ട്‌മെന്റുകളില്‍ പ്രവേശനം നിരസിക്കപ്പെട്ടവര്‍ക്ക് അപേക്ഷകളിലെ തെറ്റുകള്‍ തിരുത്തി സപ്ലിമെന്ററി അലോട്ട്‌മെന്റില്‍ അപേക്ഷ സമര്‍പ്പിക്കാനുള്ള സൗകര്യമുണ്ടെന്ന് വിദ്യാഭ്യാസ മന്ത്രി വി.ശിവന്‍കുട്ടി അറിയിച്ചു. സപ്ലിമെന്ററി അലോട്ട്‌മെന്റിനുള്ള ഒഴിവുകൾ ഈ മാസം 28 ന് പ്രസിദ്ധീകരിക്കും.