ന്യൂഡൽഹി: ഇന്ത്യയുടെ പക്കൽ പാകിസ്ഥാനെക്കാൾ കൂടുതൽ ആണവായുധ ശേഖരമുണ്ടെന്ന് സ്റ്റോക്ക്ഹോം ഇന്റർനാഷണൽ പീസ് റിസർച്ച് ഇൻസ്റ്റിറ്റ്യൂട്ട് റിപ്പോർട്ട്.  ഈ വർഷം ജനുവരിയിലെ കണക്കനുസരിച്ച് ഇന്ത്യയുടെ പക്കൽ 180 ആണവായുധങ്ങളുണ്ട്. പാകിസ്ഥാന്റെ കൈവശം 170 എണ്ണമാണുള്ളത്. എന്നാൽ, ചൈനയുടെ കൈയിൽ ഇന്ത്യയേക്കാൾ മൂന്നിരട്ടിയിലധികം ആണവായുധങ്ങൾ ഉണ്ടെന്നും റിപ്പോർട്ട് പറയുന്നു.

ഈ വർഷം  ജനുവരിയിലെ കണക്കനുസരിച്ച് ചൈനയുടെ പക്കൽ 600 ആണവായുധങ്ങളുണ്ട്. അതിൽ എപ്പോൾ വേണമെങ്കിലും വിക്ഷേപിക്കാവുന്ന തരത്തിൽ 24 എണ്ണം സജ്ജമാണെന്നും റിപ്പോർട്ടിൽ പറയുന്നു. 2024ൽ ഇന്ത്യ ആണവായുധ ശേഖരം കൂട്ടിയതായും പുതിയ തരം ആണവായുധങ്ങൾ വികസിപ്പിക്കുന്നത് തുടരുന്നതായും റിപ്പോർട്ടിൽ പറയുന്നു. പാകിസ്ഥാനും ആണവായുധങ്ങൾ ആധുനികമാക്കി വികസിപ്പിക്കുന്നതിൽ ശ്രദ്ധ കേന്ദ്രീകരിച്ചിട്ടുണ്ട്. വരും വർഷങ്ങളിൽ അവരുടെ ആണവായുധ ശേഖരം വർധിച്ചേക്കാമെന്നും റിപ്പോർട്ടിൽ സൂചിപ്പിക്കുന്നു.

കര, നാവിക, വ്യോമ കേന്ദ്രങ്ങളിൽനിന്ന് ഉപയോഗിക്കാവുന്ന തരത്തിലുള്ള ആണവായുധങ്ങളാണ് ഇന്ത്യയും പാകിസ്ഥാനും വികസിപ്പിക്കുന്നത്. ആണവായുധ ശേഖര രാജ്യങ്ങളുടെ പട്ടികയിൽ മുന്നിൽ റഷ്യയും അമേരിക്കയുമാണ്. റഷ്യയ്ക്ക് 5459ഉം യു.എസിന് 5177ഉം ആണവായുധങ്ങളുണ്ട്.

Latest global report reveals India now has more nuclear weapons than Pakistan, while China maintains a significantly larger stockpile in the region.