ഇനി കല്യാണ യാത്രയും കെഎസ്ആര്‍ടിസിയില്‍ ആക്കിയാലോ എന്ന് ചിന്തിച്ച് നില്‍ക്കേണ്ട... ഉടന്‍ സീറ്റുറപ്പിച്ചോളൂ... വിവാഹം, സ്വകാര്യ യാത്രകള്‍ തുടങ്ങിയ ആവശ്യങ്ങള്‍ക്കായി കുറഞ്ഞ ചെലവില്‍ ചാര്‍ട്ടേഡ് ട്രിപ്പ് സൗകര്യം ഒരുക്കിയിരിക്കുകയാണ് കെഎസ്ആര്‍ടിസി.

ട്രിപ്പുകള്‍ ഒഴിവാക്കുന്ന സാഹചര്യത്തില്‍, വരുമാന ലഭ്യത ഉറപ്പുവരുത്തിക്കൊണ്ട് ആവശ്യാനുസരണം ചാര്‍ട്ടേര്‍ഡ് ട്രിപ്പുകള്‍ ലഭ്യമാക്കുവാനാണ് കെഎസ്ആര്‍ടിസി പദ്ധതിയിട്ടിട്ടുള്ളത്. കല്ല്യാണങ്ങള്‍ക്കും സ്വകാര്യപരിപാടികള്‍ക്കുമായുള്ള ചാര്‍ട്ടേര്‍ഡ് ട്രിപ്പുകള്‍ക്ക് നിരക്ക് വലിയ രീതിയില്‍ കെഎസ്ആര്‍ടിസി കുറവ് ചെയ്തിട്ടുണ്ട്. എ, ബി, സി, ഡി എന്നിങ്ങനെ നാലുവിഭാ ഗമാക്കിയാണ് പുതിയ നിരക്ക് പ്രഖ്യാപിച്ചത്. ഓര്‍ഡിനറി മുതല്‍ വോള്‍വോ വരെ ഈ നിരക്ക് ബാധകമാണ്.

നാല് മണിക്കൂര്‍ ദൈര്‍ഘ്യമുള്ള 40 കിലോമീറ്റര്‍ യാത്രയ്ക്ക് മിനി ബസാണെങ്കില്‍ 3500 രൂപ നല്‍കിയാല്‍ മതി. എട്ട് മണിക്കൂര്‍ (100 കി ലോമീറ്റര്‍), 12 മണിക്കൂര്‍ (150 കി ലോമീറ്റര്‍), 16 മണിക്കൂര്‍( 200 കിലോമീറ്റര്‍) എന്നിങ്ങനെയും ഒപ്പം കിലോമീറ്റററും ചേര്‍ത്താണ് നിരക്ക്. ജിഎസ്ടി ചേര്‍ത്തുള്ള തുകയാണിത്.

40 കിലോമീറ്റര്‍ എന്നത് ട്രിപ്പ് പോയി തിരിച്ചുവരുന്ന ദൂരമാണ്. അധികമായി വരുന്ന ഓരോ കിലോമീറ്ററിന് ബസിന്റെ ക്ലാസ് അനുസരിച്ചുള്ള തുകയും ജിഎസ്ടിയും നല്‍കണം. കൂടുതല്‍ വിവരങ്ങള്‍ക്ക് അടുത്തുള്ള കെഎസ്ആര്‍ടിസി ഡിപ്പോയുമായി ബന്ധപ്പെടുക.