തെഹ്‌റാന്‍: ഇസ്‌റാഈലിന്റെ പ്രതിരോധ സംവിധാനം ഉപയോഗശൂന്യമെന്ന് തുറന്നടിച്ച് ഇറാന്‍ സൈന്യം. തങ്ങളുടെ മിസൈലാക്രമണത്തിന്റെയും ഇന്റലിജന്‍സിന്റെയും കൃത്യത ലോകത്തിന് ബോധ്യപ്പെട്ടുവെന്നും സൈന്യം ചൂണ്ടിക്കാട്ടി.

ഇസ്‌റാഈലിനെതിരെ കനത്ത ആക്രമണമാണ് ഇറാന്‍ നടത്തുന്നത്.  സെന്‍ട്രല്‍ തെല്‍ അവീവില്‍ കനത്ത നാശമുണ്ടായെന്ന് ഇസ്‌റാഈല്‍ മാധ്യമങ്ങള്‍ തന്നെ  റിപ്പോര്‍ട്ട് ചെയ്യുന്നു. മൊസാദ് ആസ്ഥാനം ഉള്‍പെടെ ഇറാന്റെ ആക്രമണങ്ങളില്‍ തകര്‍ന്നിട്ടുണ്ട്. അയണ്‍ഡോം നോക്കു കുത്തിയാവുന്നതാണ് കഴിഞ്ഞ ദിവസങ്ങളില്‍ ലോകം കണ്ടത്. മൈലുകള്‍ക്കപ്പുറത്ത് നിന്നും ഇറാന്‍ തൊടുന്ന വിടുന്ന മിസൈലുകള്‍ കൃത്യമായി ലക്ഷ്യത്തിലെത്തുന്നതിനും ലോകം സാക്ഷ്യം വഹിച്ചു.
 
രണ്ട് ദിവസത്തിനിടയിലെ കനത്ത ആക്രമണത്തില്‍ തെല്‍അവീവും ജെറുസേലേമും അക്ഷരാര്‍ഥത്തില്‍ വിറച്ചു. ഇന്റലിജന്‍സ് ആസ്ഥാനം ലക്ഷ്യം വെച്ച് ഇറാന്‍ നടത്തിയ മിസൈലാക്രമണത്തിനിടെ സൊറോക ആശുപത്രിയിലും മിസൈല്‍ പതിച്ചു. ഗസ്സയില്‍ പരുക്കേല്‍ക്കുന്ന സൈനികരെ ചികിത്സിക്കുന്ന ആശുപത്രിയാണിത്. ഇസ്‌റാഈലില്‍ ഇതുവരെ മരിച്ചവരുടെ എണ്ണം 24 ആയി. 838 പേര്‍ക്ക് പരിക്കേറ്റു. വീടുകളില്‍ നിന്നും 5000 പേരെ ഒഴിപ്പിച്ചുവെന്നും റിപ്പോര്‍ട്ടുകള്‍ പറയുന്നു.  

കൂടാതെ,  ഇറാനില്‍ നിന്നുള്ള ആക്രമണങ്ങള്‍ കടുത്തതോടെ ഇസ്റാഈലിന്റെ വ്യോമപ്രതിരോധ മിസൈലുകളുടെ സ്റ്റോക്ക് തീരുന്നുവെന്നും റിപ്പോര്‍ട്ടുകള്‍ വരുന്നുണ്ട്. ഒരാഴ്ചത്തേക്കുള്ള മിസൈലുകളേ ഇനി സ്റ്റോക്കുള്ളൂവെന്നാണ് അമേരിക്കന്‍ മാധ്യമങ്ങളുടെ റിപ്പോര്‍ട്ട്. പിന്നാലെ ഇസ്റാഈല്‍ മാധ്യമങ്ങളിലും ഇത് വാര്‍ത്തയായി. ഇസ്റാഈലിന്റെ അയേണ്‍ഡോം, ആരോ പ്രതിരോധ മിസൈല്‍ സംവിധാനത്തിലെ മിസൈലുകളാണ് തീരുന്നത്.

ALSO READ: ആശുപത്രിക്ക് നേരെയുള്ള മിസൈല്‍ ആക്രമണം ഭീകരതയെന്നും യുദ്ധക്കുറ്റമെന്നും ഇസ്‌റാഈല്‍;  ഗസ്സയില്‍ ചെയ്യുന്നത് 'സാമൂഹ്യ സേവനമോ' എന്ന് സോഷ്യല്‍ മീഡിയ
കഴിഞ്ഞ ദിവസം മാത്രം 350 മിസൈലുകളാണ് ഇറാന്‍ ഇസ്റാഈലിലേക്ക് അയച്ചത്. ഇറാന്‍ അയക്കുന്ന ചെറു മിസൈലുകള്‍ വ്യോമപ്രതിരോധ സംവിധാനത്തെ കബളിപ്പിക്കാനാണ് ഉപയോഗിക്കുന്നത്. ഇതോടൊപ്പം ആക്രമണത്തിന് ഹൈപര്‍സോണിക് മിസൈലുകളും അയക്കും. ഇങ്ങനെ ഇസ്റാഈലിന്റെ വ്യോമപ്രതിരോധം ദുര്‍ബലമാക്കുകയാണ് ലക്ഷ്യം. മിസൈലിനൊപ്പം നൂറുണക്കിന് ഡ്രോണുകളും ഇറാന്‍ അയക്കുന്നുണ്ട്. ഇറാന്റെ ഇപ്പോഴത്തെ ആക്രമണം കണക്കാക്കിയാല്‍ തന്നെ പരമാവധി 10 ദിവസം കൂടി പിടിച്ചു നില്‍ക്കാനുള്ള മിസൈലേ ഇസ്റാഈലിന്റെ പക്കലുള്ളൂ. ബാലിസ്റ്റിക് മിസൈല്‍ പ്രതിരോധിക്കാന്‍ യു.എസിന്റെ താഡിനെ ആശ്രയിക്കുകയാണ് ഇനി ചെയ്യാനുള്ളത്.

അതിനിടെ, ഇസ്‌റാഈലിന് മുന്നറിയിപ്പുമായി ഹിസ്ബുല്ലയും ഇറാഖും രംഗത്തെത്തി. ഇറാന്‍ പരമോന്നത നേതാവിനെ ലക്ഷ്യം വെച്ചാല്‍ പ്രത്യാഘാതമുണ്ടാകുമെന്ന് മുന്നറിയിപ്പും നല്‍കിയിട്ടുണ്ട്. ഇറാന്‍ സൈനിക സഹായം ആവശ്യപ്പെട്ടില്ലെന്നും പൊതുവായ സഹകരണം തുടരുമെന്നും റഷ്യയും അറിയിച്ചിട്ടുണ്ട്.

ഇന്നലെ രാത്രി ഇറാനിലെ ആണവ കേന്ദ്രങ്ങളില്‍ ഇസ്‌റാഈല്‍ ആക്രമണം നടത്തിയിരുന്നു. ഇതില്‍ റേഡിയേഷന്‍ ഒന്നും റിപ്പോര്‍ട്ട് ചെയ്തിട്ടില്ല.അതേസമയം,  ഇറാന്റെ സൈനിക ഹെലികോപ്റ്ററുകളും മിസൈല്‍ പ്രതിരോധ സംവിധാനങ്ങളും, നിര്‍മാണ കേന്ദ്രങ്ങളും ഇസ്‌റാഈല്‍ തകര്‍ത്തതായി റിപ്പോര്‍ട്ടില്‍ പറയുന്നു. ഇതിന് പിന്നാലെയാണ് ഇറാന്‍ തിരിച്ചടിച്ചത്. 

Iranian military declares Israel's Iron Dome defense system ineffective after launching accurate long-range missile strikes on Tel Aviv, including reported damage to a Mossad facility. The attacks highlight the precision of Iran's intelligence and missile technology, shaking global confidence in Israel’s security shield.