കൊച്ചി: ആക്ഷേപഹാസ്യത്തിനും രാഷ്ട്രീയ പരിഹാസത്തിനും പേര് കേട്ട 'ദി സവാള വട' എന്ന ഇൻസ്റ്റാഗ്രാം പേജ് ഇന്ത്യയിൽ നിരോധിക്കപ്പെട്ടതായി മക്തൂബ് മീഡിയ റിപ്പോർട്ട് ചെയ്തു. 85,000-ത്തോളം ഫോളോവേഴ്‌സുള്ള ഈ പേജ് കേരളത്തിൽ നിന്നുള്ള 22 വയസ്സുള്ള ഒരു യുവ സ്രഷ്ടാവും സർവകലാശാല വിദ്യാർത്ഥികളടങ്ങുന്ന ഒരു സംഘവും ചേർന്നാണ് നടത്തുന്നത്. "ലോകത്തിലെ ഏറ്റവും വലിയ ജനാധിപത്യം ഞങ്ങളെ നിരോധിച്ചു" എന്ന് #MotherOfDemocracy, #NotSatire, #SavalaVadaFried എന്നീ ഹാഷ്‌ടാഗുകൾക്കൊപ്പം പേജിന്റെ എക്‌സ് ഹാൻഡിൽ പോസ്റ്റ് ചെയ്തു.

ഇൻസ്റ്റാഗ്രാം പേജിൽ ഇന്ത്യയിൽ നിന്നുള്ള ഉപയോക്താക്കൾക്ക് ലഭിക്കുന്ന സന്ദേശം ഇങ്ങനെയാണ്: "ഇന്ത്യയിൽ ഈ അക്കൗണ്ട് തടഞ്ഞുവച്ചിരിക്കുന്നു. ഉള്ളടക്കം നിയന്ത്രിക്കാനുള്ള നിയമപരമായ അഭ്യർത്ഥന പാലിച്ചതിനാലാണ് ഇത്." സമകാലിക വാർത്തകളെയും ഓൺലൈൻ ചർച്ചകളെയും പരിഹസിക്കുന്ന, പത്രങ്ങളുടെ ഒന്നാം പേജിന്റെ ലേഔട്ട് അനുകരിക്കുന്ന മീമുകൾക്ക്  പ്രശസ്തമാണ് 'ദി സവാള വട' എന്ന ഇൻസ്റ്റാഗ്രാം പേജ്.

 

 

സർക്കാരിന്റെ മുൻഗണനകൾക്കെതിരെ പരിഹാസം

നിരോധനത്തിനെതിരെ പരിഹാസ രൂപേണ പ്രതികരിച്ച 'ദി സവാള വട' ടീം, "ഒരു ഹോസ്റ്റൽ ഡോർമിൽ നിന്ന് പ്രവർത്തിച്ചിരുന്ന ഒരു മീം പേജ് എന്ന പൊതു ശത്രുവിനെ ഇന്ത്യ ഒടുവിൽ തോല്പിച്ചു" എന്ന് പറഞ്ഞു. ഭരണഘടനാപരമായ പ്രശ്നങ്ങൾ, ആഭ്യന്തര കലാപങ്ങൾ, അസമിലെ വെള്ളപ്പൊക്കം, ജാതി അതിക്രമങ്ങൾ, ഭക്ഷ്യ അരക്ഷിതാവസ്ഥ തുടങ്ങിയ ഗുരുതര വിഷയങ്ങൾ നിലനിൽക്കെ, ഒരു മീം പേജ് നിരോധിക്കാൻ സർക്കാർ സമയം കണ്ടെത്തിയതിനെ അവർ വിമർശിച്ചു.

"ഒരു മീം പേജ് നീക്കം ചെയ്യാൻ സോഷ്യൽ മീഡിയ കമ്പനിയോട് ആവശ്യപ്പെടാൻ സർക്കാരിന് സമയമുണ്ടെങ്കിൽ, അതിന്റെ മുൻഗണനകൾ എന്താണെന്ന് വ്യക്തമാണ്," എന്ന് ടീം പരിഹസിച്ചു. ഹിന്ദുത്വ പ്രത്യയശാസ്ത്രത്തെ ലക്ഷ്യമിട്ട്, "വേദങ്ങൾ വായിക്കുന്നവരുടെ ചെവിയിൽ എണ്ണ ഒഴിക്കാൻ കഴിയില്ലെങ്കിൽ, അവയെക്കുറിച്ചുള്ള വിവരണങ്ങൾക്കെങ്കിലും നിയന്ത്രണം ഏർപ്പെടുത്താം" എന്ന് അവർ കൂട്ടിച്ചേർത്തു.

നിരോധനത്തിന്റെ കാരണം വ്യക്തമാക്കണമെന്ന് ആവശ്യപ്പെട്ട് സർക്കാരിനോട് ടീം വിശ​ദീകരണം തേടിയിട്ടുണ്ട്. "സർക്കാരിന് ഇഷ്ടപ്പെടാത്ത തമാശ ഏതാണ്? ഞങ്ങളുടെ ഏത് ഹാസ്യം മിനിസ്ട്രി ഓഫ് അൺഫണ്ണിയെ ഞെട്ടിച്ചുവെന്ന് അറിയാൻ ഞങ്ങൾക്ക് അവകാശമുണ്ട്," എന്ന് അവർ പറഞ്ഞു. 

 

 

2023 ജൂലൈ 21-ന് 'ജെ' എന്നറിയപ്പെടുന്ന ഒരു യുവാവ് ആരംഭിച്ച ദി സവാള വട പേജ്, അമേരിക്കൻ ഡിജിറ്റൽ മീഡിയ സ്ഥാപനമായ 'ദി ഒനിയൻ'ൽ നിന്ന് പ്രചോദനമുൾക്കൊണ്ടാണ് രൂപീകരിച്ചത്. ഇന്ത്യയിലെ "പ്രചാരണ-പ്രേരിത മാധ്യമ കാലാവസ്ഥ"യോടുള്ള നിരാശയാണ് പേജിന്റെ സൃഷ്ടിക്ക് പിന്നിലെന്ന് സ്ഥാപകൻ വ്യക്തമാക്കി. മോദി സർക്കാരിന്റെ നയങ്ങൾ, മാധ്യമ പക്ഷപാതം, വ്യവസ്ഥാപിത അനീതികൾ എന്നിവയ്‌ക്കെതിരെ മൂർച്ചയുള്ള പരിഹാസവും ഇരുണ്ട നർമവും കലർത്തിയാണ് പേജ് യുവാക്കൾക്കിടയിൽ ജനപ്രീതി നേടിയത്.

നിരോധനത്തിന്റെ രാഷ്ട്രീയം

നിരോധനത്തിന് പിന്നാലെ, പ്രധാനമന്ത്രി നരേന്ദ്ര മോദിയുടെ അക്കൗണ്ടിലേക്ക് ചുറ്റിക ചൂണ്ടുന്ന ചിത്രം ദി സവാള വട പോസ്റ്റ് ചെയ്തിരുന്നു. "ലോകത്തിലെ ഏറ്റവും വലിയ ജനാധിപത്യം ഒരു മീമിനെ നിരോധിച്ചു" എന്ന അടിക്കുറിപ്പോടെയുള്ള ഈ പോസ്റ്റ് പിന്നീട് നീക്കം ചെയ്യപ്പെട്ടു. ഭരണഘടനാപരമായ പ്രശ്നങ്ങൾ, ജാതി അതിക്രമങ്ങൾ, മനുഷ്യാവകാശ ലംഘനങ്ങൾ, ദാരിദ്ര്യം തുടങ്ങിയ വിഷയങ്ങൾക്ക് പുറമെ, ബോളിവുഡ് സിനിമകളുടെ വിവാദ കഥകൾ പോലും പേജ് എടുത്തുകാട്ടി സർക്കാരിന്റെ മുൻഗണനകളെ പരിഹസിച്ചു.

ലോകത്തിലെ ഏറ്റവും വലിയ ജനാധിപത്യ രാജ്യത്ത് വിയോജിപ്പിനുള്ള ഇടം ചുരുങ്ങുന്നതിനെക്കുറിച്ചുള്ള ആശങ്കകൾ ഈ നീക്കം ഉയർത്തിയിട്ടുണ്ട്. സോഷ്യൽ മീഡിയ അക്കൗണ്ടുകൾക്കും സ്വതന്ത്ര ശബ്ദങ്ങൾക്കുമെതിരായ നിയന്ത്രണങ്ങൾ വർദ്ധിക്കുന്നതിന്റെ ഭാഗമായി, 'ദി സവാള വട'യുടെ നിരോധനം ഇന്ത്യയിൽ സെൻസർഷിപ്പിനെക്കുറിച്ചുള്ള ചർച്ചകൾക്ക് ആക്കം കൂട്ടിയിരിക്കുകയാണ്. "നിരോധനം പ്രതീക്ഷിച്ചിരിക്കാമെ, അതിന്റെ സമയവും വ്യാപ്തിയും പരിഹാസ്യമാണ്. പക്ഷേ, നമ്മുടെ ജനാധിപത്യത്തിന്റെ അവസ്ഥയും അങ്ങനെ തന്നെ," എന്ന് ടീം അഭിപ്രായപ്പെട്ടു.