കോഴിക്കോട്: വിദ്യാഭ്യാസ മന്ത്രി വി. ശിവൻകുട്ടിയ്ക്ക് നേരെ കരിങ്കൊടി കാണിച്ച് പ്രതിഷേധവുമായി യുവ മോർച്ച. കോഴിക്കോട് തളിയിലെ ജൂബിലി ഹാളിലെ പരിപാടിയിൽ പങ്കെടുക്കാനെത്തിയപ്പോഴാണ് യുവമോർച്ച പ്രവർത്തകർ പ്രതിഷേധവുമായി എത്തിയത്. എന്നാൽ സ്ഥലത്ത് മന്ത്രിയെ സ്വീകരിക്കാൻ എത്തിയ എസ്എഫ്ഐ പ്രവർത്തകർ പ്രതിഷേധിച്ചവർക്ക് നേരെ എത്തി. ഇതോടെ സ്ഥലത്ത് ഇരുവിഭാഗവും തമ്മിൽ ഏറ്റുമുട്ടി. പൊലിസ് ഇടപെട്ടാണ് സംഘർഷം ഒഴിവാക്കിയത്. പൊലിസ് ഇരു വിഭാഗത്തെയും സ്ഥലത്ത് നിന്ന് മാറ്റി.

സംഭവത്തിന് പിന്നാലെ പൊലിസിനെതിരെ ആരോപണവുമായി ബിജെപി നേതാക്കൾ രംഗത്തെത്തി. യുവമോർച്ച പ്രവർത്തകരെ എസ്എഫ്ഐക്കാർക്ക് മർദിക്കാനായി പൊലിസുകാർ ഇട്ടുകൊടുക്കുകയാണ് ഉണ്ടായതെന്ന് ഇവർ ആരോപിച്ചു. ചായ കുടിക്കാൻ പോയ പ്രവർത്തകരെയാണ് മർദിച്ചത് എന്ന് കോഴിക്കോട് ജില്ലാ അധ്യക്ഷൻ കെ പി പ്രകാശ് ബാബു പറഞ്ഞു. തങ്ങളുടെ പ്രവർത്തകരെ സിപിഐഎം പ്രവർത്തകരും പൊലിസും ചേർന്ന് തല്ലുകയായിരുന്നു. കൊള്ളാൻ മാത്രം പഠിച്ചവരല്ല തങ്ങൾ. പൊലിസുകാർ ക്രിമിനലുകളെ അറസ്റ്റ് ചെയ്തില്ലെങ്കിൽ അടിക്ക് തിരിച്ചടി നൽകും. പൊലിസ് വേണ്ട നടപടി എടുത്തില്ലെങ്കിൽ എന്ത് ചെയ്യണമെന്ന് ബിജെപിക്ക് അറിയാമെന്നും പ്രകാശ് ബാബു പറഞ്ഞു.

നിലവിൽ കോഴിക്കോട് തളി ക്ഷേത്രത്തിന് സമീപം ബിജെപിയുടെ പ്രതിഷേധം നടക്കുകയാണ്. നിരവധി പ്രവർത്തകർ ഒത്തുകൂടി പ്രതിഷേധിക്കുകയാണ്. പ്രതിഷേധം പൊലിസ് തടഞ്ഞു. പ്രതിഷേധക്കാർ മന്ത്രി വി. ശിവൻകുട്ടിയുടെ കോലം കത്തിച്ചു.