കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴിൽ തീർഥാടനത്തിന് പോയവരുടെ മടക്ക യാത്ര ബുധനാഴ്ച മുതൽ ആരംഭിക്കും.ഹാജിമാരുടെ മടക്ക യാത്രക്കുള്ള ക്രമീകരണങ്ങൾ കരിപ്പൂർ വിമാനത്താവളത്തിലൊരുക്കി. ഹാജിമാരുടെ എമിഗ്രേഷൻ, കസ്റ്റംസ് പരിശോധനകൾ വേഗത്തിൽ പൂർത്തിയാക്കാൻ കൂടുതൽ ഉദ്യോഗസ്ഥരുണ്ടാകും.ഹാജിമാർ പുറത്തിറങ്ങുന്ന വേളയിൽ ഓരോ ഹാജിക്കും അഞ്ച് ലിറ്റർ സംസം തീർഥ ജലം കൈമാറും. ഇവ വിമാന കമ്പനി സൗജന്യമായി വിമാനത്താവളത്തിലെത്തിച്ചിട്ടുണ്ട്.  

ഹജ്ജ് കഴിഞ്ഞ് മദീന സന്ദർശനം പൂർത്തിയാക്കിയ  ആദ്യ ഹജ്ജ് സംഘം ബുധനാഴ്ച വൈകീട്ട് 3.30 നാണ് കരിപ്പൂരിലെത്തുക. ജൂലൈ ഏഴ് വരെ 31 വിമാനങ്ങളിലായാണ് ഹാജിമാരെ കരിപ്പൂരിൽ തിരിച്ചെത്തിക്കുന്നത്.  കരിപ്പൂർ വഴി 5,339 പേരാണ് ഹജ്ജിന് പോയത്. കൊച്ചിയിൽ നിന്നുള്ളവരുടെ മടക്കയാത്ര വ്യാഴാഴ്ച മുതലാണ് ആരംഭിക്കുക. ജൂലൈ 10ന് സർവിസുകൾ സമാപിക്കും. 23 വിമാനങ്ങളാണ് സഊദി എയർലൈൻസ് ഹാജിമാരെ തിരിച്ചെത്തിക്കാനായി ഷെഡ്യൂൾ ചെയ്തത്. 6,388 ഹാജിമാരാണ് കൊച്ചി വഴി ഹജ്ജിന് പോയത്.കണ്ണൂരിലേക്കുള്ള ഹജ്ജ് മടക്ക സർവിസുകൾ ഈ മാസം 30 മുതൽ ആരംഭിക്കും. ജൂലൈ 11നാണ് അവസനാ വിമാനങ്ങൾ. 4,755 പേരാണ് കണ്ണൂരിൽനിന്ന് ഹജ്ജിന് പോയത്. 28 വിമാനങ്ങളാണ് ഷെഡ്യൂൾ ചെയ്തത്. 
16,482 ഹാജിമാരാണ് കേരളത്തിൽ നിന്ന് സംസ്ഥാന ഹജ്ജ് കമ്മിറ്റിക്ക് കീഴിൽ ഹജ്ജിന് പോയത്.ഹാജിമാരിൽ ഏഴ് പേർ ഇതിനകം മക്കയിൽവച്ച് മരിച്ചു.