ഡല്‍ഹി: ബിരുദ പ്രവേശനത്തിനുള്ള അഡിമിഷന്‍ ഫോമില്‍ മാതൃഭാഷാ വിഭാഗത്തില്‍ 'മുസ്‌ലിം' എന്ന കോളം ഉള്‍പ്പെടുത്തിയതില്‍ ക്ഷമ ചോദിച്ച് ഡല്‍ഹി സര്‍വകലാശാല അധികൃതര്‍. സംഭവം വിവാദമായതോടെ, ബിരുദ പ്രവേശന ഫോമില്‍ അബദ്ധവശാല്‍ സംഭവിച്ച ഒരു പിശക് ഉണ്ടായതില്‍ ഖേദം പ്രകടിപ്പിക്കുന്നുവെന്നാണ് പുറത്തിറക്കിയ പ്രസ്താവനയില്‍ പറയുന്നത്. ബിരുദ പ്രവേശനത്തിനുള്ള അപേക്ഷ ഫോമിലാണ് ഭാഷാ വിഭാഗത്തില്‍ സമുദായങ്ങളുടെയും മതങ്ങളുടെയും പേരുകള്‍ പ്രത്യക്ഷപ്പെട്ടത്.

ഇത് ബോധപൂര്‍വം സംഭവിച്ചതല്ലെന്നും വിഷയം ഗൗരവപൂര്‍വമായി തന്നെ പരിശോധിക്കുമെന്നും സംഭവത്തെ വലിയ വിവാദമാക്കി സര്‍വകലാശാലയിലെ സാഹോദര്യവും ഐക്യവും തകര്‍ക്കരുതെന്നും അധികൃതര്‍ സമൂഹമാധ്യമത്തിലൂടെ അറിയിച്ചു. പ്രശ്‌നം ശ്രദ്ധയില്‍പ്പെട്ട ഉടന്‍ തന്നെ ഓണ്‍ലൈന്‍ പോര്‍ട്ടലിലെ ഓപ്ഷന്‍ പ്രവര്‍ത്തനരഹിതമാക്കിയതായി യൂണിവേഴ്‌സിറ്റി രജിസ്ട്രാര്‍ വികാസ് ഗുപ്തയും പറഞ്ഞു. എന്നാല്‍ അപേക്ഷ ഫോമിലെ തെറ്റ് തിരുത്തി എന്ത് പരിഹാര നടപടിയാണ് സ്വീകരിക്കുക എന്നത് പ്രസ്താവനയില്‍ വ്യക്തമാക്കിയിട്ടുമില്ല.

ഭാഷാ വിഭാഗങ്ങളില്‍ നിന്ന് ഉര്‍ദു ഒഴിവാക്കിയതിനെതിരെയും വിമര്‍ശനമുയര്‍ന്നിരുന്നു. ഭരണഘടന അംഗീകരിച്ച 22 ഔദ്യോഗിക ഭാഷകളില്‍ ഒന്നാണ് ഉര്‍ദു. 'മാതൃഭാഷാ' വിഭാഗത്തില്‍ ജാതി തൊഴില്‍ സംബന്ധിയായ ബിഹാറി, ചമര്‍, മസ്ദൂര്‍, ദേഹതി, മോച്ചി, കുര്‍മി എന്നിവ ഉള്‍പ്പെടുത്തിയിട്ടുണ്ട്.  ഉര്‍ദു ഒഴിവാക്കിയതിനെതിരെ അധ്യാപകരടക്കമുള്ളവരും രംഗത്ത് വന്നിട്ടുണ്ട്.