കോഴിക്കോട്: ജൂണ്‍ 26ന് സമസ്ത സ്ഥാപക ദിനത്തോടനുബന്ധിച്ച് സമസ്ത കേരള ജംഇയ്യത്തുല്‍ ഉലമായുടെ ആഭിമുഖ്യത്തില്‍ കോഴിക്കോട് വരക്കല്‍ മഖാം അങ്കണത്തില്‍ വിപുലമായ പരിപാടികള്‍ നടക്കുന്നു. രാവിലെ 11 മണിക്ക് മഖാം സിയാറത്തോടെ പരിപാടികള്‍ക്ക് തുടക്കമാവും. തുടര്‍ന്ന് പതാക ഉയര്‍ത്തും. മഖാം അങ്കണത്തില്‍ പ്രത്യേകം സജ്ജമാക്കിയ പന്തലില്‍ വെച്ച് നടക്കുന്ന സ്ഥാപകദിന സംഗമം സമസ്ത കേരള ജംഇയ്യത്തുല്‍ ഉലമാ പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങള്‍ ഉദ്ഘാടനം ചെയ്യും. സമസ്ത കേരള ജംഇയ്യത്തുല്‍ ഉലമായുടെയും പോഷക സംഘടനകളുടെയും നേതാക്കള്‍ സംബന്ധിക്കും. സമസ്ത നൂറാം വാര്‍ഷികത്തിന്റെ ഭാഗമായി പ്രസിദ്ധീകരിക്കുന്ന 100 പുസ്തകങ്ങളില്‍ 10 പുസ്തകങ്ങളുടെ പ്രകാശനം നാളെ നിര്‍വ്വഹിക്കും. നൂറാം വാര്‍ഷിക മഹാസമ്മേളനത്തിന്റെ പ്രചാരണ പോസ്റ്റര്‍ പ്രകാശനവും നാളെ നടക്കും.

സ്ഥാപകദിനത്തോടനുബന്ധിച്ച് കീഴ്ഘടകങ്ങളില്‍ പതാക ഉയര്‍ത്തല്‍, ഖബര്‍ സിയാറത്ത്, സ്മൃതി സംഗമം ഉള്‍പ്പെടെ വിത്യസ്ഥ പരിപാടികള്‍ സംഘടിപ്പിച്ചിട്ടുണ്ട്. സമസ്ത സ്ഥാപക ദിനം വിജയിപ്പിക്കാന്‍ സമസ്ത കേരള ജംഇയ്യത്തുല്‍ ഉലമാ പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങളും ജനറല്‍ സെക്രട്ടറി പ്രൊഫ. കെ ആലിക്കുട്ടി മുസ്ലിയാരും അഭ്യര്‍ത്ഥിച്ചു.