തെഹ്റാൻ: ലോകത്തിന്റെ എണ്ണ, വാതക ആവശ്യങ്ങളുടെ 20 ശതമാനം കടന്നുപോകുന്ന ഹോർമുസ് കടലിടുക്ക് അടച്ചുപൂട്ടാനുള്ള ഇറാന്റെ ഏത് നീക്കവും "ആർക്കും ഗുണകരമല്ല" എന്ന് യൂറോപ്യൻ യൂണിയന്റെ വിദേശനയ മേധാവി കാജ കല്ലാസ് മുന്നറിയിപ്പ് നൽകി. ഇറാൻ-ഇസ്റാഈൽ സംഘർഷം രൂക്ഷമാകുന്നതിന്റെ പശ്ചാത്തലത്തിൽ, ഹോർമുസ് കടലിടുക്ക് അടയ്ക്കുന്നത് "അതീവ അപകടകരം" ആണെന്നും അവർ വ്യക്തമാക്കി.

ഈ യുദ്ധം കൂടുതൽ വഷളാകാനുള്ള സാധ്യതയും പ്രതികാര നടപടികളും വലിയ ആശങ്കയുണ്ടാക്കുന്നു. ഹോർമുസ് കടലിടുക്ക് അടയ്ക്കുന്നത് അങ്ങേയറ്റം അപകടകരമായ ഒരു നടപടിയാണ്," ബ്രസ്സൽസിൽ നടന്ന യൂറോപ്യൻ യൂണിയൻ വിദേശകാര്യ മന്ത്രിമാരുടെ യോഗത്തിന് മുന്നോടിയായി കല്ലാസ് മാധ്യമപ്രവർത്തകരോട് പറഞ്ഞു.

 

 

അമേരിക്ക ഇറാന്റെ ആണവ കേന്ദ്രങ്ങളിൽ നടത്തിയ ആക്രമണങ്ങളുടെ പേര് പറഞ്ഞ് ഇറാൻ ഈ നിർണായക വ്യാപാര പാത അടച്ചുപൂട്ടിയാൽ, അത് ആഗോള സമ്പദ്‌വ്യവസ്ഥയ്ക്ക് വലിയ തിരിച്ചടിയാകുമെന്നും യൂറോപ്യൻ യൂണിയന്റെ ഉന്നത നയതന്ത്രജ്ഞ മുന്നറിയിപ്പ് നൽകി. "നയതന്ത്ര പരിഹാരങ്ങൾ കണ്ടെത്താനാണ് ഞങ്ങൾ ശ്രമിക്കുന്നത്. എന്നാൽ, ഇറാൻ ഈ പാത അടയ്ക്കുകയാണെങ്കിൽ അത് അങ്ങേയറ്റം അപകടകരമായിരിക്കും," അവർ കൂട്ടിച്ചേർത്തു.

ALSO READ: ഇറാൻ- ഇസ്റാഈൽ സംഘർഷം: ഇനി എന്ത് സംഭവിക്കും എന്നത് ഇറാൻ ആഗ്രഹിക്കുന്നതിനെ ആശ്രയിച്ചിരിക്കും; നിലപാട് വ്യക്തമാക്കി റഷ്യ

ഇറാൻ പാർലമെന്റ് ഹോർമുസ് കടലിടുക്ക് അടയ്ക്കുന്നതിനെ പിന്തുണച്ചതായുള്ള റിപ്പോർട്ടുകൾക്ക് പിന്നാലെയാണ് ഈ പ്രസ്താവന. എന്നാൽ, ഇക്കാര്യത്തിൽ അന്തിമ തീരുമാനം ഇറാന്റെ പരമോന്നത ദേശീയ സുരക്ഷാ കൗൺസിലിന്റേതായിരിക്കും.