ഏതു കാലാവസ്ഥയിലും നമ്മള്‍ കഴിക്കാറുണ്ട് വെള്ളരിയും കക്കരിയുമൊക്കെ. അധിക പേരും തൊലിയും കുരുവും കളയാതെ തന്നെയാണ് ഈ പച്ചക്കറിയെ കഴിക്കുക. വെറുതെയും കഴിക്കാറുണ്ട്, ചിലപ്പോള്‍ ജ്യൂസടിച്ചും ഇവ കുടിക്കാറുണ്ട്. എന്നാല്‍ ചില സമയങ്ങളില്‍ കയ്ക്കുന്ന വെള്ളരിയും നമുക്ക് കിട്ടാറുണ്ട്. എന്തുകൊണ്ടാണ് ഇവയില്‍ ഇങ്ങനെ കയ്പ്പു രസം ഉണ്ടാവുന്നത്്? 

ഇതിനു കാരണമാവുന്നത് കുക്കുര്‍ബിറ്റാസിന്‍ എന്ന രാസവസ്തുവാണ്. വെള്ളരി, പീച്ചില്‍, തണ്ണിമത്തന്‍, കുമ്പളം, മത്തന്‍ എന്നിവയിലെല്ലാം ഇത് അടങ്ങിയിരിക്കുന്നുണ്ട്്. കീടബാധ തടയാന്‍ സഹായിക്കുന്ന ഈ രാസവസ്തുവിന്റെ അമിത ഉപയോഗമാവാം കയ്പുരസം കൂടുന്നതിനുള്ള കാരണം. 

എന്തുകൊണ്ടാണ് കയ്പ്പുരസം?

കൂടുതലായി ചൂടുള്ള കാലാവസ്ഥയിലാണ് വളരുന്നതെങ്കില്‍ ഉഷ്ണസമ്മര്‍ദം കാരണം കയ്പുരസമുണ്ടാകാം. അതുപോലെ നനയ്ക്കുന്നത് രീതി ക്രമമായിരിക്കണം. വല്ലപ്പോഴുമോ നിങ്ങള്‍ക്ക് തോന്നുമ്പോഴോ മറ്റോ നനയ്ക്കുകയും കുറച്ചു ദിവസം തീരെ നനയ്ക്കാതിരിക്കുകയും ചെയ്താല്‍ ചെടികള്‍ വാടിപ്പോവാന്‍ തുടങ്ങും. പിന്നെയും നനച്ച് വളര്‍ത്തിയാല്‍ വിളവെടുക്കുമ്പോള്‍ ചിലപ്പോള്‍ കയ്പുരസം അനുഭവപ്പെടുന്നതാണ്.

അതുപോലെ പകല്‍ സമയത്ത് നല്ല ചൂടും രാത്രിയില്‍ കുഴപ്പമില്ലാത്ത തരത്തിലുളള തണുപ്പും അനുഭവപ്പെടുമ്പോള്‍ കുക്കുര്‍ബിറ്റാസിന്റെ അംശം കൂടുന്നതാണ്. 

എന്താണ് കുക്കുര്‍ബിറ്റാസിന്റെ അളവ് കുറയ്ക്കാനുള്ള വഴികള്‍

നിങ്ങള്‍ വെള്ളരി വിളവെടുത്തു കഴിഞ്ഞാല്‍ അതിന്റെ രണ്ടറ്റവും ഒരിഞ്ചു നീളത്തില്‍ മുറിച്ച് ആ മുറിച്ച കഷണം കൊണ്ടുതന്നെ പരസ്പരം ഉരസിക്കൊടുക്കുക. കുറച്ചു സമയം കഴിഞ്ഞാല്‍ മുറിച്ച ഭാഗത്തുനിന്നു വെളുത്ത കട്ടിയുള്ള കറ വരുന്നത് കാണാം.

ALSO READ: വീട് വാടകയ്ക്കു കൊടുക്കുന്നവരോ വാടകക്കാരോ ആണ് നിങ്ങളെങ്കില്‍... ഇക്കാര്യങ്ങള്‍ നിര്‍ബന്ധമായും അറിഞ്ഞു വയ്ക്കുക

അതുപോലെ രണ്ടറ്റവും അരയിഞ്ച് നീളത്തിലും മുറിക്കുക. നീളത്തില്‍ രണ്ടായി കീറുകയുമാവാം. ഇതിലേക്ക് ഉപ്പുപൊടി വിതറി ഈ മുറിച്ച ഭാഗങ്ങള്‍ ചേര്‍ത്ത് നന്നായി ഉരസുക. അപ്പോഴും പത പോലെയുള്ള കറ വരുന്നത് നിങ്ങള്‍ക്കു കാണാം. ഇത് നന്നായി കഴുകിക്കളയുക.

കായയുടെ തൊലി കളഞ്ഞ് പുറംഭാഗത്ത് കത്തി ഉപയോഗിച്ച് നീളത്തില്‍ വരഞ്ഞു കൊടുക്കുക. ഇങ്ങനെ കുറേ പ്രാവശ്യം  മുറിച്ച ശേഷം വെള്ളത്തില്‍ കഴുകിയെടുക്കാവുന്നതാണ്. ഇങ്ങനെ ചെയ്താല്‍ കക്കിരിയിലെയും വെള്ളരിയിലെയും കയ്പുരസം ഏറക്കുറേ മാറ്റി എടുത്ത് കഴിക്കാന്‍ സാധിക്കുകയും ചെയ്യും.