തിരുവനന്തപുരം: അടിയന്തരാവസ്ഥ കാലത്ത് നടന്ന അതിക്രമങ്ങളെ കുറിച്ച് സ്‌കൂള്‍ പാഠ്യപദ്ധതിയില്‍ ഉള്‍പ്പെടുത്തണമെന്ന ഗവര്‍ണര്‍ രാജേന്ദ്ര ആര്‍ലേക്കറുടെ പ്രസ്താവനയില്‍ പ്രതികരിച്ച് മന്ത്രി വി ശിവന്‍കുട്ടി. അടിയന്തരാവസ്ഥയെക്കുറിച്ച് പഠിപ്പിക്കുന്നതില്‍ തെറ്റില്ലെന്നും, അതോടൊപ്പം ഗുജറാത്ത് കലാപവും, ഗാന്ധി വധവും കൂടി പഠിപ്പിക്കണമെന്നാണ് ശിവന്‍കുട്ടി പറഞ്ഞു. അതോടൊപ്പം ആര്‍എസ്എസ് നിരോധനവും, മുഗള്‍ ഭരണവും ഉള്‍പ്പെടുത്തണമെന്നും മന്ത്രി കൂട്ടിച്ചേര്‍ത്തു.

കാവിക്കൊടിയേന്തിയ ഭാരതാംബ വിവാദത്തിന് പിന്നാലെ ഗവര്‍ണറുടെ അധികാരത്തെക്കുറിച്ച് പാഠ്യപദ്ധതിയില്‍ ഉള്‍പ്പെടുത്തുമെന്ന് ശിവന്‍കുട്ടി പറഞ്ഞിരുന്നു. പിന്നാലെ ഗവര്‍ണറുടെ അധികാരത്തെ കുറിച്ച് പഠിപ്പിക്കുന്നതിനേക്കാള്‍ ആവശ്യം അടിയന്തരാവസ്ഥ കാലത്തെ അക്രമങ്ങളെക്കുറിച്ചുള്ള വിവരങ്ങള്‍ പഠിപ്പിക്കലാണെന്നാണ് രാജേന്ദ്ര ആര്‍ലേക്കര്‍ തിരിച്ചടിച്ചു. അക്കാലത്ത് രാജ്യത്ത് എന്താണ് നടന്നതെന്ന് വരും തലമുറയും പഠിക്കണം. അതിക്രൂരമായ അതിക്രമങ്ങളുടെ ഉത്തരവാദികള്‍ ആരായിരുന്നുവെന്നും രാജ്യത്ത് ജനാധിപത്യത്തെ ചവിട്ടിമെതിച്ചത് ആരാമെന്ന് അവര്‍ മനസിലാക്കണമെന്നുമാണ് ഗവര്‍ണര്‍ പറഞ്ഞത്. 

ഇതിന് മറുപടിയായാണ് വി ശിവന്‍കുട്ടി ഇപ്പോള്‍ രംഗത്തെത്തിയത്. 

ALSO READ: സി.പി.ഐയെ ക്ഷണിച്ച് അടൂര്‍ പ്രകാശ്; സി.പി.എമ്മിനൊപ്പം ഉറച്ചു നില്‍ക്കുമെന്ന് ബിനോയ് വിശ്വം, മോദി സ്തുതി നടത്തുന്നവര്‍ ബി.ജെ.പിയിലേക്ക് പോകാതെ നോക്കുകയാണ് കോണ്‍ഗ്രസ് ചെയ്യേണ്ടതെന്നും ഒളിയമ്പ് 

രാജ്ഭവനില്‍ നടത്തിയ സ്‌കൗട്ട് ആന്റ് ഗൈഡ്‌സ് സര്‍ട്ടിഫിക്കറ്റ് വിതരണ പരിപാടിയില്‍ ആര്‍എസ്എസിന്റെ കാവിക്കൊടിയേന്തിയ ഭാരതാംബയുടെ ചിത്രം ഉപയോഗിച്ചത് വലിയ വിവാദങ്ങള്‍ക്ക് വഴിവെച്ചിരുന്നു. എന്നാല്‍ ഭാരതാംബയുടെ ചിത്രത്തില്‍ പുഷ്പാര്‍ച്ചന നടത്തിയ പ്രവര്‍ത്തിയെ മന്ത്രി വി ശിവന്‍കുട്ടി എതിര്‍ക്കുകയും ഭരണഘടന വിരുദ്ധമെന്ന് ചൂണ്ടിക്കാട്ടി ചടങ്ങ് ബഹിഷ്‌കരിക്കുകയും ചെയ്തിരുന്നു. ഭരണഘനടക്ക് വിരുദ്ധമായ ചിത്രങ്ങളോ പ്രതീകങ്ങളോ സര്‍ക്കാര്‍ പരിപാടിയില്‍ ഉപയോഗിക്കാന്‍ പാടില്ലെന്ന് സര്‍ക്കാര്‍ നിലപാട് വ്യക്തമാക്കിയതിന് പിന്നാലെയാണ് രാജ്ഭവന്റെ പ്രകോപനം. 

ഇതിനെ തുടര്‍ന്ന് ഗവര്‍ണറും, വിദ്യാഭ്യാസ മന്ത്രിയും തമ്മില്‍ രൂക്ഷമായ വാഗ്വാദങ്ങളും നടക്കുകയുണ്ടായി. പിന്നാലെയാണ് ഗവര്‍ണര്‍ ഭരണഘടന അനുസരിച്ച് പ്രവര്‍ത്തിക്കണമെന്നും ഗവര്‍ണറുടെ അധികാരങ്ങളെ കുറിച്ച് പാഠപുസ്തകത്തില്‍ ഉള്‍പ്പെടുത്താന്‍ സര്‍ക്കാര്‍ തീരുമാനിക്കുകയും ചെയ്തു. ഈ വര്‍ഷത്തെ പത്താം ക്ലാസിലെ രണ്ടാം വോളിയത്തില്‍ ഉള്‍പ്പെടുത്താനാണ് തീരുമാനം.