എഡ്ബാസ്റ്റൺ: ഇന്ത്യയ്ക്കെതിരായ രണ്ടാം ടെസ്റ്റിൽ സെഞ്ച്വറി നേടി ഇംഗ്ലണ്ട് താരം ജാമി സ്മിത്ത്. മത്സരത്തിന്റെ മൂന്നാം ദിവസം തുടക്കത്തിൽ തകർച്ച നേരിട്ട ഇംഗ്ലണ്ടിനെ സെഞ്ച്വറി നേടിയാണ് താരം കരകയറ്റിയത്. 84 റൺസിന്‌ അഞ്ചു വിക്കറ്റുകൾ എന്ന നിലയിൽ നിന്നുമാണ് ഇംഗ്ലണ്ട് മികച്ച സ്കോറിലേക്ക് നീങ്ങിയത്. ടി-20 ശൈലിയിൽ ആയിരുന്നു സ്മിത്ത് ബാറ്റ് വീശിയത്. വെറും 80 പന്തിൽ നിന്നുമാണ് താരം സെഞ്ച്വറി പൂർത്തിയാക്കിയത്. 

ഇതോടെ ടെസ്റ്റ് ക്രിക്കറ്റിൽ ഇംഗ്ലണ്ടിന് വേണ്ടി ഏറ്റവും വേഗത്തിൽ സെഞ്ച്വറി നേടുന്ന താരങ്ങളുടെ പട്ടികയിൽ മൂന്നാം സ്ഥാനത്ത് എത്താനും ജാമി സ്മിത്തിന് സാധിച്ചു. ഇത്രതന്നെ പന്തിൽ നിന്നും പാക്കിസ്ഥാനെതിരെ സെഞ്ച്വറി നേടിയ ഹാരി ബ്രുകിന്റെ റെക്കോർഡിനൊപ്പം എത്താനും ജാമി സ്മിത്തിന് സാധിച്ചു. 2022ലാണ് ബ്രുക് സെഞ്ച്വറി നേടിയത്.

ഇതേവർഷം തന്നെ 77 പന്തിൽ ന്യൂസിലാൻഡിനെതിരെ സെഞ്ച്വറി നേടിയ ജോണി ബെയർസ്റ്റോ ആണ് ഈ നേട്ടത്തിൽ രണ്ടാം സ്ഥാനത്തുള്ളത്. ഗിൽബെർട്ട് ജെസ്സോപ്പാണ് ഈ റെക്കോർഡിൽ ഒന്നാമതുള്ളത്. 1902ൽ 76 പന്തിൽ നിന്നും ഓസ്ട്രേലിയക്കെതിരെയാണ് താരം സെഞ്ച്വറി നേടിയത്.

മത്സരത്തിൽ ആദ്യ ഇന്നിങ്സിൽ ഇന്ത്യ 587 റൺസിനാണ് പുറത്തായത്. ഇന്ത്യക്കായി ക്യാപ്റ്റൻ ശുഭ്മൻ ഗിൽ ഡബിൾ സെഞ്ച്വറി നേടി തിളങ്ങി.  387 പന്തിൽ നിന്നും 269 റൺസാണ് ഗില്ലിന്റെ ബാറ്റിൽ നിന്നും പിറന്നത്. 30 ഫോറുകളും മൂന്ന് സിക്സുകളും അടങ്ങുന്നതാണ് ക്യാപ്റ്റന്റെ ഇന്നിംഗ്സ്.

യശ്വസി ജെയ്‌സ്വാൾ, രവീന്ദ്ര ജഡേജ എന്നിവർ അർദ്ധ സെഞ്ച്വറിയും മികച്ച പ്രകടനമാണ് നടത്തിയത്.107 പന്തിൽ 87 റൺസാണ് ജെയ്‌സ്വാൾ നേടിയത്. 13 ഫോറുകളും ഒരു സിക്‌സും അടങ്ങുന്നതായിരുന്നു താരത്തിന്റെ പ്രകടനം. 137 പന്തിൽ 10 ഫോറുകളും ഒരു സിക്‌സും അടക്കം 89 റൺസാണ് ജഡേജ സ്വന്തമാക്കിയത്.

Englands Jamie Smith scored a century in the second Test against India The players century helped England recover from an early slump on the third day of the match