ദുബൈ: ദുബൈ എമിറേറ്റിലുടനീളമുള്ള പ്രധാന ബസ്, മെട്രോ സ്റ്റേഷനുകളിൽ ഡെലിവറി ബൈക് യാത്രക്കാർക്ക് 15 പുതിയ എയർ കണ്ടീഷൻഡ് വിശ്രമ കേന്ദ്രങ്ങൾ കൂടി ദുബൈ റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർ‌.ടി‌.എ) അവതരിപ്പിച്ചു. സെപ്റ്റംബർ 15 വരെ ഉച്ച 12.30 മുതൽ 3 മണി വരെയുള്ള വിശ്രമ ഇടവേളയിൽ റോഡ് സുരക്ഷ മെച്ചപ്പെടുത്താനും ജീവിത നിലവാരം ഉയർത്താനും ഈ വിഭാഗത്തിന് അവശ്യ സേവനങ്ങളും സുഖസൗകര്യങ്ങളും നൽകാനുമുള്ള ആർ‌.ടി‌.എയുടെ തുടർ ശ്രമങ്ങളെ ഈ സംരംഭം പിന്തുണയ്ക്കുന്നു.

ഡെലിവറി ബൈക്ക് യാത്രക്കാർക്ക് എ.സി ഷെൽട്ടറുകൾ നൽകാനുള്ള ആർ‌.ടി.എയുടെ ശ്രമങ്ങളുടെ ഭാഗമാണ് ഈ താൽക്കാലിക വിശ്രമ കേന്ദ്രങ്ങൾ. എമിറേറ്റിലെ പ്രധാന സ്ഥലങ്ങളിലായി 40 സ്ഥിരം സൗകര്യങ്ങൾ നേരത്തെ സ്ഥാപിച്ചിരുന്നു. നേരിട്ടുള്ള സൂര്യപ്രകാശ ആഘാതം കുറയ്ക്കുന്നതിനും ദൃശ്യപരതയെ തടസപ്പെടുത്താതെ ഫലപ്രദമായ ഇൻസുലേഷൻ ഉറപ്പാക്കാനുമായി ഈ ഷെൽട്ടറുകളുടെ ബാഹ്യ രൂപകൽപന ശ്രദ്ധാപൂർവം വികസിപ്പിച്ചെടുത്തതാണ്. വാട്ടർ ഡിസ്പെൻസറുകൾ, മൊബൈൽ ഫോൺ ചാർജിങ് സ്റ്റേഷനുകൾ, മോട്ടോർ ബൈക്കുകൾക്കായി വിശാലമായ പാർക്കിങ് സൗകര്യം തുടങ്ങിയവ ഷെൽട്ടറുകളിൽ സജ്ജീകരിച്ചിരിക്കുന്നു. കൂടാതെ, റൈഡർമാരുടെ സുഖസൗകര്യങ്ങൾ കൂട്ടുകയും ഗതാഗത നിയമങ്ങളും ചട്ടങ്ങളും പാലിക്കുന്നത് പ്രോത്സാഹിപ്പിക്കുകയും ചെയ്യുന്ന മറ്റ് സവിശേഷതകളും ഇതിൽ ഉൾപ്പെടുന്നു.

പുതുതായി സ്ഥാപിച്ച താൽക്കാലിക വിശ്രമ കേന്ദ്രങ്ങളിൽ 'ഡെലിവെറൂ' കമ്പനിയുമായി സഹകരിച്ച് യു.എ.ഇ ഫുഡ് ബാങ്ക് സഹകരണത്തോടെ 7,500 റെഡിമെയ്ഡ് ഹോട്ട് മീൽസ് വിതരണം ചെയ്യുന്നു. വിതരണ മേഖലയുടെ ദ്രുത ഗതിയിലുള്ള വികാസത്തിനിടയിൽ, സമൂഹത്തിനായുള്ള അവരുടെ ദൈനംദിന സേവനത്തിനും എമിറേറ്റിന്റെ സമ്പദ്‌ വ്യവസ്ഥയ്ക്ക് അവർ നൽകുന്ന നിർണായക സംഭാവനയ്ക്കും അംഗീകാരമായി, ഡെലിവറി റൈഡർമാർക്ക് സൗജന്യ ഭക്ഷണം നൽകാനാണ് ഈ സംരംഭം ശ്രമിക്കുന്നത്.

ഗോൾഡ് സൂഖ്, അൽ സത്‍വ, അൽ ജാഫിലിയ, ഔദ് മയ്ഥ എന്നീ ബസ് സ്റ്റേഷനുകളിലാണ് പുതിയ വിശ്രമ കേന്ദ്രങ്ങൾ സ്ഥാപിച്ചിരിക്കുന്നത്. മെട്രോ സ്റ്റേഷൻ എക്സിറ്റുകളിലും താൽക്കാലിക വിശ്രമ കേന്ദ്രങ്ങളുണ്ട്. അവ ഇപ്രകാരം: ഇ& (ഇത്തിസാലാത്ത് മെട്രോ സ്റ്റേഷൻ എക്സിറ്റ് 1), അൽ ഖിസൈസ് (എക്സിറ്റ് 1, 2), എമിറേറ്റ്സ് ടവേഴ്സ് (എക്സിറ്റ് 1), ഇൻഷുറൻസ് മാർക്കറ്റ് (എക്സിറ്റ് 2), സെന്റർ പോയിന്റ് (എക്സിറ്റ് 1), അൽ ഫുർജാൻ (എക്സിറ്റ് 1), ബിസിനസ് ബേ (എക്സിറ്റ് 2), ഡി.എം.സി.സി (എക്സിറ്റ് 2), എ.ഡി.സി.ബി (എക്സിറ്റ് 2), ബർജുമാൻ (എക്സിറ്റ് 4).

ഡെലിവറി ബൈക്ക് റൈഡർമാർക്ക് സുരക്ഷിതവും സുഖകരവുമായ അന്തരീക്ഷം നൽകാനും റോഡ് സുരക്ഷ വർധിപ്പിക്കാനും ആർ.ടി.എ പ്രതിജ്ഞാബദ്ധമാണ്. പ്രത്യേകിച്ചും, സാധനങ്ങൾക്കായുള്ള പൊതുജനങ്ങളുടെ ആവശ്യകത വർധിക്കുന്നതിനനുസരിച്ച് ഈ മേഖല സമീപ വർഷങ്ങളിൽ കൈവരിച്ച ശ്രദ്ധേയ വളർച്ച കണക്കിലെടുക്കുമ്പോൾ.

പൊതുജനങ്ങൾക്ക് ഉയർന്ന നിലവാരമുള്ള സേവനങ്ങൾ നൽകുന്നത് ഉറപ്പാക്കുന്നതിനു വേണ്ടി ഡെലിവറി മേഖലയ്ക്കായി ആർ.ടി.എ ഒരു സംയോജിത ചട്ടക്കൂട് വികസിപ്പിച്ചെടുത്തിട്ടുണ്ട്. മേഖലയുടെ പ്രധാന പ്രകടന ലക്ഷ്യങ്ങളെ പിന്തുണയ്ക്കുന്നതിന് ലക്ഷ്യമിട്ടുള്ള വിവിധ സംരംഭങ്ങൾക്കൊപ്പം, പ്രവർത്തനത്തെ നിയന്ത്രിക്കുന്ന പ്രത്യേക നിയന്ത്രണങ്ങളും വ്യവസ്ഥകളും ഇതിൽ ഉൾപ്പെടുന്നു.

ഡെലിവറി മേഖലയുടെ നട്ടെല്ലായ ഡെലിവറി റൈഡർമാരെ പിന്തുണയ്ക്കാനും അവരുടെ അവശ്യ പങ്കിനെക്കുറിച്ച് പൊതുജന അവബോധം വളർത്താനും ഈ സംരംഭം ശ്രമിക്കുന്നു. മിച്ചമുള്ള ഭക്ഷണം സുരക്ഷിതമായും സംഘടിതമായും പുനർവിതരണം ചെയ്തുകൊണ്ട് ഭക്ഷ്യവസ്തുക്കൾ പാഴാക്കൽ തടയുക എന്നതും ഇതിന്റെ ലക്ഷ്യമാണ്. സുസ്ഥിരത പ്രോത്സാഹിപ്പിക്കാനും സ്വകാര്യ മേഖലയുമായുള്ള പങ്കാളിത്തം വളർത്താനുമുള്ള വിശാല തന്ത്രവുമായി ഈ സംരംഭം യോജിക്കുന്നു.

യു.എ.ഇ ഫുഡ് ബാങ്ക്, യു.എ.ഇ ഭരണ നേതൃത്വം മുന്നോട്ടു വയ്ക്കുന്ന മാനുഷിക സമീപനത്തിന്റെ ഒരു സംയോജിത മാതൃകയാണ്. ഇത് ജീവകാരുണ്യ പ്രവർത്തനങ്ങളെയും സാമൂഹിക ഐക്യദാർഢ്യത്തെയും സുസ്ഥിര വികസനത്തിന്റെ കാതലായി പ്രതിഷ്ഠിക്കുന്നു. ആവശ്യമുള്ളവർക്ക് ഭക്ഷണം നൽകുന്നത് കേവലമൊരു ജീവകാരുണ്യ പ്രവർത്തനമല്ല. മറിച്ച്, രാഷ്ട്രം കെട്ടിപ്പടുത്ത ഔദാര്യത്തിന്റെയും ഐക്യദാർഢ്യത്തിന്റെയും മൂല്യങ്ങളെ പ്രതിഫലിപ്പിക്കുന്ന മാനുഷികവും ധാർമികവുമായ ബാധ്യതയാണെന്നും യു.എ.ഇ ഫുഡ് ബാങ്ക് വിശ്വസിക്കുന്നു.

Dubai Roads and Transport Authority (RTA) has introduced 15 new air-conditioned rest areas for delivery bike riders at key bus and metro stations across the Emirate. The initiative supports RTA’s ongoing efforts to improve road safety, enhance quality of life, and provide essential services and comfort for this segment during the midday work ban.