ദുബൈ: 40 വര്‍ഷത്തെ പ്രവാസ ജീവിതത്തോട് വിട പറഞ്ഞ് കണ്ണൂര്‍ ജില്ലയിലെ മാടായി മുട്ടം വെങ്ങര സ്വദേശിയും പട്ടുവം അരിയിലെ താമസക്കാരനുമായ പുന്നക്കന്‍ സത്താര്‍ നാട്ടിലേക്ക് മടങ്ങുന്നു. 1971 ഡിസംബര്‍ 2ന് യു.എ.ഇ രൂപീകരിച്ച ജുമൈറയിലെ ഗവ.ഗസ്റ്റ്ഹൗസിലായിരുന്നു 10 വര്‍ഷം ജോലി ചെയ്തിരുന്നത്. അവിടെ നിന്ന് ഗവ. റൂളേഴ്‌സ് കോര്‍ട്ടിലെ ലേബര്‍ അഫയേഴ്‌സ് ഡിപാര്‍ട്‌മെന്റ് സ്റ്റാഫായാണ് ഇപ്പോള്‍ വിരമിച്ചിരിക്കുന്നത്.

ദുബൈ വിട്ടു പോകാന്‍ മനസ്സില്ലെങ്കിലും റിട്ടയര്‍ ചെയ്തതും, ആരോഗ്യം അനുവദിക്കാത്തതുമാണ് നാട്ടിലേക്ക് മടങ്ങാന്‍ നിര്‍ബന്ധിതമാക്കിയതെന്ന് അദ്ദേഹം പറഞ്ഞു. ഗസ്റ്റ് ഹൗസ് ജോലിക്കിടെ ലോകത്തെ വിവിധ രാഷ്ട്ര നേതാക്കളെയും യു.എ.ഇയുടെ ഭരണാധികാരികളെയും നേരില്‍ കാണാന്‍ ഭാഗ്യം ലഭിച്ചിട്ടുണ്ട്. കാര്യമായി സമ്പാദിക്കാനായില്ലെങ്കിലും 40 വര്‍ഷം സാമ്പത്തികമായി യാതൊരു പ്രയാസവും കൂടാതെ കുടുംബത്തെ നന്നായി നോക്കാനും മൂന്നു പെണ്‍കുട്ടികളുടെ വിവാഹം ഭംഗിയായി നടത്തുവാനും സാധിച്ചതായി അദ്ദേഹം പറഞ്ഞു. പഴയ കാല മാപ്പിളപ്പാട്ട് ഗായകരെ വളരെ ഇഷ്ടമായിരുന്നു. മാപ്പിളപ്പാട്ടിന്റെ വലിയ ആസ്വാദകനായിരുന്നു. സംഗമങ്ങളില്‍ മാപ്പിളപ്പാട്ട് ആലപിക്കാറുണ്ടായിരുന്നു. നല്ല പാചക വിദഗ്ധനുമായിരുന്നു. 2013 വരെ ജുമൈറ ഗവ. ഗസ്റ്റ്ഹൗസിലായിരുന്നു താമസം. ഗവ.റൂളേഴ്‌സ് കോര്‍ട് പി.ആര്‍.ഒ ആയിരുന്ന ജ്യേഷ്ഠന്‍ പുന്നക്കന്‍ ബീരാനാണ് ദുബൈയിലേക്കു കൊണ്ടു വന്നത്. ഇന്‍കാസ് ഗ്ലോബല്‍ നേതാവും ചിരന്തന സാംസ്‌കാരിക വേദി ദുബൈ പ്രസിഡന്റുമായ പുന്നക്കന്‍ മുഹമ്മദലി, നാട്ടിലുള്ള പുന്നക്കന്‍ മഹ്മൂദ് എന്നിവര്‍ മറ്റു സഹോദരങ്ങളാണ്.

പട്ടുവം അരിയില്‍ ജുമുഅത്ത് യു.എ.ഇ കമ്മിറ്റി വൈസ് പ്രസിഡന്റ്, മുട്ടം മുസ്‌ലിം ജമാഅത്ത്, വെങ്ങര രിഫായി യു.എ.ഇ കമ്മിറ്റി, ചിരന്തന സാംസ്‌കാരിക വേദി, മുട്ടം സരിഗമ കലാ വേദി എന്നീ സംഘടനകളില്‍ അംഗമായിരുന്നു. പട്ടുവം അരിയില്‍ ജുമുഅത്ത് യു.എ.ഇ കമ്മിറ്റി ദുബൈയില്‍ യാത്രയയപ്പ് നല്‍കി.

പ്രസിഡന്റ് എം.കെ അഹ്മദ് അധ്യക്ഷത വഹിച്ചു. അദ്ദേഹം തന്നെ മെമെന്റോ നല്‍കി. സ്‌നേഹോപഹാരം കെ.കെ ജുനൈദ് സമ്മാനിച്ചു.

എം.കെ ശാദുലി, കെ.കെ ഹാരിസ് , നൗഷാദ് വെള്ളിക്കീല്‍, പി. ആസിഫ്, കെ.എം ആസിഫലി , കെ. അബൂബക്കര്‍ സംസാരിച്ചു. സത്താര്‍ പുന്നക്കന്‍ മറുപടി പ്രസംഗം നടത്തി. ജന.സെക്രട്ടറി ഷൗക്കത്തലി കെ.എം സ്വാഗതവും ട്രഷറര്‍ ജുനൈദ് കെ. കെ നന്ദിയും പറഞ്ഞു