വേവിച്ച ചോറ് കൊണ്ട് എളുപ്പത്തിലൊരു ഫ്രൈഡ്‌റൈസ് ഉണ്ടാക്കാം. കുറച്ച് ചെമ്മീനും മുട്ടയുമുണ്ടെങ്കില്‍ ഉച്ചയൂണ് കുശാലാവും. മടിപിടിച്ചിരിക്കുന്ന ദിവസമാണെങ്കില്‍ ഇങ്ങനെയൊന്നു ചെയ്തു നോക്കൂ. 

ചേരുവ

ചെമ്മീന്‍- 250 ഗ്രാം
മുളകുപൊടി- 1 സ്പൂണ്‍
കുരുമുളകു പൊടി- അര സ്പൂണ്‍
വെളുത്തുള്ളി - അഞ്ച് അല്ലി
മുട്ട- 3
ചോറ്- ആവശ്യത്തിന്

ഉണ്ടാക്കുന്ന വിധം

ചെമ്മീന്‍ കഴുകി വൃത്തിയാക്കിയെടുക്കുക. അതിലേക്ക് മുളകുപൊടിയും കുരുമുളകു പൊടിയും ഉപ്പും മുട്ടയുടെ വെള്ളയും ചേര്‍ത്തിളക്കി യോജിപ്പിക്കുക. ഇതൊന്ന് സെറ്റാവാന്‍ കുറച്ചു സമയം ചെമ്മീന്‍ മാറ്റിവയ്ക്കാം. ഇനി ഒരു പാന്‍ ചൂടാകുമ്പോള്‍ അതിലേക്ക് എണ്ണ ഒഴിക്കുക. ചെമ്മീന്‍  ഈ എണ്ണയില്‍ ചേര്‍ത്തു വറുത്തെടുക്കുക.

 ഇതിലേക്ക് മുട്ടയൊഴിച്ച് നന്നായി ഇളക്കിക്കൊടുക്കുക. വറുത്തെടുത്ത ചെമ്മീന്‍ അതിലേക്ക് ചേര്‍ക്കുക. എരിവിനനുസരിച്ച് മുളകുപൊടിയും ആവശ്യത്തിന് ഉപ്പും വെളുത്തുള്ളി ചതച്ചതും കുരുമുളകു പൊടിയും ചേര്‍ത്ത് നന്നായി ഇളക്കി യോജിപ്പിക്കുക. വെന്തുവരുമ്പോള്‍ വേവിച്ചുവച്ച ചോറ് ഇതിലേക്ക് ചേര്‍ത്തുകൊടുക്കുക. കുറച്ചു സോയ സോസും കൂടെ ചേര്‍ത്താല്‍ അടിപൊളിയായിരിക്കും. ചൂടോടെ കഴിക്കാവുന്നതാണ്.