വട കഴിക്കാന്‍ നമുക്കിഷ്ടമാണ്. വൈകുന്നേരം നല്ല ചൂടുള്ള ക്രിസ്പിയായ വട ചട്ണിയോ സാമ്പാറോ കൂട്ടി കഴിക്കുക എന്നു പറയുമ്പോള്‍ തന്നെ നാവില്‍ വെള്ളമൂറുന്നില്ലേ..?  ഇത്രയും രുചികരമായ ഈ ലഘു ഭക്ഷണം നമ്മള്‍ ആസ്വദിച്ചു കഴിക്കാറുമുണ്ട്. എന്നാല്‍ വട കഴിക്കുമ്പോള്‍ നിങ്ങള്‍ വടയുടെ ആകൃതി ശ്രദ്ധിച്ചിട്ടുണ്ടോ?. വടയ്ക്ക് നടുവില്‍ എപ്പോഴും ഒരു ദ്വാരമുണ്ടാവും. വൃത്താകൃതിയില്‍.

എന്തുകൊണ്ടാണ് വടയ്ക്ക് വൃത്താകൃതിയിലുള്ള ദ്വാരം ഇടുന്നത്. എപ്പോഴെങ്കിലും ശ്രദ്ധിക്കുകയോ ചിന്തിക്കുകയോ ചെയ്തിട്ടുണ്ടോ..? എന്തിനാണ് ഈ ദ്വാരമെന്ന്. വടയ്ക്ക് ഭംഗി കൂട്ടാന്‍ വേണ്ടിയാണോ ഇങ്ങനെ ഇടുന്നത്. അതോ അതിനു പിന്നില്‍ എന്തെങ്കിലും കഥയുണ്ടോ..?  നോക്കാം.

വടയ്ക്ക് മാവ് തയ്യാറാക്കുന്നത് വളരെ കട്ടിയോടെയാണ്. ദ്വാരമില്ലാതെ വൃത്താകൃതിയില്‍ ഇതുണ്ടാക്കിയാല്‍ പുറംഭാഗം മാത്രം വേഗം വേവുകയും ക്രിസ്പിയായി മാറുകയും ചെയ്യുന്നതാണ്. അങ്ങനെ വരുമ്പോള്‍ ഉള്‍ഭാഗം ശരിയായി വേവാതിരിക്കാം. ദ്വാരം ഇടുമ്പോള്‍ ചൂടുള്ള എണ്ണ വടയുടെ ഉള്‍ഭാഗത്ത് എത്താന്‍ എളുപ്പം സഹായിക്കുന്നതാണ്. ഇത് വടയുടെ അകവും പുറവും ഒരു പോലെ വേവാന്‍ കാരണമാകുന്നു. അതായത് ദ്വാരം ഉള്ളതു കൊണ്ടാണ് നമുക്ക് നല്ല രുചിയില്‍ വട കഴിക്കാന്‍ കഴിയുന്നത്. അല്ലെങ്കില്‍ വേവാതെ രുചിയില്ലാതെ ആവും കിട്ടുക. 

ക്രിസ്പി

എണ്ണയില്‍ വട ഇട്ടു കഴിയുമ്പോള്‍ ഇതിലെ ദ്വാരം വടയെ എല്ലാവശത്തു നിന്നും ക്രിസ്പിയാക്കുന്നു. അകത്തുള്ള എണ്ണ കാരണം വടയുടെ ഘടന ക്രിസ്പിയായി മാറുന്നതാണ്. 

എണ്ണ

വറുത്ത ശേഷം എണ്ണയില്‍ നിന്ന് നമ്മള്‍ വട കോരിയെടുക്കും. ദ്വാരമുള്ളതു കൊണ്ടു തന്നെ അധിക എണ്ണ പുറത്തേക്കൊഴുകിപ്പോവുകയും ചെയ്യും. ഇത് വടയിലെ എണ്ണമയം കുറയ്്ക്കുകയും കഴിക്കാന്‍ എളുപ്പവുമാക്കുന്നു. എണ്ണമയമില്ലാത്ത വട പോലെ തോന്നുകയും ചെയ്യും.

ALSO READ: ഇതെന്താ എനിക്ക് ഇരിക്കാന്‍ പറ്റാത്തത് ..? എനിക്കും ഇരിക്കണം കസേരയില്‍...! പാവം ആനക്കുട്ടി ആവുന്നത്ര പരിശ്രമിക്കുയാണ് ഒന്നിരിക്കാന്‍  

സാമ്പാര്‍/ ചട്‌നി

ഇത് ശാസ്ത്രീയമായ കാരണമൊന്നുമല്ല, എന്നാല്‍ വടയിലെ ദ്വാരത്തിന് വലിയൊരു ഗുണം വേറെയുണ്ട്. നിങ്ങള്‍ വട സാമ്പാറിലോ ചട്ണിയിലോ മുക്കുമ്പോള്‍ സാമ്പാറിന്റെയും ചട്ണിയുടെയും രുചി ഈ ദ്വാരത്തിലൂടെ വടയ്ക്കുള്ളിലേക്ക് എത്തുകയും ചെയ്യും. അപ്പോള്‍ നിങ്ങള്‍ക്ക് സ്വാദോടെ ഇതു കഴിക്കാം.