ഇലയട എല്ലാവര്‍ക്കും ഇഷ്ടമാണ്. കാരണം ഹെല്‍തിയുമാണ് ഉണ്ടാക്കാന്‍ എളുപ്പവുമാണ്. അരിമാവോ ഗോതമ്പോ ഇലയില്‍ പരത്തി അതിനുള്ളില്‍ മധുരമുള്ള തേങ്ങയും ശര്‍ക്കരയും വച്ച് ഒന്ന് ആവിയില്‍ വേവിച്ചെടുത്താല്‍ മതി. ഇലയട റെഡി. ചൂടോടെ കഴിക്കുന്നതാണ് സൂപ്പര്‍. ഇത് മഴക്കാലത്ത് ചൂട് ചായക്കൊപ്പം കഴിക്കാന്‍ എല്ലാവര്‍ക്കും ഇഷ്ടവുമാണ്. എന്നാല്‍ ചിക്കന്‍ അട നിങ്ങള്‍കഴിച്ചിട്ടുണ്ടോ...? വളരെ എളുപ്പത്തില്‍ തന്നെ നമുക്ക് ചിക്കന്‍ അട തയാറാക്കാവുന്നതാണ്. 

ചേരുവ

ചിക്കന്‍ എല്ലില്ലാത്തത്; 300 ഗ്രാം
അരിപ്പൊടി - അര കപ്പ്
സവാള- 1
പച്ചമുളക് -2
ഇഞ്ചി വെളുത്തുള്ളി - ഒരു സ്പൂണ്‍
മുളകു പൊടി-1 സ്പൂണ്‍
മഞ്ഞ പൊടി - കാല്‍ ടീസ്പൂണ്‍
ഗരം മസാല - കാല്‍ ടീസ്പൂണ്‍
പെരുജീരകം- കാല്‍ ടീസ്പൂണ്‍

ഉണ്ടാക്കുന്ന വിധം

ചിക്കന്‍ നന്നായി കഴുകി വൃത്തിയാക്കിയെടുക്കുക. അതിലേക്ക് മഞ്ഞപൊടിയും ഇഞ്ചിയും വെളുത്തുള്ളിയും ഉപ്പും ചേര്‍ത്ത് നന്നായി മിക്‌സ് ചെയ്യുക. ഇനി ഒരു പാനില്‍ കുറച്ചു വെള്ളമൊഴിച്ച് ചിക്കന്‍ വേവിച്ചെടുക്കുക. 
ഇനി ഒരു പാത്രത്തില്‍ വെള്ളം തിളപ്പിച്ച് അതിലേക്ക് അരിപ്പൊടി ഇട്ട് നന്നായി വഴറ്റുക. ഇത് കുഴച്ചെടുക്കുക. 
ഒരു പാത്രത്തിലേക്ക് വേവിച്ചു വച്ച ചിക്കന്‍ ചെറുതായൊന്നു പൊടിച്ചെടുക്കുക. ശേഷം ഒരു പാനില്‍ എണ്ണയൊഴിച്ച് അതിലേക്ക് ജീരകവും സവാളയും പച്ചമുളകും ചേര്‍ത്തി വഴറ്റിയെടുക്കുക. നന്നായി വഴന്നുവന്നാല്‍ അതിലേക്ക് പൊടിച്ച ചിക്കന്‍ ചേര്‍ത്തു ഇളക്കി യോജിപ്പിക്കുക. രം മസാലയും ഉപ്പും ചേര്‍ത്ത്  ഇളക്കുക. ഇനി ഇലയിലേക്ക് കുഴച്ച് വച്ച അരിമാവ് എടുത്ത് പരത്തുക. കനം കുറച്ച് പരത്തിയതിനു ശേഷം അതിന്റെ നടുവില്‍ ഈ കൂട്ട് വച്ചു കൊടുത്ത് മടക്കുക. ഇനി അപ്പചെമ്പില്‍ 20 മിനിറ്റ് വേവിച്ചെടുക്കുക. അടിപൊളി രുചിയുള്ള ചിക്കന്‍ അട റെഡി.