തിരുവനന്തപുരം: 2011-ലെ സൗമ്യ വധക്കേസ് പ്രതി ഗോവിന്ദചാമിയുടെ കണ്ണൂർ സെൻട്രൽ ജയിലിൽ നിന്നുള്ള ജയിൽചാട്ടം ഒന്നര മാസത്തെ സൂക്ഷ്മമായ ആസൂത്രണത്തിന്റെ ഫലമാണെന്ന് പൊലീസ് ചോദ്യം ചെയ്യലിൽ വെളിപ്പെടുത്തൽ. ജയിൽചാട്ടത്തിന്റെ ഞെട്ടിക്കുന്ന വിശദാംശങ്ങൾ ഗോവിന്ദചാമി പൊലീസിനോട് വെളിപ്പെടുത്തി.

ALSO READ: കേരളത്തിലെ ജയിൽചാട്ട ചരിത്രം; ആദ്യ വനിതാ ജയിൽ ചാട്ടം മുതൽ ഗോവിന്ദചാമി വരെ

ആസൂത്രിത രക്ഷപ്പെടൽ

ഗോവിന്ദചാമി വെളിപ്പെടുത്തിയതനുസരിച്ച്, ജയിലിന്റെ സെല്ലിലെ ഇരുമ്പ് കമ്പികൾ മുറിക്കാൻ ഒന്നര മാസത്തോളം സമയമെടുത്തു. മുറിച്ച പാടുകൾ പുറത്ത് നിന്ന് ആരും കാണാതിരിക്കാൻ തുണികൊണ്ട് മറച്ചുവെച്ചിരുന്നു. 25 അടി ഉയരമുള്ള ജയിൽ മതിൽ കയറാൻ പാൽപ്പാത്രങ്ങളും ഡ്രമ്മുകളും ഉപയോഗിച്ചതായും ഗോവിന്ദചാമി സമ്മതിച്ചു. പുലർച്ചെ 1:15-നും 4:15-നും ഇടയിൽ, ജയിലിലെ നിർമാണ പ്രവർത്തനങ്ങൾക്കായി കൊണ്ടുവന്ന ബ്ലേഡ് ഉപയോഗിച്ച് കമ്പികൾ മുറിച്ച്, തടവുകാർ ഉണക്കാനിട്ട വസ്ത്രങ്ങൾ കെട്ടി കയർ ഉണ്ടാക്കിയാണ് ഗോവിന്ദചാമി രക്ഷപ്പെട്ടത്.

ALSO READ: ഗോവിന്ദചാമിയുടെ ജയിൽചാട്ടം; നാല് ജയിൽ ഉദ്യോഗസ്ഥർക്ക് സസ്പെൻഷൻ, വിശദ അന്വേഷണം പ്രഖ്യാപിച്ച് എഡിജിപി

ജയിൽചാട്ടത്തിന് ശേഷം ഗുരുവായൂരിലെത്തി മോഷണം നടത്തി, കവർച്ച ചെയ്ത പണവുമായി മറ്റ് സംസ്ഥാനങ്ങളിലേക്ക് രക്ഷപ്പെടാനായിരുന്നു ഗോവിന്ദചാമിയുടെ പദ്ധതി. എന്നാൽ, റെയിൽവേ സ്റ്റേഷന്റെ സ്ഥാനം വ്യക്തമായി അറിയാത്തതിനാൽ ഗോവിന്ദചാമി ഡിസി ഓഫീസ് പരിസരത്ത് എത്തിപ്പെട്ടു. തളപ്പിലെ ആളൊഴിഞ്ഞ കെട്ടിടത്തിന് സമീപമുള്ള കിണറ്റിൽ ഒളിച്ചിരുന്ന അവനെ നാട്ടുകാരുടെ വിവരത്തിന്റെ അടിസ്ഥാനത്തിൽ പൊലീസ് പിടികൂടുകയായിരുന്നു.

ജയിലിനുള്ളിൽ നിന്ന് ബ്ലേഡ് നൽകിയ ഒരാളെ കുറിച്ച് മുമ്പ് വെളിപ്പെടുത്തിയ ഗോവിന്ദചാമി, പുറത്തുള്ള ചിലരുമായി നിരന്തരം ബന്ധപ്പെട്ടിരുന്നതായും സമ്മതിച്ചു. ഈ വിവരങ്ങളുടെ അടിസ്ഥാനത്തിൽ, രക്ഷപ്പെടലിന് സഹായിച്ചവരെ കണ്ടെത്താനും കൂടുതൽ പേർക്ക് പങ്കുണ്ടോ എന്നും പൊലീസ് അന്വേഷിക്കുകയാണ്. ജയിൽ അധികൃതരുടെ സുരക്ഷാ വീഴ്ചകളും പരിശോധനയ്ക്ക് വിധേയമാണ്.

തമിഴ്‌നാട്ടിലെ വിരുദുനഗർ സ്വദേശിയായ ഗോവിന്ദചാമി, 2011-ൽ എറണാകുളം-ഷൊർണൂർ ട്രെയിനിൽ 23-കാരിയായ സൗമ്യയെ ബലാത്സംഗം ചെയ്യുകയും ട്രെയിനിൽ നിന്ന് തള്ളിയിട്ട് കൊലപ്പെടുത്തുകയും ചെയ്ത കേസിൽ ജീവപര്യന്തം തടവിന് ശിക്ഷിക്കപ്പെട്ടവനാണ്. 2012-ൽ തൃശൂർ ഫാസ്റ്റ് ട്രാക്ക് കോടതി വധശിക്ഷ വിധിച്ചെങ്കിലും, 2016-ൽ സുപ്രീം കോടതി ശിക്ഷ ജീവപര്യന്തമായി കുറച്ചു.

ജയിൽചാട്ടത്തിന്റെ പിന്നിലെ ഗൂഢാലോചന, പുറത്ത് നിന്നുള്ള സഹായം, ജയിൽ സുരക്ഷാ വ്യവസ്ഥയിലെ പാളിച്ചകൾ എന്നിവ കണ്ടെത്താൻ കണ്ണൂർ റേഞ്ച് ഡിഐജിയുടെ നേതൃത്വത്തിൽ വിശദമായ അന്വേഷണം നടക്കുകയാണ്. ഒരു കൈ മാത്രമുള്ള പ്രതിക്ക് ഇത്ര സങ്കീർണമായ രക്ഷപ്പെടൽ നടത്താൻ കഴിഞ്ഞത് ജയിൽ വ്യവസ്ഥയെ ചോദ്യം ചെയ്യുന്നതാണ്.