റിയാദ്: ജിസാനിലെ ഗ്യാസ് സ്റ്റേഷനിലെ തീപിടുത്തത്തില്‍ പൊള്ളലേറ്റ് ചികിത്സയില്‍ കഴിഞ്ഞിരുന്ന മലയാളി യുവാവ് മരിച്ചു. കൊല്ലം സ്വദേശി ബിജിന്‍ലാല്‍ ബൈജുവാണ് മരിച്ചത്. ജിസാനിലെ സബിയയിലുള്ള സാസ്‌കോ ഗ്യാസ് സ്‌റ്റേഷനില്‍ കഴിഞ്ഞ വെള്ളിയാഴ്ചയാണ് തീപിടുത്തം ഉണ്ടായത്. പൊള്ളലേറ്റ ബിജിന്‍ലാലിനെ രക്ഷാപ്രവര്‍ത്തകര്‍ കിംഗ് ഫഹദ് ആശുപത്രിയില്‍ എത്തിച്ചിരുന്നു. അത്യാഹിത വിഭാഗത്തില്‍ ചികിത്സയിലിരിക്കെയാണ് യുവാവിന്റെ മരണം. ഇന്ന് രാവിലെയാണ് യുവാവ് മരിച്ചത്.

രണ്ട് വര്‍ഷത്തിലധികമായി സബിയ സാസ്‌കോ ഗ്യാസ് സ്‌റ്റേഷനിലെ ജീവനക്കാരനാണ് ബിജിന്‍ലാല്‍. റിയാദില്‍ നിന്ന് കമ്പനി അധികൃതര്‍ വന്നതിന് ശേഷം നടപടികള്‍ പൂര്‍ത്തിയാക്കും. ബൈജു, ഉഷാകുമാരി എന്നിവരാണ് യുവാവിന്റെ മാതാപിതാക്കള്‍. സഹോദരി: ബിന്ദുമോള്‍.

യുവാവിന്റെ മൃതദേഹം നിലവില്‍ അബൂ ഹരീഷ് കിംഗ് ഫഹദ് ആശുപത്രിയില്‍ സൂക്ഷിച്ചിരിക്കുകയാണ്. ബന്ധപ്പെട്ട നടപടി ക്രമങ്ങള്‍ പൂര്‍ത്തിയാക്കാന്‍ ജിസാന്‍ ജല-ജീവകാരുണ്യ വിഭാഗത്തിന്റെ നേതൃത്വത്തില്‍ ജല വാസലീഹ് യുണിറ്റ് സെക്രട്ടറി സഞ്ജീവന്‍ ചെങ്ങന്നൂരും ട്രഷറര്‍ വിപിനും രംഗത്തുണ്ട്.