ന്യൂഡല്‍ഹി: സ്വാതന്ത്ര്യദിനാഘോഷവുമായി ബന്ധപ്പെട്ട സുരക്ഷാ മോക് ഡ്രില്ലിനിടെ ഡമ്മി ബോംബ് കണ്ടെത്താന്‍ കഴിയാതിരുന്ന ഏഴ് പൊലിസുകാര്‍ക്ക് സസ്‌പെന്‍ഷന്‍. സുരക്ഷാവീഴ്ചയുടെ പേരിലാണ് നടപടി.   കോണ്‍സ്റ്റബിള്‍മാരും ഹെഡ് കോണ്‍സ്റ്റബിള്‍മാരും ഉള്‍പ്പെടെയുള്ള ഡല്‍ഹി പൊലിസ് ഉദ്യോഗസ്ഥരെയാണ് സസ്‌പെന്‍ഡ് ചെയ്തത്.ചെങ്കോട്ടയുടെ സുരക്ഷ ചുമതലയുള്ളവര്‍ക്കെതിരെയാണ് നടപടിയുണ്ടായത്. ചെങ്കോട്ടയില്‍ നടന്ന മോക്ഡ്രില്ലില്‍ ഡമ്മി ബോംബുമായി എത്തിയ ആളെ ഇവര്‍ക്ക്  തിരിച്ചറിയാനാകാത്തതാണ് കാരണം. അവരുടെ അശ്രദ്ധയാണ് സസ്‌പെന്‍ഷന് കാരണമെന്ന് ഉദ്യോഗസ്ഥര്‍ ചൂണ്ടിക്കാട്ടി. 

79-ാമത് സ്വാതന്ത്ര്യദിനാഘോഷത്തിനുള്ള ഒരുക്കങ്ങളുടെ ഭാഗമായി ഡല്‍ഹി പൊലിസ് ദിവസേന സുരക്ഷാ പരിശീലനം നടത്തുന്നുണ്ട്. ശനിയാഴ്ച സ്പെഷ്യല്‍ സെല്‍ നടത്തിയ മോക്ഡ്രില്ലിനിടെ സിവിലിയന്മാരുടെ വേഷം ധരിച്ച് ഡമ്മി ബോംബുമായി ഒരാള്‍ ചെങ്കോട്ട പരിസരത്ത് പ്രവേശിച്ചു. ഡമ്മി ബോംബ് കണ്ടെടുക്കുക എന്നതാണ് ഇവരുടെ ടാസ്‌ക്. എന്നാല്‍ ഈ ഡമ്മി ബോംബ് കണ്ടെത്താന്‍ സുരക്ഷാ ഉദ്യോഗസ്ഥര്‍ക്ക് സാധിച്ചില്ല-  സസ്‌പെന്‍ഷന്റെ കാരണം വിശദീകരിച്ച് ഡല്‍ഹി പൊലിസ് വാര്‍ത്താ ഏജന്‍സിയായ എ.എന്‍.ഐയോട് പറഞ്ഞു. 

ALSO READ: കുതിച്ചുയര്‍ന്ന് പൊന്ന്, ഇപ്പോ വാങ്ങണ്ട; ആഭരണത്തിന്റെ അത്യാവശ്യക്കാര്‍ ഇങ്ങനെ ചെയ്താല്‍ മതി

അതിനിടെ, തിങ്കളാഴ്ച ചെങ്കോട്ട പരിസരത്ത് അതിക്രമിച്ചു കടക്കാന്‍ ശ്രമിച്ച അഞ്ച് ബംഗ്ലാദേശി അനധികൃത കുടിയേറ്റക്കാരെ ഡല്‍ഹി പൊലിസ് അറസ്റ്റ് ചെയ്തിരുന്നു. ഡല്‍ഹിയില്‍ ജോലി ചെയ്യുന്ന ഏകദേശം 20-25 വയസ് പ്രായമുള്ളവരാണ് പിടിയിലായത്. ഇവരില്‍ നിന്ന് ബംഗ്ലാദേശി രേഖകളും കണ്ടെടുത്തതായും കേസില്‍ കൂടുതല്‍ അന്വേഷണം നടത്തിവരികയാണെന്ന് പൊലിസ് അറിയിച്ചു.

സ്വാതതന്ത്ര്യ ദിനത്തോടനുബന്ധിച്ച് ചെങ്കോട്ടയില്‍ ശക്തമായ സുരക്ഷയാണ് ഒരുക്കിയിരിക്കുന്നത്. പ്രദേശം അതീവ സുരക്ഷാ മേഖലയായി പ്രഖ്യാപിച്ചിരിക്കുകയാണ്. പരിസരത്തെ താമസക്കാരുടെ മുഴുവന്‍ വിവരങ്ങളും തയ്യാറാക്കിയിട്ടുണ്ട്. ഹൈടെക് വീഡിയോ അനലിറ്റിക്‌സ്, നൂതന വാഹന സ്‌കാനിംഗ് സംവിധാനങ്ങള്‍ എന്നിവയും സ്ഥാപിച്ചിരിക്കുകയാണ്. സ്വാതന്ത്ര്യദിനാഘോഷത്തിന് മുമ്പുള്ള ദിവസങ്ങളില്‍ അഞ്ച് തരം നിരീക്ഷണ ക്യാമറകള്‍ സ്ഥാപിക്കുമെന്നും ബന്ധപ്പെട്ടവര്‍ അറിയിച്ചു. സംശയാസ്പദമായ വസ്തുക്കളെ ഹൈലൈറ്റ് ചെയ്യാന്‍ കൂടി രൂപകല്‍പ്പന ചെയ്തിട്ടുള്ള കാമറയാണ് സ്ഥാപിക്കുന്നതെന്നും ഉദ്യോഗസ്ഥര്‍ വ്യക്തമാക്കി.

Seven Delhi Police personnel, including constables and head constables, have been suspended for failing to detect a dummy bomb during a security mock drill at Red Fort ahead of Independence Day. Officials cited negligence as the reason for the action.