ഡെറാഡൂൺ: ഉത്തരാഖണ്ഡിലെ ഖീർ നദിയിൽ ഉണ്ടായ മിന്നൽ പ്രളയത്തിൽ കുടുങ്ങിയവരുടെ ജീവൻ രക്ഷിക്കുകയാണ് പ്രഥമ പരിഗണനയെന്ന് മുഖ്യമന്ത്രി പുഷ്കർ സിങ് ധാമി വ്യക്തമാക്കി. പ്രളയബാധിത പ്രദേശങ്ങളിലെ സ്ഥിതിഗതികൾ ഏകോപിപ്പിക്കുന്നതിനായി സംസ്ഥാന ദുരന്ത നിവാരണ സേന അടിയന്തര യോഗം ചേർന്നു. ഉത്തരകാശിയിൽ ഇന്നലെ ഉച്ചയോടെ ഉണ്ടായ മേഘവിസ്ഫോടനത്തെ തുടർന്നുണ്ടായ മിന്നൽ പ്രളയത്തിൽ നാല് പേരുടെ മരണം സ്ഥിരീകരിച്ചു. 130 പേരെ രക്ഷപ്പെടുത്തിയതായും റിപ്പോർട്ടുണ്ട്. പ്രളയത്തിൽ പുരാതന ശിവക്ഷേത്രമായ കൽപ കേദാറിന്റെ അവശിഷ്ടങ്ങൾ ഖീർ നദിയിൽ കണ്ടെത്തിയതായും സൂചനകൾ ഉണ്ട്.

പ്രദേശത്ത് ശക്തമായ മഴ തുടരുകയാണ്. പലയിടത്തും മണ്ണിടിച്ചിലുകൾ റിപ്പോർട്ട് ചെയ്തിട്ടുണ്ട്. ഉത്തരകാശി-ധരാലി റോഡ് ഒലിച്ചുപോയി. തകർന്ന റോഡുകൾ, മോശം കാലാവസ്ഥ, കുത്തനെയുള്ള ഭൂപ്രദേശം എന്നിവ രക്ഷാപ്രവർത്തനങ്ങളെ ഏറെ ദുഷ്കരമാക്കുന്നു. പ്രദേശത്ത് ഓറഞ്ച് അലേർട്ട് പ്രഖ്യാപിച്ചിട്ടുണ്ട്. നദീതീരങ്ങളിലുള്ളവരോട് സുരക്ഷിത സ്ഥാനങ്ങളിലേക്ക് മാറാൻ നിർദേശം നൽകിയിട്ടുണ്ട്. വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചു.

അതിനിടെ, ഉത്തർപ്രദേശ് മുഖ്യമന്ത്രി യോഗി ആദിത്യനാഥ് പുഷ്കർ സിങ് ധാമിയുമായി ഫോൺ വഴി സംസാരിച്ച് പൂർണ പിന്തുണ വാഗ്ദാനം ചെയ്തു. രക്ഷാപ്രവർത്തനങ്ങൾക്ക് ആവശ്യമായ എല്ലാ സഹായവും യുപി സർക്കാർ നൽകുമെന്ന് അറിയിച്ചു. ഗംഗോത്രിയിലേക്കുള്ള പ്രധാന ഇടത്താവളമായ ധരാലിയിൽ നിരവധി ഹോട്ടലുകൾ, റെസ്റ്റോറന്റുകൾ, ഹോംസ്റ്റേകൾ എന്നിവയുണ്ട്. മേഘവിസ്ഫോടനം ഈ പ്രദേശത്ത് വൻ നാശനഷ്ടമാണ് വിതച്ചത്.

ഉത്തരകാശിയിലെ മിന്നൽ പ്രളയത്തിൽ കാണാതായ 10 സൈനികർക്കായുള്ള തിരച്ചിൽ തുടരുകയാണ്. സൈനിക ക്യാമ്പ് ഒലിച്ചുപോയതായി ഇന്നലെ രാത്രി റിപ്പോർട്ടുകൾ പുറത്തുവന്നു. പ്രദേശത്ത് 200-ലധികം പേർ ഉണ്ടായിരുന്നതായാണ് വിവരം.

പ്രധാനമന്ത്രി നരേന്ദ്ര മോദി ഉത്തരകാശിയിലെ സ്ഥിതിഗതികൾ നിരീക്ഷിക്കുകയാണെന്നും എല്ലാ സഹായവും ഉറപ്പാക്കുമെന്നും വ്യക്തമാക്കി. അവശിഷ്ടങ്ങൾക്കടിയിൽ നിരവധി പേർ കുടുങ്ങിക്കിടക്കുന്നതായി റിപ്പോർട്ടുകൾ സൂചിപ്പിക്കുന്നു. ആളുകൾ നിലവിളിക്കുന്ന ഭയാനകമായ വീഡിയോകൾ സാമൂഹ്യ മാധ്യമങ്ങളിൽ പ്രചരിക്കുന്നുണ്ട്.