രോഹിത് ശർമയുടെ പകരക്കാരനായി ഇന്ത്യൻ ഏകദിന ടീമിന്റെ ക്യാപ്റ്റനായി വരേണ്ടത് ഏത് താരമാണെന്ന് തുറന്നു പറഞ്ഞിരിക്കുകയാണ് മുൻ ഇന്ത്യൻ താരം മുഹമ്മദ് കൈഫ്. ശുഭ്മൻ ഗില്ലിനെയാണ് ഇന്ത്യൻ വൈറ്റ് ബോൾ ക്യാപ്റ്റനാവാൻ കൈഫ് പിന്തുണച്ചത്. ഇംഗ്ലണ്ടിനെതിരെയുള്ള ടെസ്റ്റ് പരമ്പരയിൽ ഗില്ലിന്റെ ക്യാപ്റ്റൻസി വളരെ മികച്ചതായിരുന്നുവെന്നും കൈഫ് പറഞ്ഞു. തന്റെ യൂട്യൂബ് ചാനലിലൂടെ സംസാരിക്കുകയായിരുന്നു കൈഫ്.

''രോഹിത് ശർമ്മ എത്ര കാലത്തോളം ഇന്ത്യൻ ഏകദിന ക്യാപ്റ്റനായി തുടരുമെന്ന് അറിയാത്തതിനാൽ ഗില്ലിന് ഏകദിന ക്യാപ്റ്റൻസി ലഭിക്കും. ഗിൽ ഈ ചുമതല ഏറ്റെടുക്കാൻ തയ്യാറാവും. വൈറ്റ് ബോൾ ക്രിക്കറ്റിൽ അദ്ദേഹം റൺസ് സ്കോർ ചെയ്യുന്നുണ്ട്. ടെസ്റ്റിൽ ക്യാപ്റ്റനായി ഗിൽ മികച്ച പ്രകടനം നടത്തി. ടീമിനെ മുന്നിൽ നിന്നും നയിച്ചു. ഒരു യുവ ടീമിനൊപ്പം പോവുമ്പോൾ ക്യാപ്റ്റനായി രണ്ട് കാര്യങ്ങൾ ചെയ്യണം. നന്നായി റൺസ് നേടുക, ക്യാപ്റ്റനായി മികച്ച പ്രകടനം നടത്തുക. ഗില്ലിന് ഒരു മികച്ച പരമ്പരയായിരുന്നു ഇത്'' മുഹമ്മദ് കൈഫ് പറഞ്ഞു. 

ഇംഗ്ലണ്ടിനെതിരെ ക്യാപ്റ്റനായുള്ള ആദ്യ പരമ്പരയിൽ തന്നെ മിന്നുന്ന പ്രകടനമാണ് ശുഭ്മൻ ഗിൽ കാഴ്ചവെച്ചത്. ക്യാപ്റ്റൻസിയിലും ബാറ്റിങ്ങിലും ഒരുപോലെ തിളങ്ങിയാണ് ഗിൽ തന്റെ അരങ്ങേറ്റ പരമ്പര അവിസ്മരണീയമാക്കിയത്. ഈ പരമ്പരയിൽ 754 റൺസാണ് ഇന്ത്യൻ ക്യാപ്റ്റൻ അടിച്ചെടുത്തത്. ഒരു ഡബിൾ സെഞ്ച്വറിയും മൂന്ന് സെഞ്ച്വറിയും നേടിയാണ് ഗിൽ നേടിയത്. പരമ്പരയിലെ പ്ലയെർ ഓഫ് ദി സീരിസായും തെരഞ്ഞെടുക്കപ്പെട്ടത് ഗിൽ തന്നെയാണ്. 

ഇംഗ്ലണ്ടിനെതിരായ രണ്ടാം ടെസ്റ്റ് മത്സരത്തിൽ 336 റൺസിന്റെ കൂറ്റൻ വിജയമായിരുന്നു ഇന്ത്യ സ്വന്തമാക്കിയത്. എഡ്ജ്ബാസ്റ്റൺ സ്റ്റേഡിയത്തിൽ ഇന്ത്യയുടെ ആദ്യ ടെസ്റ്റ് വിജയമായിരുന്നു ഇത്. ഇതിനു മുമ്പ് ഈ വേദിയിൽ ഇതുവരെ എട്ട് മത്സരങ്ങളിലാണ് ഇന്ത്യ കളിച്ചിട്ടുള്ളത്. ഇതിൽ ഏഴ് മത്സരങ്ങൾ പരാജയപ്പെട്ടപ്പോൾ ഒരു മത്സരം സമനിലയിൽ പിരിയുകയും ചെയ്തു. എന്നാൽ രണ്ടാം ടെസ്റ്റ് വിജയത്തോടെ മറ്റൊരു ക്യാപ്റ്റനും നേടാനാവാത്ത ചരിത്ര നേട്ടവും ഗിൽ ഈ വിജയത്തോടെ സ്വന്തമാക്കിയിരുന്നു. 

അടുത്ത ഏകദിന ലോകകപ്പ് 2027ലാണ് നടക്കുന്നത്. ഈ സമയമാവുമ്പോൾ രോഹിത്തിന് 40 വയസ്സാവും. ഈ സാഹചര്യത്തിൽ ഇന്ത്യൻ ഏകദിന ക്യാപ്റ്റനായുള്ള രോഹിത്തിന്റെ ഭാവി ഒരു വലിയ ചോദ്യചിഹ്നമായി നിലനിൽക്കുകയാണ്. 

Former Indian cricketer Mohammad Kaif has openly stated who should replace Rohit Sharma as the captain of the Indian ODI team Kaif has backed Shubman Gill to become the Indian white-ball captain