മേജർ ലീഗ് സോക്കറിൽ ഇന്ന് നടന്ന മത്സരത്തിൽ ഇന്റർ മയാമി വമ്പൻ വിജയമാണ് സ്വന്തമാക്കിയത്. ന്യൂ ഇംഗ്ലണ്ടിനെ ഒന്നിനെതിരെ നാല് ഗോളുകൾക്കാണ് ഇന്റർ മയാമി പരാജയപ്പെടുത്തിയത്. മത്സരത്തിൽ ഇന്റർ മയാമിക്കായി ജോഡി ആൽബ, ടാഡിയോ അല്ലെൻഡെ എന്നിവർ ഇരട്ട ഗോൾ നേടി മിന്നും പ്രകടനം നടത്തിയപ്പോൾ മയാമി മിന്നും വിജയം സ്വന്തമാക്കുകയായിരുന്നു. 

മത്സരത്തിൽ മായാമിക്ക് വേണ്ടി ഗോളുകൾ നേടാൻ സാധിച്ചില്ലെങ്കിലും അവിസ്മരണീയമായ പ്രകടനമായിരുന്നു സൂപ്പർ താരം ലയണൽ മെസി പുറത്തെടുത്തത്. മത്സരത്തിൽ ഹാട്രിക് അസിസ്റ്റ് നേടിയാണ് മെസി തിളങ്ങിയത്. ഇതോടെ ഇന്റർ മയാമിക്കൊപ്പം 100 ഗോൾ കോൺട്രിബ്യൂഷൻ എന്ന പുതിയ നേട്ടത്തിലെത്താനും അർജന്റൈൻ ഇതിഹാസത്തിന് സാധിച്ചു. ഇതുവരെ മയാമിക്ക് വേണ്ടി 66 ഗോളുകളും 34 അസിസ്റ്റുകളും നേടിയാണ് മെസി മുന്നേറുന്നത്. 

2023ൽ ഫ്രഞ്ച് ക്ലബ്ബായ പാരീസ് സെയ്ന്റ് ജെർമെയ്‌നിൽ നിന്നാണ് മെസി അമേരിക്കയിലേക്ക് കൂടുമാറിയത്. സൂപ്പർ താരത്തിന്റെ വരവിന് പിന്നാലെ മേജർ ലീഗ് സോക്കറിന് ലോക ഫുട്ബോളിൽ ഒരു കൃത്യമായ മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. വെറും രണ്ടു വർഷത്തിനുള്ളിൽ തന്നെ ഗോൾ കോൺട്രിബ്യൂഷനിൽ സെഞ്ച്വറി പൂർത്തിയാക്കി കൊണ്ടാണ് ഇന്റർമയാമി നായകൻ പുതിയ നാഴികക്കല്ല് സൃഷ്ടിച്ചിരിക്കുന്നത്. 

മത്സരത്തിൽ ബോൾ പൊസഷനിലും ഷോട്ടുകളുടെ എണ്ണത്തിലും ഇന്റർ മയാമി ആയിരുന്നു മുന്നിട്ടു നിന്നത്. 56 ശതമാനം ബോൾ പൊസഷൻ സ്വന്തമാക്കിയ മെസിയും സംഘവും 15 ഷോട്ടുകളാണ് എതിരാളികളുടെ പോസ്റ്റിലേക്ക് ഉതിർത്തത്. ഇതിൽ എട്ട് ഷോട്ടുകളും ഓൺ ടാർഗറ്റിലേക്ക് ആയിരുന്നു. മറുഭാഗത്ത് 11 ഷോട്ടുകളിൽ നിന്നും വെറും 5 ഷോട്ടുകൾ മാത്രമേ ന്യൂ ഇംഗ്ലണ്ടിന് ഇന്റർ മയാമിയുടെ പോസ്റ്റിലേക്ക് എത്തിക്കാൻ സാധിച്ചത്. 

നിലവിൽ മേജർ ലീഗ് സോക്കർ മൂന്നാം സ്ഥാനത്താണ് ഇന്റർ മയാമി. 32 മത്സരങ്ങളിൽ നിന്നും 17 വിജയവും 8 സമനിലയും 7 തോൽവിയും അടക്കം 59 പോയിന്റാണ് ഇന്റർ മയാമിയുടെ കൈവശമുള്ളത്. എംഎൽഎസിൽ അറ്റ്ലാൻഡ യുണൈറ്റഡിനെതിരെ ഒക്ടോബർ 12നാണ് മെസിയുടെയും സംഘത്തിന്റെയും അടുത്ത മത്സരം. ചെയ്‌സ് സ്റ്റേഡിയത്തിലാണ് മത്സരം നടക്കുന്നത്.  

Inter Miami won a huge victory in the match held today in Major League Soccer. Inter Miami defeated New England by 4 goals to 1. Lionel Messi shone in the match by scoring a hat-trick assist. With this, the Argentine legend was able to reach a new milestone of 100 goal contributions with Inter Miami.