തിരുവനന്തപുരം: 2025ലെ വയലാര്‍ രാമവര്‍മ്മ മെമ്മോറിയല്‍ സാഹിത്യ അവാര്‍ഡ് ഇ. സന്തോഷ് കുമാറിന്.  തപോമയിയുടെ അച്ഛന്‍ എന്ന കൃതിക്കാണ് പുരസ്‌ക്കാരം. മാധ്യമം ആഴ്ചപ്പതിപ്പില്‍ 2024 മാര്‍ച്ച് മുതലാണ് 'തപോമയിയുടെ അച്ഛന്‍' പ്രസിദ്ധീകരിച്ചത്. ഒരുലക്ഷം രൂപയും കാനായി കുഞ്ഞിരാമന്‍ വെങ്കലത്തില്‍ നിര്‍മിക്കുന്ന ശില്‍പവും പ്രശസ്തി പത്രവുമാണ് അവാര്‍ഡ്. 

കഴിഞ്ഞ അഞ്ചുവര്‍ഷത്തിനിടെ പ്രസിദ്ധീകരിച്ച മലയാളത്തിലെ മൗലിക കൃതികളില്‍ നിന്നാണ് അവാര്‍ഡിനര്‍ഹമായ കൃതി തെരഞ്ഞെടുത്തതെന്ന് വയലാര്‍ രാമവര്‍മ്മ മെമ്മോറിയല്‍ ട്രസ്റ്റ് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. കഥ, കവിത, നോവല്‍, വിമര്‍ശനം തുടങ്ങി ഏതു ശാഖയില്‍പ്പെട്ട കൃതികളും പരിഗണിക്കും.

ALSO READ: ഒമ്പതുകാരിയുടെ കൈമുറിച്ചുമാറ്റിയ സംഭവത്തിൽ ഡോക്ടർമാരെ സംരക്ഷിച്ച് റിപ്പോർട്ട്; എതിർത്ത് കുടുംബം, കോടതിയിലേക്ക്

വയലാര്‍ രാമവര്‍മ്മയുടെ ചരമദിനമായ ഒക്ടോബര്‍ 27ന് വൈകിട്ട് 5.30ന് തിരുവനന്തപുരം നിശാഗന്ധി ഓഡിറ്റോറിയത്തില്‍ നടക്കുന്ന ചടങ്ങിലാണ്  അവാര്‍ഡ് സമര്‍പ്പിക്കുക. വയലാര്‍ രാമവര്‍മ്മ രചിച്ച ഗാനങ്ങളും കവിതകളും കൃതികളും കോര്‍ത്തിണക്കിയുള്ള കവിതാലാപാനം, നൃത്താവിഷ്‌കാരം, ശാസ്ത്രീയ സംഗീതസമര്‍പ്പണം, ഗാനാജ്ഞലി എന്നിവ ഉണ്ടായിരിക്കും.

ടി.ഡി. രാമകൃഷ്ണന്‍, ഡോ. എന്‍.പി. ഹാഫീസ് മുഹമ്മദ്, എ.എസ്. പ്രിയ എന്നിവരാണ് ജഡ്ജിങ് കമ്മിറ്റി അംഗങ്ങള്‍. വയലാര്‍ രാമവര്‍മ്മ മെമ്മോറിയല്‍ ട്രസ്റ്റ് പ്രസിഡന്റ് പെരുമ്പടവം ശ്രീധരന്‍ ജഡ്ജിങ് കമ്മിറ്റി യോഗത്തില്‍ അധ്യക്ഷത വഹിച്ചു. വാര്‍ത്താസമ്മേളനത്തില്‍ ട്രസ്റ്റ് സെക്രട്ടറി അഡ്വ. ബി. സതീശന്‍, ടി.ഡി. രാമകൃഷ്ണന്‍, ഡോ. എന്‍.പി. ഹാഫിസ് മുഹമ്മദ്, പ്രിയ എ.എസ്, ട്രസ്റ്റ് പ്രസിഡന്റ് പെരുമ്പടവം ശ്രീധരന്‍, ട്രസ്റ്റ് അംഗങ്ങളായ പ്രഭാവര്‍മ്മ, ശാരദാമുരളീധരന്‍, ഗൗരിദാസന്‍നായര്‍, ഡോ.വി.രാമന്‍കുട്ടി, ട്രസ്റ്റ് സെക്രട്ടറി അഡ്വ. ബി. സതീശന്‍ എന്നിവര്‍ പങ്കെടുത്തു.

Malayalam writer E. Santhosh Kumar has been awarded the 49th Vayalar Literary Award for his novel Thapomayiyude Achan. The award carries a cash prize of ₹1 lakh along with a citation and a sculpture.