ക്രിസ്റ്റ്യാനോ റൊണാൾഡോ, ലയണൽ മെസി ഇവരിൽ ആരാണ് ഏറ്റവും മികച്ച താരം എന്നത് ഫുട്ബോൾ ലോകത്ത് രണ്ട് പതിറ്റാണ്ടുകളായി സജീവമായി നിലനിൽക്കുന്ന ചർച്ചാവിഷയമാണ്. ഇപ്പോൾ റൊണാൾഡോയാണോ മെസിയാണോ ഫുട്ബോളിലെ ഗോട്ട് എന്ന ചോദ്യത്തിന് മറുപടി നൽകിയിരിക്കുകയാണ് ജർമൻ ഇതിഹാസ താരം തോമസ് മുള്ളർ. 

ആദ്യകാലങ്ങളിൽ താൻ റൊണാൾഡോയെയാണ് മികച്ച താരമായി കരുതിയതെന്നും എന്നാൽ മെസി അർജന്റീനക്കൊപ്പം ലോകകപ്പ് നേടിയതോടെ മെസിയെ മികച്ച താരമായി താൻ പിന്തുണച്ചുവെന്നുമാണ് മുള്ളർ പറഞ്ഞത്. എംഎൽഎസിനായുള്ള അഭിമുഖത്തിൽ മൗറീസ് എഡുവിനോട് സംസാരിക്കുകയായിരുന്നു ജർമൻ ഇതിഹാസം. 

''എനിക്ക് മെസിയാണ് മികച്ച കളിക്കാരനായി തോന്നുന്നത്. റൊണാൾഡോയും മെസിയും അവിശ്വസനീയ പ്രതിഭകളാണ്. എന്നാൽ മെസി കുറച്ചുകൂടി ഗംഭീര പ്ലെയറാണ്. 2022ൽ അർജന്റീനക്കൊപ്പം ലോകകപ്പ് നേടിയതോടെ ഞാൻ മെസിയെ പിന്തുണക്കുന്നു. എന്റെ കരിയറിന്റെ ആദ്യ 10 വർഷങ്ങളിൽ ഞാൻ റൊണാൾഡോയെ പിന്തുണച്ചിരുന്നു. എന്നാൽ, ഇപ്പോൾ എനിക്ക് അൽപ്പം പ്രായമായി. മെസിയുടെ പ്രകടനവും ജോലി നൈതികതയും മാത്രമല്ല ഞാൻ സ്റ്റൈലിനാണ് കൂടതൽ പിന്തുണ നൽകുന്നത്'' തോമസ് മുള്ളർ പറഞ്ഞു.

മെസി ഇപ്പോഴും ഫുട്ബോളിൽ മിന്നും പ്രകടനങ്ങളാണ് തന്റെ ടീമിന് വേണ്ടി നടത്തിക്കൊണ്ടിരിക്കുന്നത്. മെസി നിലവിൽ മേജർ ലീഗ് സോക്കർ ക്ലബായ ഇന്റർ മയാമിക്ക് വേണ്ടിയാണ് കളിക്കുന്നത്. മെസിയുടെ വരവോടെ ഇന്റർ മയാമി ലീഗിൽ മിന്നും പ്രകടനമായിരുന്നു നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. 

അതേസമയം മുള്ളറും നിലവിൽ എംഎൽഎസിലാണ് കളിക്കുന്നത്. വാൻകൂവർ വൈറ്റ്‌ക്യാപ്‌സിന്റെ താരമാണ് മുള്ളർ. ബയേൺ മ്യൂണിക്കിനൊപ്പമുള്ള നീണ്ട വർഷത്തെ പോരാട്ടത്തിന്റെ അധ്യായങ്ങൾക്ക് വിരാമമിട്ട് ഈ സീസണിലാണ് മുള്ളർ അമേരിക്കയിലേക്ക് ചേക്കേറിയത്. 2025 എംഎൽഎസ് സീസൺ മുതൽ 2026 സീസൺ വരെ മുള്ളർ വാൻകൂവർ വൈറ്റ്‌ക്യാപ്‌സിനായി കളിക്കും. 

ജർമൻ ക്ലബ്ബിനൊപ്പമുള്ള നീണ്ട 16 വർഷത്തെ ഫുട്ബോൾ യാത്രക്ക് അവസാനമിട്ടാണ് മുള്ളർ അമേരിക്കൻ മണ്ണിലേക്ക് ചേക്കേറിയത്. ബയേൺ മ്യൂണിക്കിനായി 750 മത്സരങ്ങളിൽ ബൂട്ട് കെട്ടിയ മുള്ളർ 248 ഗോളുകളും 222 അസിസ്റ്റുകളും ആണ്  സ്വന്തമാക്കിയിട്ടുള്ളത്.

മുള്ളർ ജർമൻ ക്ലബിനൊപ്പം ഒരുപിടി കിരീടങ്ങളും സ്വന്തമാക്കിയിട്ടുണ്ട്. 13 ബുണ്ടസ്ലിഗ കിരീടങ്ങളും രണ്ട് യുവേഫ ചാമ്പ്യൻസ് ലീഗ് കിരീടങ്ങൾ ഉളപ്പടെ 33 കിരീടങ്ങൾ മുള്ളർ നേടിയിട്ടുണ്ട്. എട്ട് ഡിഎഫ്എൽ സൂപ്പർകപ്പ്, ആറ് ഡിഎഫ്എൽ കപ്പ്, രണ്ട് വീതം യുവേഫ സൂപ്പർ കപ്പ്,  ഫിഫ ക്ലബ് ലോകകപ്പ്  എന്നീ കിരീടങ്ങളാണ് താരം നേടിയിട്ടുള്ളത്. 

ഈ സീസണിൽ ലയണൽ മെസിക്കെതിരെ മുള്ളർ വീണ്ടും കളിക്കുന്നത് ഫുട്ബോൾ ആരാധകർക്ക് കാണാൻ സാധിക്കും. ദേശിയ തലത്തിലും ക്ലബ് തലത്തിലും മെസിക്കെതിരെ പല മത്സരങ്ങളിലും മുള്ളർ വിജയം സ്വന്തമാക്കിയിട്ടുണ്ട്. ഇത് മേജർ ലീഗ് സോക്കറിലും അവർത്തിക്കുമോയെന്ന് കണ്ടുതന്നെ അറിയണം.

German legend Thomas Muller has answered the question of who is the GOAT in football, Cristiano Ronaldo or Lionel Messi