ഇസ്താംബുൾ: ഗസ്സയിലെ നിരന്തരമായ ആക്രമണത്തിൽ പ്രതിഷേധിച്ച് ഇസ്റാഈലിനെതിരെ കടുത്ത നടപടിയുമായി തുർക്കി. ഇസ്റാഈൽ വിമാനങ്ങൾക്ക് തുർക്കിയുടെ വ്യോമാതിർത്തിയിൽ പ്രവേശിക്കുന്നതിന് വിലക്കേർപ്പെടുത്തിയതായി വിദേശകാര്യ മന്ത്രി ഹകാൻ ഫിദാൻ വെള്ളിയാഴ്ച വ്യക്തമാക്കി. ഇസ്റാഈലുമായുള്ള വ്യാപാര ബന്ധം പൂർണമായും അവസാനിപ്പിച്ചതായും അദ്ദേഹം പറഞ്ഞു.

ALSO READ: കംബോഡിയൻ നേതാവിനെ 'അങ്കിൾ' എന്നുവിളിച്ച ഫോൺ സംഭാഷണം പുറത്തായി; തായ്‌ലൻഡ് പ്രധാനമന്ത്രി പയേതുങ്താൻ ഷിനവത്രയെ പുറത്താക്കി കോടതി 

"ഇസ്റാഈലുമായുള്ള എല്ലാ വ്യാപാരവും ഞങ്ങൾ അവസാനിപ്പിച്ചു. തുർക്കി കപ്പലുകൾക്ക് ഇസ്റാഈൽ തുറമുഖങ്ങളിലേക്ക് പോകാൻ അനുവാദമില്ല. അവരുടെ വിമാനങ്ങൾക്ക് ഞങ്ങളുടെ വ്യോമാതിർത്തിയിൽ പ്രവേശിക്കാനും അനുമതിയില്ല," അങ്കാറയിൽ ഗസ്സയെക്കുറിച്ച് നടന്ന പ്രത്യേക പാർലമെന്ററി ചർച്ചയിൽ ഫിദാൻ വ്യക്തമാക്കി.

കഴിഞ്ഞ വർഷം മേയ് മാസത്തിൽ ഇസ്റാഈലുമായുള്ള നേരിട്ടുള്ള എല്ലാ വ്യാപാരവും തുർക്കി നിർത്തിവച്ചിരുന്നു. ​ഗസ്സയിൽ ശാശ്വതമായ വെടിനിർത്തൽ പ്രഖ്യാപിക്കണമെന്നും മാനുഷിക സഹായം എത്തിക്കണമെന്നും തുർക്കി ആവശ്യപ്പെട്ടിരുന്നു. 2023-ൽ ഇരു രാജ്യങ്ങളും 7 ബില്യൺ ഡോളറിന്റെ വ്യാപാരം നടത്തിയിരുന്നതായാണ് കണക്കുകൾ.

ഇസ്റാഈലുമായി ബന്ധപ്പെട്ട കപ്പൽ ഗതാഗതത്തിനും തുർക്കി നിരോധനം ഏർപ്പെടുത്തിയതായി മാധ്യമങ്ങൾ കഴിഞ്ഞ ആഴ്ച റിപ്പോർട്ട് ചെയ്തിരുന്നു. ഇസ്റാഈൽ കപ്പലുകൾക്ക് തുർക്കി തുറമുഖങ്ങളിൽ പ്രവേശിക്കാൻ അനുവാദമില്ലെന്നും തുർക്കി പതാക വഹിക്കുന്ന കപ്പലുകൾ ഇസ്റാഈൽ തുറമുഖങ്ങളിൽ പ്രവേശിക്കുന്നത് വിലക്കിയതായും റിപ്പോർട്ടുകൾ സൂചിപ്പിക്കുന്നു.

ALSO READ: ഇസ്‌റാഈൽ ആക്രമണത്തിൽ ഹൂതി പ്രധാനമന്ത്രി അഹമ്മദ് അൽ റഹാവി കൊല്ലപ്പെട്ടെന്ന് റിപ്പോർട്ട്; സ്ഥിരീകരിക്കാതെ ഇസ്‌റാഈലും ഹൂതികളും 

ഗസ്സയിൽ ഇസ്റാഈൽ നടത്തുന്ന ആക്രമണങ്ങളെ തുർക്കി പ്രസിഡന്റ് റജബ് തയ്യിബ് എർദോഗൻ അടുത്തിടെ കടുത്ത ഭാഷയിൽ വിമർശിച്ചിരുന്നു. ഇസ്റാഈൽ നടപടികളെ വംശഹത്യയെന്ന് വിശേഷിപ്പിച്ച അദ്ദേഹം പ്രധാനമന്ത്രി ബെഞ്ചമിൻ നെതന്യാഹുവിനെ ഹിറ്റ്ലറിനോട് ഉപമിക്കുകയും ചെയ്തിരുന്നു.

കഴിഞ്ഞ നവംബറിൽ, അസർബൈജാനിൽ നടന്ന അന്താരാഷ്ട്ര ഉച്ചകോടിയിൽ പങ്കെടുക്കാൻ ഇസ്റാഈൽ പ്രസിഡന്റ് ഐസക് ഹെർസോഗിന്റെ വിമാനത്തിന് തുർക്കി വ്യോമാതിർത്തിയിൽ പ്രവേശിക്കാൻ അനുമതി നിഷേധിച്ചിരുന്നു. "ചില വിഷയങ്ങളിൽ ഞങ്ങൾക്ക് ഉറച്ച നിലപാട് സ്വീകരിക്കേണ്ടതുണ്ട്," എർദോഗൻ പിന്നീട് ഇതേക്കുറിച്ച് വ്യക്തമാക്കി.

the turkish foreign minister announces a complete halt in trade with israel and bans israeli planes from entering turkish airspace. the statement marks a significant diplomatic shift.