കാസര്‍ഗോഡ്: കാസര്‍കോട് കുമ്പള ഹയര്‍ സെക്കണ്ടറി സ്‌കൂളില്‍ കലോത്സവത്തില്‍ പലസ്തീന്‍ ദുരിതം വിഷയമാക്കിയുള്ള മൈം ഷോ അവതരിപ്പിക്കാന്‍ അനുവദിക്കാതെ അധ്യാപകന്‍. ഇന്നലെയായിരുന്നു സംഭവം. മൈം ഷോ കഴിയുന്നതിന് മുന്‍പ് അധ്യാപകന്‍ കര്‍ട്ടന്‍ താഴ്ത്തുകയായിരുന്നു. 

ഗസ്സയിലും പലസ്തീനിലും കുഞ്ഞുങ്ങള്‍ അടക്കം കൊല്ലപ്പെടുന്നത് പ്രമേയമാക്കിയാണ് പ്ലസ് ടു വിദ്യാര്‍ഥികള്‍ മൈം അവതരിപ്പിച്ചത്. എന്നാല്‍ പരിപാടി ആരംഭിച്ച് രണ്ടര മിനിറ്റ് ആയപ്പോഴേക്കും അധ്യാപകന്‍ ഇടപെട്ട് കര്‍ട്ടന്‍ താഴ്ത്തുകയായിരുന്നു. 

മൈം ഷോ അവതരിപ്പിച്ച വിദ്യാര്‍ഥികളെ അധ്യാപകന്‍ മര്‍ദ്ദിച്ചെന്നും ആരോപണമുണ്ട്. സംഭവത്തില്‍ പ്രതിഷേധിച്ച് എം.എസ്.എഫ് സ്‌കൂളിലേക്ക് മാര്‍ച്ച് നടത്തി

ALSO READ: ട്രംപിന്റെ സമാധാന പദ്ധതി ഭാഗികമായി അംഗീകരിച്ചു ഹമാസ്, പിന്നാലെ ഇസ്‌റാഈലിനോട് ബോംബിങ് നിർത്താൻ ട്രംപിന്റെ താക്കീത്

അതേസമയം, സംഭവം ശ്രദ്ധയില്‍പെട്ടിട്ടുണ്ടെന്നും ഇക്കാര്യം അടിയന്തിരമായി അന്വേഷിച്ച് റിപ്പോര്‍ട്ട് നല്‍കാന്‍ പൊതുവിദ്യാഭ്യാസ ഡയറക്ടര്‍ക്ക് നിര്‍ദ്ദേശം നല്‍കിയിട്ടുണ്ടെന്നും വിദ്യാഭ്യാസമന്ത്രി വി ശിവന്‍കുട്ടി അറിയിച്ചു. 

'' ഒരു കാര്യം വ്യക്തമായി പറയാം. പലസ്തീനില്‍ ഇസ്രയേല്‍ നടത്തുന്ന വംശഹത്യയ്ക്ക് എതിരെ എന്നും നിലപാട് എടുത്ത ജനവിഭാഗമാണ് കേരളം. പലസ്തീനില്‍ വേട്ടയാടപ്പെടുന്ന കുഞ്ഞുങ്ങള്‍ക്കൊപ്പമാണ് കേരളം.പലസ്തീന്‍ വിഷയത്തില്‍ അവതരിപ്പിച്ച മൈം തടയാന്‍ ആര്‍ക്കാണ് അധികാരം''- മന്ത്രി ചോദിച്ചു. 

കുമ്പള സ്‌കൂളിലെ വിദ്യാര്‍ത്ഥികള്‍ക്ക് ഇതേ മൈം വേദിയില്‍ അവതരിപ്പിക്കാന്‍ അവസരമൊരുക്കുമെന്നും മന്ത്രി സമൂഹമാധ്യമത്തില്‍ കുറിച്ചു. 

ALSO READ: പൊന്നുമോളുടെ നാവിന്‍ തുമ്പില്‍ പിതാവ് ആദ്യാക്ഷരം കുറിച്ചു 'ഗസ്സ'; പിന്നെ ആ കുഞ്ഞുവിരല്‍ത്തുമ്പാല്‍ അയാള്‍ എഴുതിച്ചു ''ഫലസ്തീന്‍ കുഞ്ഞുങ്ങളെ സംരക്ഷിക്കുക'' 

ഫേസ്ബുക്ക് കുറിപ്പിന്റെ പൂര്‍ണരൂപം

കാസര്‍ഗോഡ് കുമ്പള ഹയര്‍ സെക്കണ്ടറി സ്‌കൂളില്‍ കലോത്സവത്തില്‍ മൈം അവതരിപ്പിച്ചതിന് പരിപാടി നിര്‍ത്തി വെപ്പിയ്ക്കുകയും കലോത്സവം തന്നെ മാറ്റി വെയ്ക്കുകയും ചെയ്ത സംഭവം ശ്രദ്ധയില്‍പ്പെട്ടു. ഇക്കാര്യം അടിയന്തിരമായി അന്വേഷിച്ച് റിപ്പോര്‍ട്ട് നല്‍കാന്‍ പൊതുവിദ്യാഭ്യാസ ഡയറക്ടര്‍ക്ക് നിര്‍ദ്ദേശം നല്‍കിയിട്ടുണ്ട്. 

പലസ്തീന്‍ വിഷയത്തില്‍ മൈം 
അവതരിപ്പിച്ചതിനാണ് നടപടി എന്നാണ് മനസ്സിലാക്കുന്നത്. ഒരു കാര്യം വ്യക്തമായി പറയാം. പലസ്തീനില്‍ ഇസ്രയേല്‍ നടത്തുന്ന 
വംശഹത്യയ്ക്ക് എതിരെ എന്നും നിലപാട് എടുത്ത ജനവിഭാഗമാണ് കേരളം.
പലസ്തീനില്‍ വേട്ടയാടപ്പെടുന്ന 
കുഞ്ഞുങ്ങള്‍ക്കൊപ്പമാണ് കേരളം. 
പലസ്തീന്‍ വിഷയത്തില്‍ അവതരിപ്പിച്ച മൈം തടയാന്‍ ആര്‍ക്കാണ് അധികാരം?
കുമ്പള സ്‌കൂളിലെ വിദ്യാര്‍ത്ഥികള്‍ക്ക് 
ഇതേ മൈം വേദിയില്‍ അവതരിപ്പിക്കാന്‍ 
അവസരമൊരുക്കും എന്ന കാര്യം 
വ്യക്തമാക്കാന്‍ ഞാന്‍ ആഗ്രഹിക്കുകയാണ്.

English Summary: A mime performance by Plus Two students on the plight of Palestine and Gaza was abruptly stopped by a teacher at Kumbala Higher Secondary School during a cultural festival. The teacher ordered the curtain to be lowered just two and a half minutes after the performance began.The students’ mime highlighted the killing of children and the suffering caused by the conflict. The incident has sparked controversy, drawing the attention of the Education Minister V. Sivankutty, who ordered an immediate investigation and directed the Director of Public Education to submit a report.