ഗസ്സ: ഗസ്സ സിറ്റി പിടിക്കാനുള്ള ഇസ്റാഈൽ സൈന്യത്തിന്റെ വ്യോമ, കരയാക്രമണത്തിൽ ഗസ്സയിലെ പലായനം വാക്കുകൾകൊണ്ട് വർണിക്കാനാകാത്ത ദുരിതക്കാഴ്ചയാണ്. അന്താരാഷ്ട്ര സമാധാന ദിനമായ ഇന്ന് ഗസ്സക്കാർ ഒരു നരകത്തിൽനിന്ന് മറ്റൊരിടത്തേക്ക് എന്ന അവസ്ഥയിൽ പലായനത്തിലാണ്. സമാധാനമുള്ള ലോകത്തിനായി പ്രവർത്തിക്കുക എന്നതാണ് ഇന്നത്തെ ലോക സമാധാന ദിനത്തിന്റെ സന്ദേശം.

ഇന്നലെ ഗസ്സയിൽ കൊല്ലപ്പെട്ടത് 51 പേരാണ്. ഇതിൽ 43 പേരും കൊല്ലപ്പെട്ടത് ഗസ്സ സിറ്റിയിലാണ്. ഫലസ്തീൻ സിവിൽ ഡിഫൻസിന്റെ കണക്കനുസരിച്ച് 4.5 ലക്ഷം പേർ പലായനം ചെയ്യപ്പെട്ടു. ഇതുവരെ ഗസ്സയിൽ 65,208 പേർ കൊല്ലപ്പെടുകയും 1.66 ലക്ഷം പേർക്ക് പരുക്കേൽക്കുകയും ചെയ്തു. ഗസ്സ സിറ്റിയിൽ ഇതുവരെ കാണാത്ത ആക്രമണം ഉണ്ടാകുമെന്നാണ് ഇസ്റാഈൽ പ്രതിരോധ മന്ത്രി പറഞ്ഞത്. 

ALSO READ: ​ഇസ്റാഈലി തടവുകാരുടെ 'ഫെയർവെൽ ചിത്രം' പോസ്റ്റ് ചെയ്ത് ഹമാസ്; നി​ഗൂഢമായി 'റോൺ അരദ്'

തെക്കൻ ഗസ്സയിലേക്ക് ഒഴിഞ്ഞുപോകാനാണ് ഗസ്സ സിറ്റിയിലുള്ളവർക്ക് ഇസ്റാഈൽ സൈന്യം നൽകിയ നിർദേശം. എന്നാൽ തകർന്നു കോൺക്രീറ്റ് കൂനകളായ തെക്കൻ ഗസ്സയിൽ ആളുകളെ ഉൾക്കൊള്ളാനാകാത്ത സാഹചര്യമാണുള്ളത്. നാലു ലക്ഷത്തോളം പേർ ഗസ്സ സിറ്റിയിൽനിന്ന് ഇതിനകം പലായനം ചെയ്തെന്നാണ് കണക്ക്. ഇന്നലെ തെക്കൻ ഗസ്സയിലെ ടെന്റിനു നേരെ നടന്ന ഇസ്റാഈൽ ആക്രമണത്തിൽ രണ്ടു കുട്ടികൾ കൊല്ലപ്പെട്ടു. മൃഗങ്ങൾക്കു പോലും അതിജീവിക്കാൻ കഴിയാത്ത സാഹചര്യമാണ് ഇവിടെയുള്ളതെന്ന് തെക്കൻ ഗസ്സയിലെ സിൽവിയ അൽ ശുറാഫി പറയുന്നു. ഈ ആഴ്ചയാണ് സിൽവിയ ഗസ്സ സിറ്റിയിൽനിന്ന് ഇവിടേക്ക്് പലായനം ചെയ്യപ്പെട്ടത്.

വെള്ളവും ഭക്ഷണവും ടെന്റുമില്ലാതെ നരകിച്ചു ജീവിക്കുകയാണ് ഒരു കൂട്ടം മനുഷ്യർ. രണ്ടു വർഷമായി തുടരുന്ന ആക്രമണത്തിൽ ഏറ്റവും ശക്തമായ ആക്രമണമാണ് ഗസ്സ സിറ്റിയിൽ ഇപ്പോൾ നടക്കുന്നത്. സെയ്തൂൻ, തുഫ്, ഷെജായിയ, ഷെയ്ഖ് അൽ റദ്വാൻ എന്നിവിടങ്ങളിൽ രൂക്ഷമായ ഏറ്റുമുട്ടലാണ് നടക്കുന്നത്.