ദുബൈ: 2025 ഒക്ടോബറിലെ ഇന്ധന വിലകൾ വരും ദിവസങ്ങളിൽ പ്രഖ്യാപിക്കാനിരിക്കുകയാണ് യുഎഇ. ഈ പ്രതിമാസ വില പരിഷ്കരണം ഇന്ധന ബജറ്റും ദൈനംദിന ചെലവുകളും പ്ലാൻ ചെയ്യുന്നതിന് സാധാരണക്കാർക്ക് ഏറെ സഹായകമാണ്. 

സെപ്തംബറിലെ ഇന്ധന വിലകൾ

ഓ​ഗസ്റ്റുമായി താരതമ്യം ചെയ്യുമ്പോൾ സെപ്തംബറിൽ പെട്രോൾ വിലയിൽ നേരിയ വർധനവുണ്ടായിരുന്നു. എന്നാൽ, ഡീസൽ വില കുറഞ്ഞു. 

1) സൂപ്പർ 98 പെട്രോൾ: ലിറ്ററിന് 2.70 ദിർഹം
2) സ്പെഷ്യൽ 95: ലിറ്ററിന് 2.58 ദിർഹം
3) ഇ-പ്ലസ്: ലിറ്ററിന് 2.51 ദിർഹം
4) ഡീസൽ: ലിറ്ററിന് 2.66 ദിർഹം (ഓഗസ്റ്റിൽ 2.78 ദിർഹമായിരുന്നു)

2015 ൽ യുഎഇ ഇന്ധനവില നിയന്ത്രണം നീക്കിയതിനുശേഷം, പ്രതിമാസ നിരക്കുകൾ പൊതുവേ ആ​ഗോള എണ്ണ വിപണിയിലെ പ്രവണതകളെ ആശ്രയിച്ചാണ് നിലനിൽക്കുന്നത്. സെപ്റ്റംബർ 30-ന് ഒക്ടോബറിലെ വിലകൾ പ്രഖ്യാപിക്കാനിരിക്കെ, അടുത്ത മാസം ഇന്ധന വില കുറയുമോ എന്നാണ് യുഎഇക്കാർ ഉറ്റുനോക്കുന്നത്. 

ALSO READ: 2025 അവസാനിക്കുകയാണ്; അറിയാം 2026 ലെ യുഎഇ പൊതു അവധി ദിനങ്ങൾ

യുഎഇക്കാർ എന്താണ് പ്രതീക്ഷിക്കേണ്ടത്.

ഈ മാസം എണ്ണ വിലകൾ വർധിച്ചിട്ടുണ്ട്. ബ്രെന്റ് ക്രൂഡ് ബാരലിന് 68 ഡോളറിന് മുകളിലും യുഎസ് എണ്ണ 64 ഡോളറിന് മുകളിലുമാണ്, മാത്രമല്ല യുഎസ് - റഷ്യ ബന്ധത്തിലെ പ്രശ്നങ്ങളും ഒപെക്+ വിതരണ ആശങ്കളും വില വർധനവിന് ഒരു പ്രധാന കാരണമാണ്.

കഴിഞ്ഞയാഴ്ച യുഎസ് ക്രൂഡ് സ്റ്റോക്കിലുണ്ടായ ഇടിവ് ആ​ഗോള എണ്ണ വിലയിൽ വലിയ സമ്മർദ്ദമുണ്ടാക്കി. അതേസമയം, റഷ്യൻ എണ്ണ വിതരണത്തിലെ തടസ്സങ്ങൾ യൂറോപ്പിലും ഡീസൽ വിലകൾ വർധിക്കുന്നതിന് കാരണമായി. 

ഇതിനർത്ഥം, യുഎഇ ഡ്രൈവർമാർക്ക്, ഒക്ടോബറിൽ ഇന്ധന വിലകൾ മാറ്റമില്ലാതെ തുടരുകയോ നേരിയ വർധനവ് ഉണ്ടാകുകയോ ചെയ്തേക്കാം. അതേസമയം, ഭൗമരാഷ്ട്രീയ സംഘർഷങ്ങൾ രൂക്ഷമാകുകയോ വിതരണത്തിൽ അപ്രതീക്ഷിത തടസ്സങ്ങൾ ഉണ്ടാകുകയോ ചെയ്താൽ എണ്ണ വിലയിൽ വലിയ വർധനവിന് സാധ്യതയുണ്ട്.