കൊച്ചി: നടുറോഡിൽ യുവതിയെ പീഡിപ്പിക്കാൻ ശ്രമിച്ച കേസിൽ മുൻ ഗവൺമെന്റ് പ്ലീഡർ ധനേഷ് മാത്യു മാഞ്ഞൂരാന് എറണാകുളം ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി ഒരു വർഷത്തെ തടവും 10,000 രൂപ പിഴയും വിധിച്ചു. പിഴയുടെ പകുതി തുക പരാതിക്കാരിക്ക് നഷ്ടപരിഹാരമായി നൽകണമെന്ന് കോടതി ഉത്തരവിട്ടു. 2016 ജൂലൈ 14-ന് വൈകിട്ട് 7 മണിക്ക് മുല്ലശ്ശേരിക്കനാൽ റോഡിൽ യുവതിയെ കയറിപ്പിടിച്ചുവെന്നാണ് കേസിനാസ്പദമായ സംഭവം.

കോടതി നിരീക്ഷിച്ചതനുസരിച്ച്, കുറ്റകൃത്യം അതീവ ഗൗരവമുള്ളതാണ്. ജോലി കഴിഞ്ഞ് മടങ്ങുകയായിരുന്ന യുവതിയെ പൊതുവഴിയിൽ മാനഭംഗപ്പെടുത്താൻ ശ്രമിച്ചുവെന്നും കോടതി വിലയിരുത്തി. ഈ സംഭവം റിപ്പോർട്ട് ചെയ്തതിനെ തുടർന്ന് 2016-ൽ ഹൈക്കോടതിക്ക് മുന്നിൽ മാധ്യമപ്രവർത്തകരും അഭിഭാഷകരും തമ്മിൽ സംഘർഷം ഉണ്ടായിരുന്നു. തിരുവനന്തപുരം ഉൾപ്പെടെയുള്ള കോടതികളിൽ ഇതിന്റെ തുടർച്ചയായി മാധ്യമപ്രവർത്തകരും അഭിഭാഷകരും തമ്മിൽ വാക്കേറ്റവും സംഘർഷവും ഏറെക്കാലം നീണ്ടുനിന്നു.