ഏഷ്യ കപ്പ് ഫൈനലിൽ മികച്ച പ്രകടനം നടത്തിയ മലയാളി സൂപ്പർതാരം സഞ്ജു സാംസണെ പ്രശംസിച്ച മുൻ ഇന്ത്യൻ സ്പിന്നർ മുരളി കാർത്തിക്. മത്സരത്തിന്റെ നിർണായകമായ സമയങ്ങളിൽ സഞ്ജു മികച്ച പ്രകടനം പുറത്തെടുത്തുവെന്നാണ് മുരളി കാർത്തിക് പറഞ്ഞത്. സഞ്ജുവിനെകൊണ്ട് ഇത് ചെയ്യാൻ സാധിക്കുമോ എന്നതിനെക്കുറിച്ച് എല്ലാവരും സംസാരിച്ചിരുന്നുവെന്നും മുൻ ഇന്ത്യൻ സ്പിന്നർ പറഞ്ഞു. ക്രിക് ബസിന് നൽകിയ അഭിമുഖത്തിലാണ് മുൻ ഇന്ത്യൻ താരം ഇക്കാര്യം പറഞ്ഞത്. 

''ഇത് വെറുമൊരു ഫൈനൽ മാത്രമായിരുന്നില്ല. സഞ്ജു സാംസണിന്റെ കഴിവിനെ കാണിക്കുന്നത് കൂടിയായിരുന്നു ഇത്. ആ റോൾ സഞ്ജുവിന് യോജിക്കുമോ എന്നതിനെക്കുറിച്ച് എല്ലാവരും സംസാരിക്കുന്നു. അവന് കളിക്കാൻ ഇഷ്ടം മറ്റൊരു സ്ഥാനത്തായിരുന്നു. എന്നാൽ അദ്ദേഹത്തിന് അത് നൽകിയില്ല. ശുഭ്മൻ ഗില്ലിന് നൽകുകയും ചെയ്തു. ഫൈനലിൽ ചെയ്‌സിങ്ങിൽ വളരെ ഒരു നിർണായകമായ ഒരു ഘട്ടത്തിൽ സഞ്ജു വഹിച്ച റോൾ മികച്ചതായിരുന്നു'' മുരളി കാർത്തിക് പറഞ്ഞു. 

മത്സരത്തിന്റെ തുടക്കത്തിൽ തന്നെ അഭിഷേക് ശർമ, ശുഭ്മൻ ഗിൽ, ക്യാപ്റ്റൻ സൂര്യകുമാർ യാദവ് എന്നിവരെ നഷ്ടമായ ഇന്ത്യയെ സമ്മർദ്ദത്തിൽ നിന്നും കരകയറ്റിയത് തിലക വർമ്മക്കൊപ്പം മികച്ച കൂട്ടുകെട്ട് സൃഷ്ടിച്ച മലയാളി താരം സഞ്ജു സാംസൺ കൂടിയാണ്.  21 പന്തിൽ നിന്നും 24 റൺസാണ് മലയാളി താരം നേടിയത്. രണ്ടു ഫോറുകളും ഒരു സിക്സുമാണ് സഞ്ജുവിന്റെ ബാറ്റിൽ നിന്നും പിറന്നത്.

ഫൈനലിൽ പാകിസ്താനെതിരെ അഞ്ച് വിക്കറ്റിനായിരുന്നു സൂര്യകുമാർ യാദവും സംഘവും വിജയിച്ചു കയറിയത്. ഇന്ത്യയുടെ ഒമ്പതാം ഏഷ്യ കപ്പ് കിരീട നേട്ടമാണിത്. ടൂർണമെന്റിൽ ഒറ്റ മത്സരം പോലും പരാജയപ്പെടാതെയാണ് ഇന്ത്യ ഏഷ്യയിലെ രാജാക്കന്മാരായി മാറിയത്. മത്സരത്തിൽ ആദ്യം ബാറ്റ് ചെയ്ത പാക്കിസ്താൻ 19.1 ഓവറിൽ 146 റൺസിന് പുറത്താവുകയായിരുന്നു. വിജയലക്ഷ്യം പിന്തുടർന്നിറങ്ങിയ ഇന്ത്യ രണ്ട് പന്തുകളും അഞ്ച് വിക്കറ്റുകളും ബാക്കിനിൽക്കെ ലക്ഷ്യം മറികടക്കുകയായിരുന്നു. 

അർദ്ധ സെഞ്ച്വറി നേടിയ തിലക് വർമ്മയുടെ കരുത്തിലാണ് ഇന്ത്യ വിജയം സ്വന്തമാക്കിയത്. 53 പന്തുകളിൽ നിന്നും പുറത്താവാതെ 69 റൺസാണ് തിലക് വർമ്മ സ്വന്തമാക്കിയത്. 3 ഫോറുകളും നാല് സിക്സുകളും അടങ്ങുന്നതായിരുന്നു താരത്തിന്റെ പ്രകടനം. ശിവം ദുബെ 22 പന്തിൽ രണ്ടു വീതം സിക്സുകളും ഫോറുകളും ഉൾപ്പെടെ 33 റൺസും നേടി ഇന്ത്യയുടെ വിജയത്തിൽ നിർണായകമായി.

Former Indian spinner Murali Karthik praised Malayali superstar Sanju Samson for his excellent performance in the Asia Cup final. Murali Karthik said that Sanju performed well at crucial times of the match. The former Indian spinner also said that everyone was talking about whether Sanju could do this.