തൊടുപുഴ: 2024 - 25സാമ്പത്തിക വർഷത്തിൽ വന്യജീവി ആക്രമണങ്ങളിൽ നഷ്ടപരിഹാരം നൽകാൻ നിയമസഭാ സബ്ജക്ട് കമ്മിറ്റി ശുപാർശ ചെയ്തത് 23 കോടി രൂപ. എന്നാൽ സർക്കാർ ബജറ്റ് വിഹിതമായി അനുവദിച്ചത് 1.26 കോടി രൂപ മാത്രം. 2021 ജൂൺ ഒന്നു മുതൽ 2025 ജൂലൈ 7 വരെ വന്യജീവി ആക്രമണത്തിൽ ജീവഹാനി സംഭവിച്ച 51 അപേക്ഷകളിലും പരുക്കേറ്റ 738 അപേക്ഷകർക്കും നഷ്ടപരിഹാരം നൽകിയിട്ടില്ല. നിയമസഭയുടെ മേശപ്പുറത്തു വച്ച സബ്ജക്ട് കമ്മിറ്റി റിപ്പോർട്ടിലാണ് ഈ വിവരമുള്ളത്. പണം അനുവദിക്കാത്തത് കൊണ്ട് നഷ്ടപരിഹാര വിതരണം മന്ദഗതിയിലാണ്. കോടികൾ ചെലവഴിച്ച് മനുഷ്യ വന്യ ജീവി സംഘർഷ ലഘൂകരണ മാമാങ്കം നടത്തുമ്പോഴാണ് നഷ്ടപരിഹാരം നൽകാൻ സർക്കാർ പണം അനുവദിക്കാത്തത്. 

വന്യജീവി സംരക്ഷണത്തിനുള്ള കേന്ദ്ര പദ്ധതികളായ ഐ.ഡി.ഡബ്ല്യു.എച്ച്, പ്രൊജക്റ്റ് എലിഫന്റ് ആൻഡ് ടൈഗർ പദ്ധതികൾ പ്രകാരം കഴിഞ്ഞ അഞ്ചു വർഷത്തിനിടെ 221.38 കോടി രൂപ കേരളത്തിന് അനുവദിച്ചിട്ടുണ്ട്. എന്നാൽ ഇക്കാലയളവിൽ സംസ്ഥാനം ചെലവഴിച്ചത് 73.55 കോടി രൂപ മാത്രമാണ്. 147.83 കോടി രൂപ ലാപ്‌സായി. ഐ.ഡി.ഡബ്ല്യു.എച്ച് (ഇന്റട്രേറ്റഡ് ഡെവലപ്‌മെന്റ് ഓഫ് വൈൽഡ് ലൈഫ് ഹബിറ്റാറ്റ്) പ്രകാരം കേരളത്തിന് അനുവദിച്ച 104.57 കോടി രൂപയിൽ 30.82 കോടിയും പ്രൊജക്റ്റ് എലിഫന്റ് ആൻഡ് ടൈഗർ പദ്ധതിയിൽ 116.81 കോടി രൂപ അനുവദിച്ചതിൽ 42.73 കോടിയും മാത്രമാണ് ചെലവഴിച്ചത്. സംസ്ഥാനത്ത് മനുഷ്യ വന്യജീവി സംഘർഷം രൂക്ഷമായിരിക്കുന്ന വേളയിലാണ് സംസ്ഥാനം ഇത്രയും തുക ലാഘവത്തോടെ നഷ്ടപ്പെടുത്തിയത്. 

വന്യജീവി സംരക്ഷണവും വന്യജീവി ആവാസ വ്യവസ്ഥയുടെ സമഗ്ര വികസനവും മെച്ചപ്പെടുത്തുന്നതിനായി കേന്ദ്ര സർക്കാർ ആവിഷ്‌കരിച്ച പദ്ധതിയാണ് ഐ.ഡി.ഡബ്ല്യു.എച്ച്. ആവാസ വ്യവസ്ഥകളുടെ സംരക്ഷണവും വീണ്ടെടുക്കൽ പരിപാടിയുമാണ് പദ്ധതി പ്രധാനമായും ലക്ഷ്യമിടുന്നത്. 

ആവാസ വ്യവസ്ഥയുടെ പുനഃസ്ഥാപനം, സമൂഹത്തിന്റെ പങ്കാളിത്തം, മനുഷ്യനും വന്യജീവികളും തമ്മിലുള്ള സംഘർഷം ലഘൂകരിക്കൽ എന്നിവയുൾപ്പെടെ വിവിധ പ്രവർത്തനങ്ങൾക്കായി സംസ്ഥാന സർക്കാരുകൾക്ക് സാമ്പത്തികവും സാങ്കേതികവുമായ സഹായം ഈ പദ്ധതിയിലൂടെ ലഭിക്കുന്നു. കടുവകളെ അവയുടെ സ്വാഭാവിക ആവാസവ്യവസ്ഥയിൽ സംരക്ഷിക്കുന്നതിനായി 1973ൽ ആരംഭിച്ച പദ്ധതിയാണ് പ്രൊജക്ട് ടൈഗർ. 

ആവാസവ്യവസ്ഥയുടെ നഷ്ടവും വേട്ടയാടലും കാരണം കുറഞ്ഞുവരുന്ന ആനകളുടെ എണ്ണം സംരക്ഷിക്കാൻ 1992ൽ ആരംഭിച്ച പദ്ധതിയാണ് പ്രൊജക്ട് എലിഫന്റ്. വിവിധ ജീവിവർഗങ്ങളുടെ സംരക്ഷണത്തിനായി നൂതന ഉപകരണങ്ങളും സാങ്കേതിക വിദ്യകളും ഉപയോഗിക്കുന്ന പ്രൊജക്റ്റ് ഡോൾഫിൻ, പ്രൊജക്റ്റ് ലയൺ തുടങ്ങിയ പദ്ധതികളും കേന്ദ്രം ആവിഷ്‌കരിച്ചിട്ടുണ്ട്.