ഗ്വാളിയോർ: അവിഹിതബന്ധം സംശയിച്ച് ഭർത്താവ് ഭാര്യയെ കത്തി കൊണ്ട് ആക്രമിച്ച് മൂക്ക് മുറിച്ചെടുത്തു. രാംതാപുര സ്വദേശിയായ 35-കാരിയായ യുവതിയാണ് ആക്രമണത്തിന് ഇരയായത്. ഭർത്താവിന്റെ പതിവായ സംശയങ്ങളെത്തുടർന്ന് മകളോടൊപ്പം ചാർ ഷഹർ നാക്കയിൽ വാടകയ്ക്ക് താമസിക്കുകയായിരുന്നു യുവതി. താൻസൻ നഗറിലെ ഒരു പ്രാദേശിക ഡയറിയിലേക്ക് ജോലിക്ക് പോകുന്ന വഴി, ഒരു ഹോട്ടലിന് സമീപം വെച്ചാണ് ഞായറാഴ്ച  രാവിലെ യുവതി ആക്രമിക്കപ്പെട്ടത്.

സംശയത്തിന്റെ പിടിയിൽ ഭർത്താവിന്റെ ക്രൂരത

പൊലിസ് അന്വേഷണം പ്രകാരം, യുവതി ജോലിസ്ഥലത്തേക്ക് നടന്നുപോകുമ്പോൾ ഭർത്താവ് അവരെ തടഞ്ഞു നിർത്തി. അസഭ്യവാക്കുകൾ പറഞ്ഞ് അവിഹിതബന്ധം ആരോപിച്ചു. യുവതി ഇതിനെ എതിർത്തതോടെ, കഴുത്തിൽ പിടിച്ച് കത്തി ഉപയോഗിച്ച് മൂക്ക് മുറിച്ചെടുത്തു. 'നിന്നെ കൊല്ലുമടി' എന്ന് ഭീഷണിപ്പെടുത്തിയ ശേഷം പ്രതി സംഭവസ്ഥലത്ത് നിന്ന് ഓടി രക്ഷപ്പെട്ടു. ഭർത്താവിന്റെ സംശയങ്ങൾ പതിവായിരുന്നതായി യുവതി പരാതിയിൽ പറഞ്ഞു. ഇതിനെത്തുടർന്നാണ് മകളോടൊപ്പം മാറിത്താമസിക്കാൻ നിർബന്ധിതയായത്.

പൊലിസ് ഇടപെട്ടു; പ്രതി ഒളിവിൽ

നാട്ടുകാർ സംഭവം കണ്ട് പൊലിസിന് വിവരം അറിയച്ചതോടെ, ഗ്വാളിയോർ പൊലിസ് സംഘം സ്ഥലത്തെത്തി. പരിക്കേറ്റ യുവതിയെ ആശുപത്രിയിലെത്തിച്ചു, മൊഴി രേഖപ്പെടുത്തി. യുവതിയുടെ നില തീ​ഗുരുതരമാണെന്ന് ഡോക്ടർമാർ അറിയിച്ചു. പ്രതി നിലവിൽ ഒളിവിലാണ്. പ്രതി ഒളിക്കാൻ സാധ്യതയുള്ള സ്ഥലങ്ങളിൽ പൊലിസ് റെയ്ഡുകൾ നടത്തുന്നു. ഉടൻ അറസ്റ്റ് ചെയ്യുമെന്ന് പൊലിസ് അറിയിച്ചു.
സ്ത്രീകളോടുള്ള അക്രമങ്ങൾ കൂടുന്ന സാഹചര്യത്തിൽ, ഗ്വാളിയോർ പൊലിസ് ജാഗ്രതാ നിർദേശങ്ങൾ പുറപ്പെടുവിച്ചു.