ഇടുക്കി: ചിന്നക്കനാല്‍ ചൂണ്ടലില്‍ കാട്ടാന ആക്രമണത്തില്‍ കര്‍ഷകന് ദാരുണാന്ത്യം.  പന്നിയാര്‍ സ്വദേശി ജോസഫ് വേലുച്ചാമി(62) ആണ് മരിച്ചത്. ഏലത്തോട്ടത്തില്‍ ജോലിചെയ്യുന്നതിനിടെയാണ്  ജോസഫിനെ കാട്ടാന ആക്രമിച്ചത്. 

ചക്കക്കൊമ്പന്‍ കാട്ടാനയാണ് ആക്രമിച്ചതെന്നാണ് പുറത്തുവരുന്ന സൂചന.  ഇന്ന് രാവിലെ 11.45 ഓടെയാണ് സംഭവം. ആനക്കൂട്ടത്തില്‍ 14ഓളം ആനകളുണ്ടായിരുന്നു. ആനക്കൂട്ടം സ്ഥലത്ത് തന്നെ തുടരുന്നതിനാല്‍ മൃതദേഹം പുറത്തെത്തിക്കാന്‍ സാധിച്ചിട്ടില്ല. റാപ്പിഡ് റെസ്‌പോണ്ട് ടീമിന്റെ നേതൃത്വത്തില്‍ വനംവകുപ്പ് ആനക്കൂട്ടത്തെ തുരത്താനുള്ള ശ്രമം തുടരുകയാണ്.

ALSO READ: തൃശൂര്‍ ചൊവ്വന്നൂരില്‍ യുവാവിനെ കൊലപ്പെടുത്തിയത് സ്വവര്‍ഗരതിക്കിടെയെന്ന് പൊലിസ്, സമാനരീതിയില്‍ മുന്‍പും കൊലപാതകം

അതേസമയം, കഴിഞ്ഞ വെള്ളിയാഴ്ച്ച തൃശൂര്‍ മലക്കപ്പാറയില്‍ കാറിന് നേരെ കാട്ടാനയുടെ ആക്രമണമുണ്ടായിരുന്നു. കറുകുറ്റി സ്വദേശി എലുവത്തിങ്കല്‍ വീട്ടില്‍ സെബിനും കുടുംബവും സഞ്ചരിച്ചകാറാണ് ആനക്കൂട്ടം ആക്രമിച്ചത്. ദമ്പതികളും അവരുടെ പിഞ്ചുകുഞ്ഞും അത്ഭുതകരമായി രക്ഷപ്പെട്ടു.

സംഭവദിവസം മലക്കപ്പാറയിലേക്കുള്ള യാത്രാമധ്യേ കാര്‍ കേടായതിനെ തുടര്‍ന്ന് സെബിനും കുടുംബവും വാഹനത്തിന് പുറത്തിറങ്ങി ബോണറ്റ് തുറന്ന് പരിശോധിക്കുന്നതിനിടെ ആനക്കൂട്ടം സമീപത്തെത്തിയത്. ഈ സമയം അതുവഴി വന്ന ഒരു ട്രാവലര്‍ വാഹനത്തില്‍ കയറി ഇവര്‍ രക്ഷപ്പെടുകയായിരുന്നു. തുടര്‍ന്ന് വാഴച്ചാല്‍ വനംവകുപ്പ് ഓഫീസില്‍ സംഭവം അറിയിക്കുകയും ചെയ്തു.

രാത്രിയോടെ ബന്ധുക്കളുമായി വീണ്ടും സ്ഥലത്തെത്തിയെങ്കിലും കാറിന് ചുറ്റും ആനക്കൂട്ടം നിലയുറപ്പിച്ചതിനാല്‍ തിരിച്ചുപോകേണ്ടി വന്നു. അടുത്ത ദിവസം പകല്‍ കാറെടുക്കാനെത്തിയപ്പോള്‍ വാഹനം പൂര്‍ണമായും തകര്‍ന്ന നിലയില്‍ കണ്ടെത്തി. കൂടാതെ, കാറില്‍ നിന്നും ഹെഡ്ലൈറ്റുകളും ആന്‍ഡ്രോയ്ഡ് സെറ്റും മോഷണം പോയതായും കണ്ടെത്തി.

സംഭവത്തെക്കുറിച്ച് സെബിന്‍ പോലീസില്‍ പരാതി നല്‍കി. മോഷണവും ആനക്കൂട്ടത്തിന്റെ ആക്രമണവും സംബന്ധിച്ച് പോലീസ് അന്വേഷണം ആരംഭിച്ചിട്ടുണ്ട്.

English Summary: A 62-year-old farmer, Joseph Veluchamy from Panniyar, tragically lost his life in an elephant attack near Chinnakkanal, Idukki, Kerala. The incident occurred around 11:45 AM while he was working at a plantation in Chundale. The wild elephant suspected in the attack is believed to be the notorious "Chakkakomban", part of a herd of around 14 elephants.