തിരുവനന്തപുരം: സംസ്ഥാനത്തെ സർക്കാർ സ്ഥാപനങ്ങളിൽ വൈദ്യുത വാഹനങ്ങൾക്കായി ഫാസ്റ്റ് ചാർജിങ് സ്റ്റേഷനുകൾ സ്ഥാപിക്കുന്നതിന് വിപുലമായ നിർദേശം കെ.എസ്.ഇ.ബി തയാറാക്കിയതായി വൈദ്യുതി മന്ത്രി കെ. കൃഷ്ണൻ കുട്ടി. എം.എൽ.എൽ ഫണ്ട് ഉപയോഗിച്ചാണ് എല്ലാ ജില്ലകളിലെയും എൻഫോഴ്‌സ്‌മെന്റ് ഓഫിസുകൾ, കലക്ടറേറ്റുകൾ തുടങ്ങിയ സർക്കാർ, അനുബന്ധ സ്ഥാപനങ്ങളിൽ ചാർജിങ് സ്റ്റേഷനുകൾ സ്ഥാപിക്കുക.

മോട്ടോർ വാഹന വകുപ്പ് നിർദേശിക്കുന്ന സ്ഥലങ്ങളിൽ 30 കിലോവാട്ട് ശേഷിയുള്ള 35 ചാർജിങ് സ്റ്റേഷനുകൾ സ്ഥാപിക്കുന്നതിന് മോട്ടോർ വാഹന വകുപ്പിന് ഫണ്ട് അനുവദിച്ചിട്ടുണ്ട്. 25 സ്ഥലങ്ങൾ ഇതിനോടകം കണ്ടെത്തിയതിൽ ഏഴിടങ്ങളിൽ ചാർജിങ് സ്റ്റേഷനുകൾ സ്ഥാപിച്ചുകഴിഞ്ഞു.

കെ.എസ്.ഇ.ബിയുടെ ഉടമസ്ഥതയിലുള്ള ചാർജിങ് സ്റ്റേഷനുകളിൽ സുഗമമായ ചാർജിങ്ങിനും വിശ്രമത്തിനും സൗകര്യമൊരുക്കുന്ന 'റിഫ്രഷ് ആൻഡ് റീചാർജ്' പദ്ധതി പൊതു-സ്വകാര്യ പങ്കാളിത്തത്തിൽ നടപ്പാക്കാൻ ഇ-ടെൻഡർ ക്ഷണിച്ചിട്ടുണ്ടെന്നും മന്ത്രി പറഞ്ഞു.